گەشتێک

به‌کر ئه‌حمه‌د
18.6.1997
 

دەچمە شاری زستانەوە
وەک بەفر چاو لە ئاسمان و لە شار دەکەم.
دەچمە باخچەی بەهارەوە
وەک سەوزەگیا
لە ڕوخساری نەرمەباران ورددەبمەوە.
دەچمە گەڕەکی کزەبای پاییزەوە
وەکو گەڵا
چیرۆکی ئەو ڕۆژگارانەی لەسەر لق بووم
بۆ زەوی و با دەگێڕمەوە.
دەچمە کۆڵانی خۆرەتاوی هاوین و
وەکو سێبەر
لە چاونەترووکاندنی تیشکا، دەتوێمەوە.
ئەگەر ئێوەش
وەکو من بۆ ساتێک بەفر و
سەوزەگیا و
سێبەر و
گەڵا بووایەن
کڕێوەتان نەدەخستە ناو قەفەسی تاوانباری
نامەی ناڕەزایەتیتان، بۆ هیچ وەرزێک نەدەنووسی
لە ناو تاریکی زستانا
لە گیانەڵای گەڵاکانا
چەندین تابلۆی هێشتا بەچاو نەبینراوتان، دەبینییەوە.