بە "سالار توتمانی " پێشكەشە
پەیڤێكی نهێنی لە دەرەوەی ئەم چیرۆكە ...
ئەم چیرۆكە بۆ خۆت بخوێنەوە و پیشانی هیچ كەسی مەدە. بۆ من ئاساییە بۆ تۆ ناگونجێ و خراپ دەشكێتەوە، ناوی من "میریدا"یە تەمەن و ڕەگەزی خۆم نازانم، تا ئێستا خۆم ڕووت نەكردووەتەوە جلێكی هێجگار ئەستور و قەبە، بەردەوام لەبەرمدایە ئەمەش بەهۆی ئەو ڕوودوانەی لە ژیانم ڕوو ئەدات بێزاری كردووم. هەڵدێم لەخەو و لە بێداری، كەیفساز نیم بە هیچ كامیان، مژۆڵی ڕووداوی دووبارەی ژیانمم. گەر پێشنیوەڕۆیەك مرۆیەك ببینم و سڵاوێكی لێ بكەم شەویش بەهەمان شێوە و لەهەمان شوێن شتێك ڕوو ئەدات، گەر سڵاونەكردنیش بێ لە بیست و چوار كاتژمێردا، دوانزە ی (A.m)، هەرچی ڕووبدات لێم بەدرێژایی دوانزە كاتژمێری (P.m ) هەمان شت ڕوو دەدات تەنها كاتژمێرەكان وەك یەك وان ڕووداوەكان جودان، كاتژمێر سێی نیوەڕۆ باپیرەكەك وتی كاتژمێر چەندە؟ كاتژمێر سێی شەو لە خەو لە هەمان شەقام ڕابووم دەبینم كاتژمێر سێیە و چاوەڕێ بووم ئێستا نا ئێستا باپیرە دەردەكەوێ و دەڵێ كاتژمێر چەندە، لێ نەهات و من ڕۆشتمەوە، ناوێرم بیجامە یان بە شۆرت و فانیلەی بێ قۆڵەوە بنووم دەبێ ڕەچاوی چوونە دەرەوەی بێ ئاگای شەوانەم بكەم لە بارێكی گونجاو بم.
بەدروستی كاتژمێر 10 : 00 A.m
لەخەو ڕا دەبم، ژێرم تەڕە و لەكەنار دەریا یان لە ژێر تاوەبارانێك یان لافاوێك بە تەنیشتمدا تێپەڕیوە و لەپاڵیدا نووستبم وا دەردەكەوێ و هیچیان نییە، گەر بگەڕێی هێندی سەرەدەرزییەك وشكایی لەخوار كەمەرم نابینیتەوە، بۆێكی ناخۆش ژوورەكەی پڕكردووە، پێم شەرمە دەستێك بە ژێرمدا بكەم، بزانم ئەو لافاوە، ئەو تاوە بارانە، لەكوێی ئەم دیوار بەندییە هاتووەتە ژێر چرپاكەم، لەكوێ و چ كەنار دەریایەكدا بووە نوستووم، ئەو بۆنە لە زۆر بۆنی پاریسی و ئەمریكی ڕوونترە مەوداێك بۆ شەرم ناهێڵیتەوە، بەدیار دەكەوێ چركەساتێكی منداڵییە و ئێستا دووبارە بووتەوە، دەبێ ئاسایی بێ منداڵیت تێ پەڕاندبێ، دۆخێك جیاواز لە لێدانی دایك و سەرزەنیشتی باوك و تووڕەبوونی خوشكە تا هەڵخستنی چرپاكەت، هەموو پەیڤێكی ناشیرین و هەوڵدانیكی بۆ بچوككردنەوەی سایكۆیی كەسێتیت و بەدەمیدا بێ ڕووبدا.
11:6 A.m
لەبەر لاپتۆبەكە دانیشتووم، چوون باوكم هەوڵی داوە بێتە ئەمدیو، دایكم تاكە نەعلی تێگرتووم و هاورێكانیشم كلكە ماسیحە، شاشەكە درزی گەوەری تێبووە، ڕەش و مۆر دەچێتەوە، هیچ پیشان نادات .
