لەڕاستیدا ئەوەی وایكرد دەستبدەمە پێنووسەكەم و بنووسم لەمەڕ وەها بابەتێكەوە، لەنێو چیرۆكێكی وەهادا، خودی مانا و تەكنیك و ئەو زمانە ئەدەبییە نەبوو، كەلەنێو دەستەواژە یادگارئامێزەكانیـدا هەستی پێدەكرێت، یاخود تێكڕای ئەو وێنە ئەدەبی و ئەو سەرەتا پڕ لە نائومێدییە نەبوو كەوایكرد خەیاڵە شیعریەكانی ئەندێشەم زیاتر و زیاتر گەشەبكات، لەڕووی گوزارشت و هەڵماڵینی ئەو چەقبەستووییە لەنێو دۆنمەكانی وێژەدا بوونی هەیە، بەڵكو یەكێك لەهەرە چەمكە ناسك و شەرمنەكانی بوو كەگەر بێتوو بە وردبینییەكی زیاترەوە تەماشای نەكەین، ڕەنگە نەتوانین پەی بەو جیهانە پڕ یاداشت و پڕ بیرەوەرییە ببەین، ڕەنگبێ‌ ئەسڵەن سەرسامانە لەڕوانگە و گۆشەنیگاكانی دیكەی چیرۆكەكەوە قسەبكەین، بەڵام دەكرێت هەموو ڕەهەندە فیكری و ئەدەبییەكانی وەلانێین و تەنها و تەنها وردبینەوە بەسەر وشە و ڕستە و گوزارە نهێنیەكانی نێو ڕووداوەكان، وردبینەوە و تێڕامێنین لەئاست تێكستێك كە دەكرێت وەك نەمرترین ئەو چیرۆكە قەشەنگانە داینێن كەدواون لەبارەی بیرەوەرییەوە و دواون لەجیهانێك كەوایكردووە مرۆڤەكان زیاتر پەلكێشی سۆز و مرۆڤدۆستی بكەن، جیهانێك تاهەنووكەش و ڕەنگە تاكۆتاییەكانی ژیان كاریگەر بێت لەسەر ئەقڵ و ئەندێشە و خەیاڵاتە سۆزاوییەكان، كاریگەربێت لەسەر كردار و ئەدگار و خاسیەتەكانی مرۆڤ، چونكە ئەوە بیرەوەرییە وادەكات ڕەوتی ژیان بەجۆرێك لەهیواوە بگوزەرێت، ئەوە خودی خەیاڵفروانی مرۆڤەكانە لەئاست یادگاریی و ڕووداوە تێپەڕەكانەوە كەدواجار سەرجەمی چیرۆك و ڕووداوەكان جۆرێكن لە بیرەوەری، جۆرێكن لەو چەمكەی هەندێكات بەبیركردنەوە لێیان وردوخاشمان دەكات، هەندێكات بەگەڕانەوە بۆ نێویان هەپرون هەپرونمان دەكات، بۆیە وادەزانم قسەكردن لەبارەی ئەو چەمكەی هەڵمانبژاردووە شتەهایەكی بێئەندازە و بێ‌ كۆتا لەخۆدەگرێت و دەكرێت هەر لەنێو ئەم فۆڕمەدا چەندان وردەكاری دیكەی بدۆزینەوە و هێندەی یەكتر گوزارشتی ئەدەبی و ئەقڵانی لەبارەوە بكەین، بەڵام دەگونجێت بەشێوەیەكی شیكاریانە و بەجۆرێكی ئەدەبییانە بدوێین لەسەر ڕەهەندێك لە ڕەهەندە گرنگەكانی نێو ئەو چیرۆكە، ڕەهەندێك كە خودی چیرۆكنووس زۆر بەتواناوە كاری لەسەر كردووە، زۆر بەوردبینییەوە توانیویەتی گوزارشتی ئەدەبی و فیكری خۆی بكات، كەهەر ئەو هێز و زمانە تەواو پڕ بیرەوەرییە وایكرد هەوڵبدەم لەبارەیەوە بنووسم لەبارەی تەنها (بیرەوەرییەوە).
