چبکەم، نە ئەو کەسەم کە کەسم بێ لە لا بە کەس
خۆشم نەگەیمە ئەو کەسە ئەو من بکا بە کەس

گەر ئیشی ڕۆحتە، کە نەبوو کەس بە دەستەوە
دەست ھەڵگرە لە ڕۆح و مەبە ئیلتیجا بە کەس

نا ئەھلی ئەم ئەھالییە مەعلوومی من کە بوو
شوکری خودا، خودا بەس، ئومێدم نەما بە کەس

لێوی بە پرسشی چ نەخۆشێ نەپشکواند
دەردا! طەبیبی ئێمە کە نادا دەوا بە کەس

خورشید و سایە پێکەوە نابن، دە حەقیەتی
ئەو جیلوە وەحشییە کە نەبێ ئاشنا بە کەس

ساقی، ئەی مایەی طەرەب لەب، پەرچەمت ڕەیحانی ڕووح
نیم خەندێ کە لە غونچە، دەرخە سەرچاوەی صەبووح

پرسشێ کا حاڵی زاری ئێمە، زاری کردەوە
لەو ددانانە کە دەدرەوشایەوە نەجمی فوتووح

لێوی دەرخست و بە ناصیح لێوەلەرزەی خست ئەگەر
بێ تەبەسسوم کا دەبێتە ئافەتی تەوبەی نەصووح

دۆزەخ لە عیشقە خاڵی و جەننەت لە دەرد و داغ
عاشق لە حەشریشا نیەتی جێ دڵێ فەراغ

گەر عازیمی زیارەتی کەعبەی مەحەببەتی
ڕێ: چاکی دڵ؛ عەلامەتی ڕێ: داغ و شوێنی داغ

عیشق ئاگرێکە بەر بووە ھەر کەس دەبێ بە کەس
گەر ڕۆژەرەش وەکوو شەوە بێ، بوو بە شەوچراغ

شەطێ ئاوی کە زاهید بۆ وضوویەک کردووە ضایع
فەقیرە، هەر بە بایەک ئەو هەموو ڕەنجەی چووە ضایع

میثالی وایە بەحرێ گەوهەری دابێ بە خەرموهرێک
لە بۆ دنیا ئەوی عومری عەزیزی کردووە ضایع

هەتا تۆ چوویە گوڵشەن، گوڵ بە بێنی میسکی زوڵفت کەوت
کەوا ئەو ڕەنگە خۆشەی سیس و هەم بێنی بووە ضایع

ئیتتیفاقی ئافتاب ئانێ موقابیل بوو بە ڕووت
ئافەتێکی دی، نەما تابی، بوەستێ ڕووبەڕووت

دیارە خۆ پەروانە ھەر سووتانە ئەسڵی موددەعای
بۆیە ئێمەش عاشقین، ئەی شەخسی ئاتەش خوو، بە خووت

ئەم فیزاعەت بەدوەوە، حەقتە کە ناپرسی چیە
تۆ، یەکێ، دائیم ھەزارێکی وەکو من دوو بە دووت

ئەی مەحەببەت! ئاگرێکی ھێندە خۆش و دڵ نشین
ئەو کەسەی سووتووتە، ھەر ئەو ھەوڵ ئەدا بۆ سوو بە سووت

ئەم شەرارەی فیرقەتە مەخلووقی وا کردە کەباب
مالیکی دۆزەخ دلی بەم عالەمی ناسووتە، سووت

حەقی بوو دڵ لە کۆیا ما بە سینەی ئێمە ناڕاضی
کە عاصی قەسری خولدی دی بە جێ ئەڵحەد نەما ڕاضی

چووە چوو، خۆ نەھاتوو نادیارە، حاڵە ماڵت بێ
بەس ئەم نەقدە بکە صەرفی غەمی موستەقبەل و ماضی

ببینن گەر لە ساقی ناز و عیشوێک، ئێمە دەیبینین
بە مەی نۆشی دەدەن فتوا بە مەستی موفتی و قاضی

لە نان و ئاو ئەوا ئیمساکییە مردووش، ئەرێ زاھید
چ عوجبێکە، ئەمەندە بۆ دەنازی تۆ بە مورتاضی

قسە و باست لە عیرفانە، کەچی دنیایە مەنظوورت
لە عینوانی جەواھیر جۆییایی و ڕوو لە ئەعراضی