8 : 00 A.m
هێندێ كتێبم لە بن هەنگڵ، كڵاوەكەم تا سەر برۆكانم هێناوە، دەنگێك ئەژنەڤم بێ ئەوەی بیبینم ئەزانم داپیرەمە، لەم ماڵە جگە لە من و ئەو كەسی دیكەی تێدا نییە دەڵێ "سەرقوڕاویی دیسان بۆكوێ؟ ئەتەوێ ئەمشەویش نەیەیتەوە؟ وەك موعتادەكان لەسەر جادە دەنوویت، لەداخی ئەم سەرە ڕۆییەیت، من ڕۆژێ سەرلوتی خۆم ڕەش دەكەم"، خەریكم لە دەرگەی كۆتایی و دەرچوون لەماڵ نێزیك دەبمەوە بەدەنگی بەرز دەڵێم "بۆ نەخۆشخانە یان بۆ شكایەت كردن لە بنكەی پۆلیس "
دەزانم شەو لەهەمان كاتژمێر كتوپڕ و ناكا و بەبێ ئاگابوون لێرە دەبم، چوون بۆ بنكەی پۆلیس دەخەمە داوانزە كاتژمێری دادێ، ڕێدەگرم بۆلای پزیشك لەوێ، لە ناباری خۆمدا لە هۆڵی چاوەڕوانی كلینیكی پزیشكەكەدا لەگەڵ كەسێك دەیكەمە شەڕ، جەنابی دكتۆر زوو دەمباتە ژوور، پیاوێكی كەر دیارە، چاویلكەیەكی تا سەر لووتی هێناوە، لە تەماتە فرۆش دەچێ نەك لە دكتۆری دەروونی، دەست بە ووشەوە دەگرێ و بە هێما دەپەیڤێ .
"من نەخۆشم یان ئەم كتێبانە؟ یان نووسەرەكانیان ؟ "
ڕێگە نادەم قسان بكات دیسان درێژەی پێدەدەمەوە
" یان من ئیحالەی نەخۆشخانەی دەروونی بكە یان نووسەری ئەم كتێبانە "
بەجۆرێك لە وشەكان تێ ناگا، وادەزانێ بەهەڵە خۆم بە كلینیكەكەیدا كردووە، گەمژە، گەمژە، لەگەڵ قسەكانیدا سەری بادەدات و دەڵێ " ئەو كتێبانە بخوێنەرەوە، بە ئیزنی خوا شیفات بۆ دێ " لەوە دەگەم لێم تێنەگەیشت، ئەو لە منیش و لە كتێبەكان نەخۆشترە .
3 : 00 A.m
دونیایەكی بێدەنگ ... شەوێكی جوانە، لەهەمان شوێنم دوانزە كاتژمێر لێی بووم، بە تەنیشت دیواری دادگەوە دێمە خوار، ماڵەوە دوورە تا بۆی بڕۆمەوە .. تا دەڕۆمەوە گەر سڵاوێك یان ڕوداوێك بێتە ڕێم دەبێ لە دوانزە كاتژمێری دادێ بێمەوە ئێرە، دەچمە باخی گشتی، دەستێك بەسەر هەرێزەكەدا دەهێنم بۆێكی خۆش تەڕو شێدارە، بەكەڵكی خواردن دێ، هەرچی شت هەیە بەكەڵك دێت من نەبێ " گەر ماڵت نەبێ بۆی بگەرێیتەوە و،لە كوڵانە سەگێكدا بژیت . ئاساییە گەڵای ئەم درەختانەی لەگەڵ بخۆیت، سەرم شۆڕ كردووەتەوە ناو كۆشم، خەریكە ڕۆژ دەبێتەوە، سەگێك پێم دەوەڕێ، سەر هەڵدەبڕم بەدەست خانمێكەوەیە، دووری دەخاتەوە لێم، وە دووی خۆی دەكات ... تا لەچاوم وون دەبێ، دەوەستم بێ جوڵە و، چاوم لەسەری ناتروكێ دێڕیكی ئۆگۆست ستریندبێرگم دەكەوێتەوە یاد "خۆزگە سەگی كەسێك بوومایە و دوای بكەوتمایە، بۆ ئەوەی قەت بە تەنیا نەمێنمەوە، جار نا جارێك نەختێك خواردن، جار و بار شەقێك، جار نا جارێكیش دەست پێدا هێنان و دووجاریش قامچی "
خۆزگەێك یان تۆزێك كەیف پێویستە هەبێ، بۆ درێژە پێدان بە پێوەندییەكی كۆمەڵایەتی، یان بۆ نووستوون لەپاڵ ڕەگەزێكی بەرامبەر، یانژی دانیشتن لە دەوری خوانێك من نیمە، كەواتە تەواو . ئەویش لەدەماغمدا دێت و دەچێ خەریكە دەهریم دەكا، لەو جۆرە ئەندێشە ئەگەڕێم و خەریكم دەگەڕێمەوە، ماندووم لەگەڵیشی برسیمە، تینوومە و، دەبەێك ئاوم پێیە ئەی بۆ نایخۆمەوە و، تا تێنوم نەبێ ... ئاوەكە گەرمە كەڵكی تێنو شكاندنی نییە، دەچمە دواوەی پاسەكە شۆفێرەكە نا، ئەو پیاوەی پارە كۆ ئەكاتەوە تەماشای من ئەكات، بە جۆرێك وادەزانێ من لە مرۆڤێكی باش، زۆر ماقول ئەچم دەڵێ "بەڕێز ئەوە لەو جێگەیە هەڵدەسی تا ئەو عایلەیە دانیشن ..."