 
چیرۆكنووس هەر كەمێك دوای دەسپێك بەزمانێكی یەكجار قوڵی یادگارئامێز و ئاماژەی ئەدەبییەوە دەڵێت:"جاران پێش ئەوەی سەرەتان بگرێ‌، ئەگەرچی بە تەمانا چووبوو، ڕاحەت سەرەو خوار و دەرە و ژووری دەكرد. كاتی بەتاڵ، بەشێكی زۆری ئەركی ماڵەكەی خستبووە ئەستۆی. بەڵام ئەرك نەبوو!"، لێرەوەیە سەرەتای قوڵبوونەوەكان بەنێو دونیای پەنها و جیهانی بیرەوەریدا، لێرەوەیە ئەو سەرەتایەی كە ڕۆچوونێك وونمان دەكات لەكۆتایی چیرۆكەكەوە نەتوانین بڕوا بەوە بهێنین، كەئەمە تەنها چیرۆكێك نیە، بەڵكو داستانێكە لەبارەی بیرەوەرییەكی كوشندەوە نووسراوە، لەبارەی ڕووداوگەلێكەوە دەدوێت كە مرۆڤەكان تووشی چەندین ڕاڕایی و دوودڵی دەكات، وادەكات دواتر قوڵتر لەجاران بیربكەینەوە، فراوانتر لە ڕابردوو بیر لە یادەورەییەكان بكەینەوە،...، هەر كەمێك دواتر و بەشێوەیەكی ڕوونتر لە دەسپێك، وەڵامی ئەوەمان دەداتەوە كە خودی ئەو كاراكتەرەی بەشێكی زۆری ئەركی ماڵەكەی خستبووە ئەستۆی و بەڵام دەشڵێت ئەرك نەبوو، وەڵاممان دەداتەوە بەشێوەیەكی سادە، كە وایكردووە ئەم سادەییە زۆر گرنگ بێت، چونكە هەستی خوێنەر فریودەدات و ناهێڵێت لەو هاوسەنگییە بترازێت كەلەنێو دەستەواژە سەرەتاییەكانی چیرۆكەكەدا هەیە، چیرۆكنووس دەبێتە وەڵامگۆی ئەو گرێ‌ كورتەی هەر لەسەرەتاوە خستییە ڕوو، ئەو دەڵێت:"خانووەكە گەورە بوو و لە باوكیەوە بۆی مابووەوە. بیرەوەرییەكانی باوكی و ئەو چەند ساڵە كەمەی كە لەگەڵ مێردەكەی لێرە بەسەری بردبوو، بەخۆیەوە مەشغوڵی دەكردن."، لەپاش ئەوەی وەڵامی وێنە پرسیارئامێزەكە دەخاتەڕوو، هاوكات جۆرێك لە كرانەوەی بیرەوەری هەیە و وادەكات كەمێك لەو ڕەهەندە چڕوپڕە ئاشكرابێت، وادەكات ئەو دەروازانە بكرێنەوە كە لەمەودای دواتری چیرۆكەكەدا بەتەواوی دێنە بەرهەم، بەڵام لەدوای ئەو نیمچە پرسیار و گرێیە، بەچنینێكی تەواو ئەدەبییەوە دەڵێت:"هەموو شوێنێك سیمای باوكی و دەنگ و ڕەنگی مێردەكەی بوو، كە لە ناكاو ڕۆژێك لە ڕۆژەكانی زستان مردن بردبووی."، تا ئێرا زۆر شت بۆنی ڕوونبوونەوەی ڕاستەوخۆی لێ دێ‌، كە دواتر تێدەگەین لەوەها تێكستێكی ئەدەبیدا بیرەوەری بەچ شێوەیەكی جوان و نەرم مامەڵەی لەگەڵداكراوە، تێدەگەین خودی چیرۆكنووس بەچ شێوەیەكی بێ‌ ئەندازە قوڵبۆتەوە لەنێو دونیای بیرەوەری و ڕووداوە بەسەرچووەكاندا، لەگەڵ هەموو ئەمانەشدا خەیاڵفراوانی لەگێڕانەوە و بە واقیعیەتكردنی هەیكەلی چیرۆكەكە...، لەڕاستیدا وادەزانم قسەكردن لەسەر تەكنیك و هونەری نووسینی چیرۆك بۆمن گرنگ نیە، هەرچەندە تێرو تەسەلی چیرۆكەكە بارگاوییە بەو فاكتەر و هۆیانەوە، بەڵام خۆ ئێمە لەسەرەتاوە بڕیارمانداوە لەمەڕ كام شتەوە دەنووسین، بۆیە زۆر گرنگە لە بابەتیبوون و شیكاركردنی هەڵبژێردراوی نووسینەكە لانەدەین، كەئەویش (بیرەوەرییە).
