ئیعترافەکانى رێبوار سیوەیلى
 

نووسینى: ڕێبوار سیوەیلى
و. لەفارسیەوە: توانا ئەمین

1
باشترین ستایشى پیاو
بۆ ژن
ئایەتى ئاوێزانبوونە..

2
تەنانەت ئەگەر هیچ بەهانەیەک نەبێت
بۆ مەستى
دەبێ هەوڵدەین لە ستایشکردنى ژندا و
جوانییەکەى، قوم.. قوم.. هەڵدەین
تــا زمان لە بارى توندوتیژى
رزگارى بێت..

3
ده‌بێ جەستەى ژن بکەینە پەرستگا
تا لەهەر سجودێکى چێژدا،
پەى دەرپەى ماچى کەین و
چێژى دەستبازیش
بگاتە: لوتکە.


4
لەگەڵ تۆدا تــا هەر خۆشییەک رۆیشتم
تا ئیتر گومان نەکەم
غوربەت،
رۆحمى دزیوە.

5
ده‌بێ ئەو دارستانەت لەیادبێ
کە بەپاسکیلەوە پیاسەمان تیادەکرد و
هەر کاتێکیش مەیلى ئاوێزانبوون
لەودیو بۆتەى نیگاکانمانەوە سەرەتاتکێى دەکرد
بەئەندازەى چێژێک دەمردین!

6
نیگا،
کەزمانى هاوبەشى ئێمە بوو
بەبارتەقاى جیابوونەوەیەک بووە سەراب،
تا ئەوپەڕیشى
خاڵى.

7
پێش ئەوەى بڕۆى،
داهاتووم لێرە بوو
خۆشم،
لەگەڵ تۆ..

8
سەرەنجام هێندە تەنیا ببووم
کە تەنیا نیشانەى ئاوەدانى ئەم ژوورە
دەنگى بەجێماوى تۆ بوو
لە سەماعەى تەلەفۆندا
منیش ئەوەندە سووتا بووم،
بۆم نەدەدۆزرایەوە،
گەرووى وەڵامدانەوە..

9
هێندە خۆشم دەویستى
تا زەمزەمەى ناوت
ساڕێژى کرد لە لێومەوە و
شیعرمى پڕ کرد..

10
ئاو دەپۆشم و
لە چاوەڕوانیى خۆردا
پەنا بۆتۆ دەهێنم..
چ بوونێکى پڕ چێژە،
لەسەر پێستت،
دووبارە بوونەوە هەڵم..
 

11
دەتگوت جەستەت بۆنى بایامى لێدێت!
منیش درەختێکم دەهێنایەوە یاد
گەڵاکانى وەک پێستى تۆ ناسک و
لقەکانیشى
لە ڕەنگى چاوەکانت..

12
عەشق مناڵیى من بوو
کاتآ سەرت دەخستە سەرسنگم و
پەنجە ناسکەکانت لە مووەکانمدا دەگێڕان
ختووکەى دڵمت دەدا،
منیش گوێم ڕادێرابوو بۆ دەنگى جاویدانەى:
خۆشمدەوێى..

13
هەموو جارێ پێشئەوەى بێى،
ماڵەکەم دەڕازانەوە و
تەنیاییم دەسڕییەوە لە شتەکان
سەراپاى بوونیشم
پڕدەبوو لە ژیان..

14
ژیانى ئێمە کە بەقەد ژوورێ بچوک
من وتۆش کە بەگەورەیى باوەشێک بوین،
سەراپاى شتى ماڵەکەشمان
کە لەجانتایەکدا جێى دەبوەوە..
دواى فیراق
جیهانمان پڕکرد:
من  و تۆ
هەرکەسەمان بۆ وڵاتێک سەرمان هەڵگرت
کاتى هەراج
هەر شتێکیان بۆ ماڵێک برد و
من  و تۆش
تەنیا ماینەوە..

15
بە خێرایى جیابوونەوە
خۆت لە دەستى من سەندەوە
لە ناکاو بینیم،
لەتاو بریندارى
هەڵوەشام،
بێجگە لە نووزەى ژێر وێرانییەکانى جەستە
هیچم بۆ نەمایەوە..
بەخێرایى جیابوونەوە
نامۆبووم لە خۆم..