هەموو ئەو بۆچوونە باشانەی كابرا لە ڕووكەشدا لەسەر من بۆی دروست بووە، پێچەوانە دەكەمەوە و دەڵێم "من ناتوانم ئینسانێكی ئەوەندە باشبم تا جێگەی خۆم بەوان بدەم"
من نەباشم نە مرۆڤێكی باشم .
بەدروستی كاتژمێر 10 : 00 P.m
خەریكم هەستم، وەك لەزگەێكی بەهێزگرتبمی لە جێگە نوێنەكەم نابمەوە، خەو بەری نەداوم، دوانزە كاتژمێرە ژێرم تەڕە . دەمەوێ هێندێكی دیكە سەر بە ژێر بەتانییەكەمدا بكەمەوە تەڕی و بۆنی پیس ڕێگە نادا، گەر خۆم نەبم هەركەس ئەو بۆنەی لێبێ هەردوو كونە كەپووم بە چیمەنتۆ پڕ ئەكەمەوە، تا بتوانم دووری لێ ئەگرم، چرپاكە هەڵدەگرم، بەخێرایی فرتە ئەكەم بۆ سەربان بە تەنافەكەیدا ئەدەم، دێمەوە ژوور، لاپتۆبەكە دا ئەگیرسێنم، ئەمەوێ نامەیەكت بۆ بنووسم و ڕووداوەكە سادە بكەمەوە، لەگەڵیشی هێندێك پێبكەنم " خۆشە گەر جار، جار، بە میزبەخۆداكردنێكیش بێ بگەڕێیتەوە بۆ منداڵی " بۆم نانوسرێ، پەنجەكانم لەسەر پیتی لاپتۆبەكە خۆی ڕاناگرێ، ووشەكان تێكەڵئ ئەبن، هیچیان لێ دەرناچێ، دەترسێم بەهەڵە شتێكی دی دەربارەی " ئەو خوخدە خراپەتەوە بنووسم بە تیڤی یەكەوە گرتووتە، كە ئامادەیت بەدیار درامایەكەوە بمریت، تا دەرگە نەچیت و تەماشای سندوقی پۆستەكە نەكەیت، بزانیت نامەی منی تێدایە بۆ تۆ یان نا... " چی دەكەیت ؟ قامكم هەر ئەو ووشانە دەزانێ بنووسێ ... بەم مانگی تەممووزە لەرز دایگرتووم، فێنككەرەوەكە خامۆش دەكەم، چاكەت و بلوسێكی ئەستوور بەسەر جلە ئەستورەكانی بەرمدا ئەكەم، بە بەتانییەكەوە دەچمە بەلەكۆنەكە، بە چیچكانەوە وەك پیرە مرۆڤێكی ئیماندار"حی اللە" دەكات خۆم بە پشت و پاشدا ئەخەم، چۆقە چۆقی ددانم حەوت گەڕەك نا، یەك دوو كۆڵان ئەولاتری خۆمان ئەڕوا و چاوەڕێ ئەكەم بێن، لەدەرگە بدەن و بەم شەوە بەئاگایان بهێنم و بڵێن "ئەوە چ هەرایەكە لەسەربانی ئێوە؟ "
11:6 P.m
لەئەنجامی ئەو سوڕانەوە بێ هەژمارەی زەوی دەگەڵ خزم و ئاشنایانم لێك دووركەوتینەوە، لێ دەگەڵ دروست بوونی ئەو حەمكە شاشە بێ هەژمارە توانیومە، مامم لە ئەڵمانیا، خاڵۆم لە بەریتانیا، كوڕی پورم لەپرتوگال، كچی مام لە ئەرجەنتین، باوكم لە كەنەدا، دایكم لە ڕووسیا و، هاوڕێكانم لەم وڵاتانەی دەرووبەر بدۆزمەوە، شەوانە لە ڕێگەی شاشەوە دەردەكەوین و دەپەیڤین، لەوەتەی شاشە كۆی كردووینەتەوە ناكۆكییەكان زیاد بووە، دڵمان لەیەك پیسە و لەناو خۆمان لەسەر میراتی دەبێ بەشەڕ، هیچ دەركەوتنێك نییە بێ دەمەقاڵێ و، قسە هەڵبەستن بۆیەك و، گێڕانەوەی لای یەكێكی دیمان. شەوێك تێ ناپەڕێ جنێو بە مامم نەدەم، میلی دەمانچە لە خاڵۆم دەهێنمەوە، ڕووە و كچە پورم دەیچركێنم، هەزار چووك بە قوونی كوڕی مام دەنێرم، باوكم دەیەوێ لە شاشەكەوە بۆم بێتە ئەمدیوو، دایكم لە دوورەوە تاكە نەعلم تێ دەگرێ، هاوڕێكانیشم دار ماسیحەم بۆ هەڵدەگرن لێم بدەن . دەبینم شاشەیە بۆ حیكەمەتەكانی ستایشی ئەكەم كە ڕێگە نادا دەستی ئەوانم پێ بگات، ئۆخژەنێك دەكەم . سوێند دەخۆم داهۆڵێك سەد هێندە لە مرۆڤی بەر شاشە چاترە . ئێمە شاشە كۆیكردوینەتەوە، ئێَمە ... "كۆ"یــَكی ناكۆكین .
8 : 00 P.m
بەرەوە بنكەی پۆلس رێم گرت، خەریكم سكاڵای یاسایی تۆمار ئەكەم ئەفسەری لێكۆڵەر گوێم لێدەگرێ " قوربان ... یان من لە بەندێ بكەن، یان نووسەری ئەم كتێبانە، بە جۆرێك ژیانی منیان تێك نەداوە، گۆڕیوە بە جۆرێكی زۆر خراپ " زۆر بەهێواشی خەریكە ناوەكانیانم لێوەر دەگرێت و لەگەڵ نووسینیاندا دەڵێ " بەخوا ڕاست دەفەرمووی ئێمەیش گیرۆدەی دەستی ئەمانەین " .
ئۆخژەنێك دەكەم و بە خۆم دەڵێم ئەمیش دەیانناسێ پێدەچێ خوێنەرێكی باش بێ، درێژەی پێدەدات " ئا ڕامبۆ ... ئەو هەتیوە چەقۆ وەشێنە پێ پەتییەكەیە، كەس نازانێ كێ خاوەنییەتی، ڕۆژ نییە لەگەڵ چەند كەسێك بەشەڕ نەیت، كافكا كوڕە گەنجەكە هەموو ڕۆژێ شارەوانی خۆی و شمەكە هەڕاجییەكانی ڕاو دەنێ، دۆستۆیڤسكی ئەوە پیاوە پیرە پاقلە فرۆشەكەیە باشە مرۆڤێكی بێ وەیە دەبێ چی كردبێ؟"، " قوربان زۆر شتی كردووە.. " .
قەڵەمەكەی مرەكەبی تێدا نامێنێ، چەند جارێك بە مێزەكەیدا دەكێشێ، داوا دەكات بۆی بگۆڕن ڕوو دەكاتە من و دەڵێ فەرموون ئەوانی دیكە كێن، لەگەڵ ناوهێنانی ئەوانی دیكە دیسان لەبەر خۆیەوە قسان دەكا "بۆرخیس .. ئایی لەم پیرە هەتیو بازە، بەخوا دەبێ دار لە قونی ببڕم، تەمبێی بكەم بۆت . ماركیز .. ئەوە پیاوە فیعل چییەكەیە، لەگەڵ سەدان ئافرەت سێكسی كردووە، دەبێ بە گوون هەڵیواسم بۆت . سادقی هیدایەت ... سەر با ئەدات و" ئاهــ ێك دەكات.. لەمێژە بە شوێن ئەم تلیاك كێشەدا دەگەرێم، بیگرم دەبێ كارەبا لە زووبانی بدەم ".
دەست دەخاتە سەر شانی من و دەڵێ " ئێوە ئێستا دەتوانن بڕۆن .. بەڵێن بێت سەرجەمیان بهێنمە ئێرە و پشتیان بشكێنم ئەمانە چۆن دەتوانن تەداخولی ژیانی خەڵك بكەن "سوپاسگوزاری ئەفسەرەكە دەبم و دێمە دەرەوە .