 
چیرۆكنووس كەكاتێك دێتە سەر ئەوەی باس لەهەندێك پرسیاری لۆژیكی بكات، لەبەرئەوەی وەك بۆشاییەك لەنێو لایەنەكانی دیكەی چیرۆكەكەیدا درووست نەبێت، دێت و دەڵێت:"سەرەتا هەستی كردبوو ناتوانێ چیدی لەم خانووەدا بژی، بەڵام دواتر زانی كە ئەم خانووە تەنیا شوێنێكە كە ڕۆیشتووەكان بۆ هەمیشە بەجێی ناهێڵن."، لەم كاتەدا ڕاستەوخۆ دوو ڕوانگە دێنە پێشەوە كەهەریەكەیان خاوەنی گرنگی تایبەت بەخۆیانن، ئەویش ئەوەیە كە چیرۆكنووس هاتووە ئەم پرسیار و وەڵامەی یان ئەم گرێ‌ و كرانەوەیەی وەك بەئەقڵانیكردنی چیرۆكەكەی بەكارهێناوە، هاوكات جارێكی دیكە و بە دیدێكی دیكەوە هاتووە ئیشی لەسەر پیرۆزی بیرەوەری كردووە، چونكە خودی كاراكتەرە سەرەكییەكە گەیشتۆتە ئەو بڕوایەی كە تەنها جێگایەك بۆ گەڕانەوەی ڕۆح و بیرەوەری ئازیزانی تەنها و تەنها ئەو خانووەیە، بۆیە دواتر دەڵێت:"مابووەوە. مابووەوە و بەدێژایی ئەو ساڵانە فێر بووبوو كە چۆن بیرەوەرییەكانی هەڵگرێ‌ و ونیان نەكا."، لێرەشدا جارێكی دیكە و وەك یاسایەكی نووسینی چیرۆك، بەشێوەی درووستكردنی گرێ و لەپاشاندا كرانەوەی، دێتەوە هەڵماڵینی زیاتری نهێنی چیرۆكەكە، لەم كاتەدا و بەخوێندنەوەی ئەو ڕستانەی سەرەوە كە بەنموونە هێناومانەتەوە ئەو پرسیارە دێتە كایەوە كە دەبێت بیرەوەی هێندە باسی لێوەكراوە، ئەسڵەن لەبەرچییە؟، یاخود كوا كەرەستەیەكی بەهێز بۆ ڕاستتركردنی بابەتی بیرەوەری لەنێو چیرۆكەكەدا؟، بەڵام زۆر نابات و چیرۆكنووس لەنێو دەستەواژە پڕ یادەوەرییەكاندا، وەڵامی ئامادەكراوی هەیە و باس لەیەكێك لەهەرە كەرەستە بەهێزەكانی بیرەوەری دەكات، كەتیایدا هاتووە و دەڵێت:"یەكێك لەو شوێنانە سندووقێكی گچكەی دارینە بوو كە هەموو نامەكانی سەردەمی منداڵی، كاتێك باوكی بۆی نووسیبوون، تێیدا هەڵیگرتبوون."، ئەم دەربڕینە بەجۆرێكە كە خودی چیرۆكنووس وەك زانیاری لەمەڕ ڕووداوەكانەوە داویەتی، و باس لەیەكێك لە كەرەستەی بیرەورییەكانی دەكات، كە سەرجەم نامەكانی سەردەمی منداڵی لەخۆگرتووە.
