ناتوانین هه‌رگیز له زمانێك زێتر به كار بهێنین.
"دریدا"
ناتوانین هه‌ر ته‌نها زمانێك به كار بهێنین.
"عه‌بد ئه‌لكه‌بیر ئه‌لخه‌تیبى"
له ژێر تایتڵى پرسیاركردن له تاریكى و سه‌بتایتڵى "له هیچ دنیایه‌كه‌وه ڕه‌وانه نه‌كراوم" كتێبى ناسنامه‌ى ئه‌ده‌بى (عه‌بدولموته‌ڵیب عه‌بدوڵڵا) له بڵاوكراوه‌كانى گۆڤارى "نما" هه‌ولێر 2018 كه‌وته كتێبخانه‌ى كوردییه‌وه، ناوه‌رِۆكى ئه‌و كتێبه پێكهاتووه له‌و به‌شانه: نیگاى هونه‌ر، چاوى شۆرِش، نه‌خشى منداڵى، خه‌یاڵى كتێب، شۆرِشى نوێ، ئه‌ده‌بى به‌رگرى، پرسیاركردن له رۆمان و رۆمانى كوردى، نیگاى من و هه‌شتاكانى ئه‌ده‌بى كوردى، له خوێندنه‌وه‌وه بۆ خوێندنه‌وه، من و یه‌كێتى نوسه‌ران، من و ئازاد سوبحى وه‌ك شاعیر، گۆڤارى سه‌راب سه‌راب...
له پێشه‌كییه‌كى كورتدا پێناسه‌ى ئه‌و كتێبه به‌و جۆره كراوه:
خوێنه‌رى خۆشه‌ویست ئه‌و ده‌قه‌ى به‌رده‌ستتان یاده‌وه‌رى نییه، چونكه گێرِانه‌وه‌ى ژیانى كه‌سى نییه، وه‌ك چه‌مكى یاده‌وه‌رى داواى ده‌كات. ژیاننامه نییه، وه‌ك ئه‌وه‌ى له‌سه‌ر راستبێژى وه‌ستا بێت، به‌ڵكو زمانێكى دیكه‌یه به‌رانبه‌ر زمان و له‌گه‌ڵ زماندا! نه‌ك به‌و مانایه‌ى كه كارى چاره‌سه‌ركردنى یه‌كیه‌تى زمان بكات، به‌ڵكو به‌و مانایه‌ى كه زمان ده‌یه‌وێت.
به هه‌ر زمانێك كه (من) ده‌خه‌ینه نێو رسته‌وه، یان یادى (من) ده‌كه‌ینه‌وه، یان زمانى (من) ئاشكرا ده‌كه‌ین... راسته‌وخۆ "من بیر ده‌كه‌مه‌وه"ى دیكارت ئاماده‌یى هه‌یه‌و (من) ده‌بێته‌وه سێنته‌رى بیركردنه‌وه. ئه‌و ده‌قه به نیازه (من)ى دیكارتى و (من)ى گرامه‌رو (من)ى ئه‌ده‌بى بخاته سه‌ر خودى خۆى، یان سه‌ر ئێمه... بیركردنه‌وه‌یه‌ك هه‌یه پێیوایه كۆى ئه‌و (من)انه له رووه (سۆسیۆ- رۆشنبیری)یه‌كه‌ى با جیاوازیش بن، هه‌ر هاوشێوه‌ن، چونكه كۆى ئه‌و (من)انه به هه‌مان واقیع و ده‌روون و دیارده‌وه به‌ندن، ئه‌گه‌رچى رێگاى زمانیان هه‌مان رێگاش نه‌بێت... به دیوه‌كه‌ى دیكه‌ش دریدا له (ل 44) كتێبى (احادیه الاخر اللغویه) ده‌ڵێت: هه‌ر چۆنێ بێ گه‌رِان به دواى چییه‌تیمان له نێو زماندا، وه‌ك مه‌سه‌له‌ى گه‌رِانه‌وه‌ى بێكۆتایى سه‌یر ده‌كرێت.
به كورتى ده‌مه‌وێ بڵێم (من) له‌و ده‌قه‌دا بابه‌ت نییه، به‌ڵكو ده‌كه‌وێته نێو ئه‌زموونى زمان و ئه‌زموونى (سۆسیۆ- رۆشنبیری)یه‌وه، له‌وێوه په‌یوه‌ندى به جه‌وهه‌رى (من) له له‌گه‌ڵ زمان و زمانى ئه‌ده‌بییه‌وه ده‌به‌ستێت.
(1)
یه‌كێك گوتبووى ئه‌وه‌ى زۆربه‌ى وه‌رزه‌كان پانتۆڵێكى كاوبۆى شین و كراسێكى سپى و كڵاشێكى سپى له پێ ده‌كا، هه‌میشه كتێبێكى به ده‌سته‌وه‌یه‌و خه‌یاڵى لێره نییه، ئه‌وه موته‌ڵیبه؟! ده‌زانم سه‌رم له نێو كتێبان ده‌جولێته‌وه، به‌ڵام وه‌ك (ئه‌رستۆ)ى گه‌وره خوێنه‌رى دنیا نا، خه‌یاڵم به‌دواى گرتنى گه‌رده‌لووله‌وه‌یه، به‌ڵام (ریلكه) نیم! ئه‌وه فیگۆرى ژیانى رووتى منه به كه‌مه‌كێك ده‌ستكارییه‌وه، مرۆڤێك كه نه‌یتوانى خۆى بكوژێ، نه‌یتوانى وڵات جێبهێڵێت، مرۆڤێك له ناخه‌وه دژى دامه‌زراوى سیاسى و پیرۆزى ئیمانى داخراوو له‌گه‌ڵ شته په‌راوێزو بچوكه‌كاندا دێته‌وه...