16
ئەوکاتەى فیراق،
بەخێرایى هەورەتریشقە لێیدام
دەمزانى هیچ خودایەک
نقەى هیچ سورەتێکم نابیستێ
تازە لە زومرەى سووتاوەکان بووم..

17
فیراق
شەهیدانە تەنیای خستین  و
هەردووکمان
دایکانە
بۆ یەکتر گریاین..
ئێستاش لە ئێمە تەنها دوو گۆڕ ماوەتەوە:
کەمن لەهەردووکیاندا خەتووم.

18
پەرداخە رەنگا وڕەنگەکەت
هێشتا لێرەیە و
بێدەنگییەکى تاڵ
رۆحە شوشەییەکەى
پڕکردووە لە چاوەڕوانى..


19
ئیتر دانانیشم
لە کەنار ئەو سفرە بچووکەیا
کە پردێکمان لە ماچ
بەسەردا ڕایەڵ کردبوو
تا چێژى پێکەوەبوون
بەسەریا ڕابوورێ..
ئەمێستا نیگام
لەوسەرەوە بەر"هیچ" دەکەوێ و
چێژى چەقینە ناوخرۆشانى
یادوەرییەکان،
کون دەکا..

20
ئاسانە سڕینەوەى ناوت
لە هاردى کۆمپیتەر و
خاڵیکردنەوەى ئەلبووم لە وێنەکان  و
ناردنەوەى نامەکان بۆ هەمان ناونیشان
وەلێ..
چی بکەم:
لە یادوەرى خۆم و
تەنیایى ئەم ژوورە و
دەریچەى ئەم ماڵە،
کە پیاسەڕێى نامەکانت بوو؟

21
هیچ کاتێ سیماى سامناکى گۆپنهاگن و
تــاڵى شەوانى تاراوگە
بەقەد ئەو دەمە سەخت نەبوون
کە من دڵشکاو
لەچرپاکەمان
هاتمە خوارێ و
لەسەر عەردى ژوورەکە
وەک مەلێکى پێککراو
لەسەر جادەى مەرگ،
تەنیا کەوتم..

22
ئەو رۆژە بسپێرە بەیادەوەرى:
کە لەدارستانەکەیا
هەستمانکرد دەبێ
هەر لەوێ روتبینەوە و
نەمامى ئاوێزانبوونێک بچێنین..

23
فەرمووت
کەدەبێ بڕۆم  و
لەگەڵ خۆمى بەرم کتێب و جلەکانم
..............
ئاهــ ...
نازانى
چەند دەسبەتاڵ گەڕامەوە

24
ئەم ژوورە،
کە باخى ئاوێزانبوونەکانمان و
لە پەنجە گوناهویستەکانمانەوە
داهاتوو دزەى دەکرد
ئەمێستا توولە ڕێیەکە،
دڵۆپە ئەسرینە پڕ لە بێدەنگییەکانیش
پیایدا ڕانابوورن
مەرگیش،
لەسەر لێوارى پەنجەرەکەى نیشتووە.


25
رەنگە لەجێگایەکى زۆر دوورەوە
نامەیەکت بۆ بنووسم:
کە ئێستاش لە یادما زیندویت و
گەرمیى قاچە بچووکەکانیشت
هەسپێدەکەم،
کە هێندە بە دەستەکانم ئاشنابوون..

26
تــا هەمووان باوەڕ بەدڵپاکى ئەو بێنن
پیاوێک، کە هەمیشە خۆى بوو
لەم شارە غەمئەنگێزە
تەنیا و سەبوور
خودایانە
سەفەر دەکا،
سەرەنجامیش:
"لم یلد ولم یولد
ولم یکن لە کفو احد"

27
وێنەکانت، نازەنین
وەکچۆن گوتت، لەتوپەت کران..
ئەگەرچى نازانى ئێستاش
نیگامیان لەچوارچێوە گرتووە:
دیمەنەکەیان!