 
چیرۆكنووس لەدوای ئەوەی یەكێك لە كەرستەكانی بیرەوەری ئاشكراكرد، زۆر نابات دێتە سەر هەنووكەی ڕووداوەكان و دەڵێت:"ئەوانەی لە خەستەخانەوە دەهاتن، ڕۆژانە بۆ چەند سەعاتێك لەسەر كورسیەك لە ژووری دانیشتنەكە بە تەنیشت مێزێكەوە كە پڕ بوو لە كتێب و وێنە و دەفتەر و قەڵەم و شتی دیكە، بەجێیان دەهێشت. سندووقە گچكەش هەر لەوێدا بوو. لەناو یەكێك لە ڕەفەكاندا. ئەو رەفەی كە هەمیشە ئەوكاتەی باوكی زیندوو بوو، شمەكی وەك پاكەتە جگەرە و شتی دیكەی لەم بابەتەی تێ‌ دەهاویشت". 
 
دواتر و لەپاش ئەوەی بەشێكی زۆر لە كەرەستە و نهێنی بیرەوەرییەكان ئاشكرا دەبێت، زۆر نابات دێتە سەرئەوەی كە یەكێك لەهەرە زیندووترین و بەبایەخترین بیرەوەری بەنموونە بهێنێتەوە و بەتەواوی چیرۆكەكە بارگاوی بكات بە چەمكێكی گرنگ كە بیرەوەرییە، یاخود ئەگەر لەوەوپێشی چیرۆكەكە بیرەوەری تیادا كاڵ دەركەوتووە، یان لەژێر پەردەیەكی ئاماژاوییەوە بووە، ئەوا لەوكاتەی كەدێتە سەر باسكردنی نموونەیەكی تەواو بیرەوەریئامێز، ئیدی ڕەوینەوەی گومانەكان دەستپێدەكات و بڕواهێنانێكی سەپێنراو دێتەكایەوە، چونكە ئەوەتا چیرۆكنووس بەشێوەیەكی هێندە ئەدەبی و بیرەوەریانە باسی كردووە، كەناكرێت نەمانبات بەرەو مەملەكەتەكانی یادگاری و بەرەو دەڤەر و بیابانەكانی بیرەوەری، ئەوەتا دەڵێت:"یەكێك لەو نامانەی كە باوكی بۆی نووسیبوو، نامەیەكی كاتی شەڕ بوو. ئەو كاتەی كە ئەڵمانییەكان وڵاتیان داگیر كردبوو و باوكی هەڵاتبوو و لە بریتانیاوە بەشداری ئەو چالاكیانەی دەكرد كە بە دژی نازییەكان بەڕێوە دەچوون. ئەم نامەیە لەلای یەكجار خۆشەویست بوو. نامەیەكی یەك لاپەڕەیی كە ئێستا كات پیری كردبوو. ئەو كاتەی ئەم نامەیەی پێ گەیشت، دوانزە ساڵی تەمەن بوو. نازداری باوكی بوو."، ئای ئەوە ساتگەلێكە كە خودی بیرەوەری قوڵبووەتەوە لەنێو ئەو جیهانە گەورەیەی سازیداوە، قوڵبووتەوە لەنێو ئەو یاریانەی دەیهێنێتەوە بۆ ئەندێشەی خوێنەر و بۆ فراوانی بیركردنەوە...، بەڵام لەگەڵ هەموو ئەمانەشدا تراژیدیایەكی تەمومژاوی دیارە، كە دەكرێت ناوی بنێین (هەیكەلی چیرۆكەكە) و سەرجەم كەرەستە و دەربڕینە فیكرییەكانی پێوەبەندە، هاوكات دەبێت باس لەو چنین و ئاسانبێژەیەش بكەین كە چیرۆكنووس بە تەكنیكێكی زۆر نایاب بەكاریهێناوە، یاخود گەر ڕوونتربڵێین چیرۆكنووس هاتووە بەبێ‌ ئەوەی هیچ گرانییەك و نائارامی و هیچ نامۆییەكی تێدابێت، ئاشنای زۆر شتمان دەكات، دەمانناسێنێت بەو ڕۆژگارانەی جەنگ، ئاشنای ئەو سەردەم و شوێنانەمان دەكات كە ڕووداو و تێكڕای چیرۆكەكەی تیادا درووست بووە.
