حه‌مه کاکه‌ڕه‌ش
بوونه‌وه‌ی من و خۆم
حه‌مه کاکه‌ڕه‌ش
له دوای مردن،
ئه‌گه‌ر زیندو بکرێینه‌وه؟
خۆم ببێت به باڵنده
من ده‌بم به قه‌فه‌س
خۆم ببێت به ئاگر
من ده‌بم به به‌فر و ئاو
خۆم ببێت به ڕێگا
من ده‌بم به هه‌زارپێ و به‌سه‌ریدا ده‌ڕۆم
خۆم ببێت به بیابان
من ده‌بم به ده‌ریا
خۆم ببێت به په‌نجه‌ره
من ده‌بم به ته‌م
خۆم ببێت به ڕۆژ
من ده‌بم به شه‌و
خۆم ببێت به عاشق
من ده‌بم به جه‌للاد
خۆم ببێت به خوداپه‌رست
من ده‌بم به پیاوکوژ
خۆم ببێت به پێکه‌نین
من ده‌بم به گریان
خۆم ببێت به سپی
من ده‌بم به ته‌م
خۆم ببێت به پیره‌مێرد
من ده‌بم به منداڵ و جنێوی پێ ده‌ده‌م
خۆم ببێت به پشیله
من ده‌بم به سه‌گ
خۆم ببێت به زانا
من ده‌بم به جاهیل
خۆم ببێت به ئاسمان
من ده‌بم به ئه‌شکه‌وت
خۆم ببێت به به‌هار
من ده‌بم به گوڵکوژ
خۆم ببێت به نیشتیمانپه‌روه‌ر
من ده‌بم به خاکفرۆش
خۆم ببێت به مه‌مک
من ده‌بم به قومبه‌له
خۆم ببێت به لۆکه
من ده‌بم به به‌رد
خۆم ببێت به ژیان
من ده‌بم به مردن
خۆم ببێت به من
من ده‌بم به خۆم.
،،،،،،،،،،،،،،،،،،،
ئه‌م شیعره‌م له ژماره 82 گۆڤاری ئاینده،
بڵاوکراوه‌ته‌وه به‌لام دێڕێکی لێ په‌ڕیوه.