هەناسەکانى منداڵى

هەناسەکانى منداڵیی

بە چەند دڵۆپە فرمێسکێک
پەنجەرەیەک لە منداڵیی دەکەمەوە
بەچۆڕێک تریفەوە
بە کەمێک پاکیی ئاو
بە بۆنى تەڵێک نێرگز
بە توڕەبوونى با
بە لەتلەتبوونى باران
ئاشنا دەبمەوە بە منداڵیی و
نەفرەت دەکەم لە گەورەبوون
ئیدى نامەوێ عەشق ببینم بە ڕووخاویی
باخچە ببینم بە بێ گوڵ
ئێوارە ببینم بە تەنیایى
ژیان ببینم بە بی َشیعر
گەورە بوون
خەیاڵى فڕینى لێ سەندمەوە
ڕوانینى منى بۆ بەفر ڕەش کردەوە
بێ هودەیە
دانیشتن لە بەردەم هەتاو
ڕاکردن لە دەست تارمایى
ژیان دووبارەبوونەوەى پەیڤێکە لە زمانى لاڵێکدا
ژیان ئاوێتەیەکە لەڕەنگى بێڕەنگیی
ئاه
چەند جوان بوون کوفرەکانى منداڵى
جوانتر لە عیبادەتى گەورەبوون
چەند بەچێژ بوون ئازارەکانى منداڵیی
ناسکتر لە شادیی گەورەبوون
دەمەوێت بەیانییەک بەخەیاڵى منداڵیی
دەستى تیشکێک لە ڕۆژ بگرم
بۆنى کۆڵانەکانى منداڵى بکەم
هەڵماتە ڕەنگاوڕەنگەکانم بدۆزمەوە
خەونە ڕەشوسپییەکانم تەفسیر بکەم
گومانى بەجێماوى هاوڕێکانم هەڵگرمەوە
لەترسى مامۆستا دڵرەقە ئاکربەدەستەکان
لەبەرزى دیوارى قوتابخانەوە
خۆم شۆرکەمەوە وەکو ئاو
بۆیەکەمین وانەى فێربوون
وانەى فڕین
هەنووکە گیرفانەکانم پڕن لەترسى منداڵى و خاڵى لە ئایندە
چاوەکانم پڕن لە گەڵاى پایز و خاڵى لە بینینى بەهار
هەمیشە خەیاڵ دەمباتەوە بۆ ڕاوەستان لەبەر باران
واى بۆ منداڵى بە پەلە جێیهێشتین
کەم بوون گەمەکانى
بەئەندازەى چاو داخستن و کردنەوە
لە چاوشارکێدا
منداڵى سەفەرێکە پڕ لە گومان
پڕ لە گریان