 
چیرۆكنووس لەبەشێكی نوێ‌ و لە پەسنكردنی منداڵی كاراكتەرە سەرەكییەكە و ئەدگار و خوڕەوشتەكاندا، دێت و بەشێوەیەكی خێرا ئاشنایەتییەكی تەواومان دەداتێ‌ لەمەڕ ئەو پەیوەندییەی كەلەنێوان كاراكتەرە سەرەكییەكە و باوكیدا هەبووە، چونكە ئەوەتا دەڵێ‌:"كە نەخۆش دەكەوت دەبا حەتمەن باوكی بە دیارییەوە بێت و لە گەڵیا بخەوێ‌. باوكی متمانەی پێ‌ دەبەخشی."، لێرەدا تێدەگەین پەیوەندی لەگەڵ باوكیدا جۆرێك لە پیرۆزی و سەرچاوەیی تێدادیارە، چونكە ئەوەتا لەپەرەگرافێكی دیكەدا هاتووە و دەڵێت:"ئەو ڕۆژەی دكتۆر پێی گوتبوو شێرپەنجەیەتی، نەئاڵۆزكابوو. وەك عادەتی جاران هەستی كردبوو مادام كە باوكی بەدەورەوەیە  گرنگ نیە، چاك دەبێتەوە."، لێرەدا گەورەترین هێوا و بەهێزترین ئیرادە و بڕوابەخۆبوون و یان بڕوا بەهێزێك یاخود بڕواهێنانێكی عاشقانە لەئاست ئەو متمانەیەی كە بە باوكی هەی بووە، بەڵام كەمێك دواتر و لەگەڵ دەركەوتنی وشە و دەستەواژەكانی دیكەدا چەند وەڵامێكی سەیر سەیر دێنە كایەوە...، هەروەك لە چیرۆكەكەدا هاتووە:"كەچی لەسەر ڕێی ماڵەوە بە دیتنی تاقە دارە پیرەكەی ناو حەوشێ‌، كەلەكاتی مردنی باوكیدا هێشتا نامامێك بوو، هاتبووەوە بیری كە باوكی لەمێژە نەماوە. ترسێكی سەیر دایگرتبوو. ئارام بەبێ‌ ئەوەی ئەوانی تر بزانن چووبووە ژوورەكەی خۆی و بۆ ماوەیەكی درێژ گریابوو.".