28
ئێستاش،
کەدەرگاى حەمامەکە دەکەمەوە
دەنگى گۆرانیەکانت
لەژێر دوشەکەدا دەبیستم  و
کەسکتر دەبێ بەهەر دڵۆپێک
نەمامى بوونم
تۆ ئێستاش بۆ رۆحى بێ سنوورى من
………………………………
…………………….....
…………………
…………
………
…
..
.
.
.
بارانى…

29
تەلەفۆنەکەم دانا
"هیچ"بە هانامەوە هات
پڕ بەدڵیشم تەنیایى،
قاچەکانم سارد بوونەوە
لەو بێدەنگییە سامناکەدا
گوێم لێبوو:
ئیدى تۆ ناتەوێ هەبیت
ئیتر.. نیت

ئاى.. عەشق
دەتوانى چەند بریندارمان کەیت..
ده‌بێ هەناسە بەم
تا ئەم دڵپڕییە،
گەرووى داهاتووم نەگرێ.
ئەم شەوەش
لە ژێر تاوى یادەکانى پێکەوەبووندا
پارچەپارچەم نەکا و
لەوە زیارتر بەم هەموو وردیلەییەوە
لێکهەڵنەوەشێم..
چ ڕاستییەکى باوەڕنەکراوە عاشقبوون
چەندەش واقیعییە جیابوونەوە؟
دەتسپێرم بە داهاتووت
بە ئاوێزانبوونى ئەو ڕۆژانەى
کە دەزانم،
لە یادى ماچەکانمداى
ده‌بێ بڕۆم و
بەتاڵیان کەمەوە دەستەکانم
لە قوورسایى زۆریى یادەکان
ئەم چەقۆی فەریادەش
با هەر ساتێ لە بوونم ڕۆچێ.
لێشاوێ کابووس دەبینم
چاوەڕوانن
خەونەکانم بخەنە بۆسەوە..
 

* بەقەولى ئیتالییەکان ئەمە خیانەتێکى منە لەرێبوار سیوەیلى، خۆى لەبنەڕەتدا ئەم شیعرانە بە فارسى نووسراون و سیوەیلى لەکتێبى (زمانى عەشق، زەمەنى ئەنفال)دا لەبەشى فارسیەکەیدا بەناونشانى (اعتراف و زهرخند)بڵاویکردونەتەوە، ئەمەى دەیخوێنیتەوە هەڵبژاردەیەکى ئەو تێکستە شیعریانەیەو ئێمە بۆ کوردییەکەى ئەو تایتڵەمان بەپەسەند زانى، بەو هیوایەى توانبێتمان ئەو تاموچێژەى لەئەسڵى شیعرەکاندا هەیە، دەستى کەمیش بێت گواستبێتمانەوە.
توانا

برام کاک توانا
سڵاو و دەستخۆشیت لێ دەکەم. سەرەتا زۆر خۆشحاڵ بووم بەوەى ئاوڕت لەم کۆمەڵە شیعرە دایەوە، کە بەشێکى ترە لە (زمانى عەشق). هەشت ساڵە ئەو کۆمەڵە شیعرە بڵاو کراوەتەوە و کەس پرسیارى نەکرد بۆچى کۆمەڵە شیعرێک بە سێ زمان و سێ فۆرمى شیعریى جیاواز، خۆى پێشکەش دەکا. بۆچى عەشق و تراژیدیاکەى لە سێ ئاستى زمانیدا دێتە قسە؟؟. هەر وەک بۆ خۆت ئاماژەت پێداوە ئەمە هەڵبژاردەیەکە لە بەشى شیعرە فارسییەکان، بەناونیشانى (دانپیانان و ژەهرخەند)، ئەمە چیرۆکى ئەو بەشەن لە عەشق کە لە ژەهردا دەگەوزێن، ژەهرى خەندە. هیوادام ئەم دەستپێشخەرییەى تۆ، چاوکرانەوەى ئەو کەسانەى بە دوادا بێت کە خەریکى ڕەخنە و ڕاڤەى شیعرن. من بە وەرگێڕانەکەت خۆشحاڵم و لەو شوێنانەى بە پێویستم زانیبێ، هەروەک بۆخۆت مافى ئەوەت دابوومێ، کەمە دەستکارییەکم کردووە. هەروەها چەند شیعرێکى تریشم لە هەمان بەشى فارسییەوە خستە سەر کارەکەى بەڕێزتان، تاکو وێنەیەکى تەواوتر بدەن بە دەستەوە. ئەوەى ماوە بڵاوکردنەوەیانە وەک ئەوەى کە دەقى شیعرین، من لەمەیان زۆر دەترسم، بەتایبەتى لە ڕۆژنامە.
 

خۆشەویستیم بە سێوێکدا دەنێرم
ڕێبوار سیوەیلى
19/8/2008 پیرزین