3 : 00 P.m
لە تەنیشت دیواری دادگەوە دێمە خوارێ بە هەركەس دەگەم
"سڵاو .. بێ ئەرك .. موو هەڵكێشت پێیە ؟ "
" تێكچوویت ؟ "
ئەو پەیڤانەی دادوەر لە زاری دەهاتنە دەر لەناو گوێم ماوەتەوە و ئازارم ئەدات، دادگە شوێنێكە تەنها بۆ جیابوونەوە، بۆ گرێبەستی پێكەوبوون نابێ، ئێمە ماویەكی زۆر پێكەوە بووین، بێ ڕەزامەندی هیچ نووسراو، دادوەرێك بوو . ئێستا چاترە بێ هیچ نووسراوێك لێك جیا بینەوە و، منت خۆشنەوێ چوون ناتوانم باوكی منداڵت و، هاوسەرت بم بەهۆی ئەو ئازارە زۆرەی هەمە، شەوان لە ناو چرپاكەم خۆم ناگرم دەست و قاچەكانم بە هەرچوار لا دەوەشێنم، گەر بێت و لەتەنیشتم بیت زەبرێك بەر سكت دەكەوێ، زیان بە دووگیانییەكەت دەگەیەنێ، دەبینە بكوژی كۆرپەیەك ئەوكات لێك جیا دەبینەوە، چاتر وایە لە ئێستاوە لێك جیابین، سەرقاڵبوون بە نووسین و خوێندنەوە ئەوەی باشە گیرۆدەی بوویت، تا ئەبەد ئازارت ئەبێ، بەو هۆكارەیش ناتوانی ببیت بە باوكی هیچ منداڵێ، هاوسەری هیچ ڕەگەزێكی بەرامبەر، ئەتوانم هاوڕێت بم ... دوور و دۆست سڵاوێك لەنێوانمان هەبێ، لەكاتی سێو پاككردن ئەودەمەی قامكی خۆم دەبڕم، خوێنی لێ دەتكێ تۆم بیر بكەوێتەوە و تەلەفونت بۆ بكەم و بڵێم " ئیستا یش وەك جاران خۆشت دەوێم ؟ منداڵەكەی ناو سكت ماوە "
تەلەفونەكە دادەخەمەوە و بیرم دەچێ پێت بڵێم :- ئۆهــ چەند گرانە باوك بیت وەك باوكی من !
دووەم پەیڤی نهێنی لە ناوەڕۆكی چیرۆكەكەوە ...
بە تەنێ لەگەڵ داپیرەم ئەژیم، لەگەڵ خێزانم جیابوومەتەوە، دوورم لە گشت ئاشناێك ژیانم لێ بووتە ژەقنەمووت گیرۆدەی ئەو نەخۆشییەم هێندێجار بە ئاگا و هێندێجار نا ئاگا لە كاتژمێرە دووبارەكاندا دەچمەوە شوێنی ڕووداوەكان . ماوەێكی زۆرە چەند ماهێك دەبێ تاقەتم لە ڕێگرتن چووە و لە ژوور لەبن تاریكی لێی ڕاكشاوم، زانیومە ئەفسەری لێكۆڵەرەوە بە فەرمانی دادگە بەهەردوو تۆمەتی " گەر هاوسەرگیری بكەم ئەوا زەبرێك بەسكی هاوسەرم دەخەم و منداڵی لەبار دەبەم و، ناوی هێندێك كەسایەتیم داوە بە بە بنكەی پۆلیس كە ئەوان لە ژیان نەماون وتەنها كت]بیان دەست دەكەوێ، پێیان وایە من بەرامبەر بە یاسا شۆخیم كردووە " بەدوامدا دەگەڕێن و دەیانەوێ دەستگیرم بكەن چەند ڕۆژ ئەوان بە خۆیان و فەرمانیان دێن من لەنێو تانكی سەربان خۆم حەشار دەدەم، هەموو شەوێ كە دەنووم ئەفسەرەكە دێتە خەونم و دەڵێ " لە هەركوێ بتگرم دەبێ دار لە قونت ببڕم و بە گون هەڵتواسم و كارەبا لە زووبانت بدەم و پشتت بشكێنم " ئیدی بەیانیان كەلەخەو ڕادەبم دەڵێی لافاو هاتووەتە ژێرم یان باران لەسەرم نا لە ژێرمدا دایكردوو و چرپاكەم بەجۆرێك بۆنی پیسی لێدێ كە بە دەریایەك ئاو پاك نابێتەوە .
ئەم چیرۆكە لەژمارە (90) ی گۆڤاری هەنار بڵاوبووەتەوە