 
لەپاش ئەوەی ناتوانێت بەو هەستەوە بژی كە باوكی نەمردبێت، ئیدی هیوا و ئومێد لەلای وەك وێرانەیەكی خامۆش دێتە پێشچاو، ئیدی دەبێت چاوەڕوانی هەواڵی لەناكا و هەژێنراو بین، چونكە لەو چەند ڕستەی سەرەوەدا بەتەواوی زمانێكی یەكجار ئاماژاوی باس لە دواترێكی تراژیدی دەكات، باس لە ڕووداوگەلێك دەكات بەڕاستی وادەكات هەموو چەشنە بیرەوەرییەكمان خۆشبووێت...، چونكە لەنێو كۆتاییەكانی چیرۆكەكەدا دیارە و نووسراوە:"ئتر لەو ڕۆژەوە هەموو شتێك گۆڕا. زۆر خێرا داهێزراو لە ناو جێگادا بۆ هەمیشە كەوت. شتێكی خڕ لەناو سكیا تادەهات گەورەتر دەبوو. وەها وەك تۆپێك. نا، وەك منداڵێك، منداڵی مەرگ!"، ئەو دەمرێت و كۆڵێك بیرەوەری لەگەڵ خۆیدادەبات، دەمرێت و مانا و دیدی نوێ‌ پەیدادەكات بۆ بیرەوەری...، چیرۆكنووس لەو چیرۆكەوە ئاشنامان دەكات بەوەی كەتەنها بۆ شتێك بژین ئەویش بیرەوەرییە، پێماندەڵێت دەبێت ژیان چی بێت جگە لەچەند بیرەوەرییەكی كوشندە زیاتر، چونكە بەشێوەیەكی گشتی سەرجەمی بیرەوەرییەكان كوشندەن...كوشندە.
 
لەكۆتا پەرەگرافی چیرۆكەكەدا گەر وردبینەوە بەشێوەیەكی زۆر نائومێدانە كۆتا گوزارشتی نووسەر دەبینین لەمەڕ كاراكتەرە سەرەكییەكە و ئەو نامەیەش كە وەك بەشێك لە چیرۆكەكە گرێدراوە و تیایدا هاتووە و دەڵێت:"ئەو ڕۆژەیش كە بۆ شەوەكەی مرد، كاتێك بۆ دواجار لە ژووری دانیشتنەكە بە تەنیا دایاننابوو، نامەكەی باوكی خوێندبووەوە. ئەو نامەیەی بۆنی دەریا، با و كەشتی لێ‌ دەهات. نامەكە قەد كرابوو. ئارام وەك هەمیشە بۆ ئەوەی هەڵنەوەرێ‌، كردبوویەوە. وشەكان و رستەكان لە ئامێزی باوكی دەچوون، ئەو كاتانەی لە ژان و لە سەرمانا هەڵدەلەرزی و لە بەستێنی گەرمیا ئارامی دەگرت:"، لەدوای دڵنیابوون و گەیشتن بەكۆتایی ڕووداوە هەنووكەییەكان، واتە لەدوای مەرگی كاراكتەرە سەرەكییەكە، ئیدی ڕەوتی ژیانكردنیش دەمرێت و لەگەڵ خۆیدا چیرۆكەكە دەوەستێنێت، بەڵام ئەوەی مابێتەوە ئەو نامەیە كە وەك گەورەترین كەرەستەكانی بیرەوەری بەكارهێنراوە، چونكە وشە بە وشە و دێڕ بە دێڕی بۆنی بیرەوەری و قاڵبوونەوەی لێ‌ دێ‌، بۆنی ڕۆژانی پڕ شادوومانی و پڕ لەجوانی لێ‌ دێ‌...، تەواوی ئەو نامەیە جۆرێكە لە بیرەوەری و بەشێكە لە زیندووی و پیرۆزی یادگاریی، یاخود ڕاستە گەر بڵێین بەتەنها ئەو نامەیە بەسە بۆ ئەوەی ئەم چیرۆكە والێبكات كە سەرڕێژبێت لە بیرەوەری و لێوانلێوبێت لە یاداشت، لە ڕۆژە جوانەكان، لە ڕۆژانی منداڵی.
سەرەتای ئەو نامەیەی كەلە چیرۆكەكەدا هاتووە، بەجۆرێكە كە تێدەگەین بۆنی نەمری و بۆنی بێ‌ كۆتایی لێ دێ‌، چونكە بەم شێوەیە دەستی پێكردووە:"كچم! ئێستا كە ئەم نامەیەت بۆ دەنووسم، لەگەڵ هاوڕێكانم لەسەر عەرشەی كەشتییەكە دانیشتووین و قسەدەكەین. ئاسمانێكی ساماڵە و هەتاوێكی گەش و دەریایەكی ئارام."، دواتر و لە بەشێكی دیكەی نامەكەدا هاتووە:"دەریا بیری ئەو رۆژانەم دەخاتەوە كە پێكەوە دوانیوەڕۆیان دەچووین بۆ قەراخ دەریا. هیچ كاتێكی ئەم ڕۆژە دژوارانە تۆم لە بەرچاو ون نەبووە."، لەڕاستیدا سەرجەمەی نامەكە بەشێوەیەكی زۆر ئەدەبیانە و زۆر بیرەوەریانە نووسراوە و ناكرێت لەوەها نووسینێكدا سەرجەمی بنووسینەوە، بەڵام بەگشتی نامەیەكە سەرڕێژە لە بیرەوەری و پڕیەتی لە وێنەی شیعری و وادەكات كاریگەربێت لەسەر دەروون و ڕۆحی خوێنەر، هاوكات وادەزانم لەوەها چیرۆكێكدا پڕواوپڕ گونجاوە، یاخود دەكرێت بڵێن ئەو نامەیە تەواوكەی چیرۆكەكەیە.
 
كۆتا شتێك كە بەبڕوانی من هێندەی هەموو نامە و چیرۆكەكەش كاریگەری دەروونی و بیرەوەریانەی هەیە، تەنها چەند ژمارەیەك و ناوێكی سادە و ساكارە، كەلە كۆتایی نامەكەوە هاتووە، ئەویش ئەو بەروار و ناونیشانەیە كەلە یاسای نووسینی هەموو نامەیەكدا گرنگە هەبێت، وە لە كۆتایی ئەو نامەیەشدا هەیە و بەم شێوەیە نووسراوە: 
"باوكت"
19,7,1943
 
لێرەدا نامەكە بەكۆتا دەگات و ئەوەی دەمێنێتەوە بیرەوەرییە و قەد لەبیرناكرێت، ئەوەی لەبیرناكرێت بیرەوەرییە و قەد نامرێت، چونكە ئەوەتا چیرۆكنووس لەكۆتا دێڕەكانی چیرۆكەكەیدا، دەڵێت:" ئەو شەوە زیاتر لە هەر كاتێكی دی لە ئامێزی باوكیا بوو. سەری سپی و لەشی وێك هاتوو و وشكی كۆ دەكردەوە و بۆیەكەم جار دوای ئەو هەموو ساڵە بۆنی ژێر مل و كاكۆڵەكانی باوكی دیسان هەڵمژییەوە.". 
لەكۆتایدا خوازیارم توانیبێتم شتێكم لەمەڕ بیرەوەری و لەئاست چیرۆكەكەوە گوتبێت، كەتێكڕای چیرۆكەكە سەرڕێژە لە بیرەوەری و پڕە لە وێنای ئەدەبی و یادگارئامێز...، كە دیسانەوە دەیڵێم ئەوەی وایكرد لەم بارەیەوە بنووسم، تەنها و تەنها چەمكی بیرەوەری بوو لەنێو جیهانی پەنهان و ئاماژەی چیرۆكەكەدا. 
 
....................................
- بۆئەم نووسینە تەنها سوودم لە چیرۆكی(نامە) وەرگرتووە، كەلە كۆمەڵە چیرۆكی ئێوارەی شاری فەڕوخ نیعمەتپوورـدایە.
- تێبینی: سەرجەم ئەو دەستەواژانەی لەنێو كەوانەكاندان لەخودی چیرۆكەكەوە وەرمگرتووە، واتە چیرۆكی (نامە).
- ئەم لێكۆڵینەوەیە لە ژمارە(66)ی گۆڤاری(هەنار)دا بڵاوكراوەتەوە.