(2)
نابێ بیر له تێكدانى دنیاو شۆرِش و یاخیبوون بكه‌ینه‌وه، به‌ڵام ئه‌وه‌ى ئه‌مرِۆ بۆ شۆرِشمان ده‌گه‌رِێنێته‌وه، شته بچوكه‌كانه نه‌ك حیكایه‌ته گه‌وره‌كان، جیاوازییه نه‌ك په‌یوه‌ستبوون...مرۆڤبوونه، مرۆڤبوون زێتر به شۆرِشمان ده‌به‌ستێته‌وه، زێتر له پرسى چه‌وسانه‌وه‌و ئازادى...مرۆڤى شۆرِشگێر به‌رگرى له دادپه‌ره‌وه‌رى ده‌كات، شۆرِش پێویستى به به‌رگرى نییه؟! نادادپه‌روه‌رى دیاره، به‌ڵام دادپه‌ره‌وه‌رى ته‌مومژاوییه، وه‌ك چۆن تاریكى ئه‌و كاته ئاماده‌یه، كه رۆناكى نائاماده‌یه! دادپه‌روه‌ریش جگه له ونبوونى نادادپه‌روه‌رى شتێكى دیكه نییه! شۆرِش دیاره وه‌ك ئه‌وه‌ى هه‌یه، شۆرِشیش ئه‌و كاته بوونى هه‌یه كه مرۆڤبوون و دواتر ئازادى و خودى دادپه‌روه‌رى... له لێوى مه‌رگ نزیكترن، نه‌ك له ده‌مى ژیان...
(3)
شته‌كان وه‌ك چۆن هه‌ن، ئه‌وه نین، یان مه‌رج نییه وابن... ژماره‌ى دانیشتوانى ئه‌مریكا له شه‌ش پۆینت سێى دنیا تێپه‌رِ ناكات، به‌ڵام ئه‌و بانگه‌شه‌یه‌ى كه بۆ مافى مرۆڤ ده‌یكات هه‌موو دنیاى له‌خۆگرتووه، بیر له‌وه ناكاته‌وه كه له سه‌ده په‌نجاى سامانى هه‌موو دنیا له ئه‌مریكایه، بیر له‌و جیاوازییه گه‌وره‌یه ناكاته‌وه له نێوان ژماره‌ى دانیشتوانى دنیا و خۆى.... ئه‌و قسه‌یه‌م له‌وێوه دێت، كه ناكۆكى سیاسى هه‌موو شتێكى به‌خۆوه گرێ داوه‌و هه‌موو شتێكى به ره‌مزكردوه. ده‌زانم هه‌موو ناكۆكییه‌ك به‌رئه‌نجامى ناهاوسه‌نگى هێزه، ئه‌ى خۆگونجانى خه‌ڵكى ماناى چییه؟ خۆگونجانى خه‌ڵكى په‌یوه‌ستبوونێكى درۆزنانه‌یه! ئه‌و قسه‌یه‌م گشتگیر و هه‌ندێ ره‌قه، به‌ڵام خه‌ڵكى به بێ ئاگایى بوون باوه‌رِ به ئایدیۆلۆژیا ده‌هێنن، به‌ر له‌وه‌ى بیر له راستییه‌كان بكه‌نه‌وه... خه‌ڵكى هه‌میشه به كارێك هه‌ڵده‌ستن كه حه‌زى لێناكه‌ن، چونكه ده‌یانه‌وێت له واقیع دوور بكه‌ونه‌وه، ئه‌وه ئایدیۆلۆژیایه! ئایدیۆلۆژیا مانا به هه‌موو شتێك ده‌به‌خشێت به تیرۆر و كۆنه‌په‌رستیش... ئه‌وه‌ى خه‌ڵكى بێ ئاگا رێست ده‌كاته‌وه ئایدیۆلۆژیایه، ئه‌وه‌ى ماندوویان ده‌كات ئایدیۆلۆژیایه، ئه‌گه‌رچى ئایدیۆلۆژیا وه‌ك ئه‌وه‌ى هه‌یه، درۆزنانه‌ش بێت.
(4)
كتێب ئازادى تاك ده‌چه‌سپێنێ و ده‌سه‌ڵات ره‌تده‌كاته‌وه. یه‌كه‌میان هه‌ر ته‌نها په‌یوه‌ندى به‌وه‌وه نییه كتێب ته‌نیامان ده‌كات، به‌ڵكو په‌یوه‌ندى به‌وه‌وه هه‌یه كه ده‌رگاو په‌نجه‌ره‌كانى مێشكمان به‌سه‌ر ئه‌ویدیكه‌دا ده‌كاته‌وه. دووه‌میان مه‌به‌ست ده‌سه‌ڵاتى ره‌هایه، به‌ڵام له‌گه‌ڵ ئه‌وه‌شدا كتێب به‌شێوه كراوه‌كه‌ى وزه‌یه‌كمان پێده‌به‌خشێت كه به مه‌عریفه‌ى جیاوازه‌وه به‌نده، هه‌میشه له نێوان وزه‌ى مه‌عریفى و ته‌نیاییدا دیكتاتۆرییه‌ت هه‌ره‌س دێنێ! له پانتایى مه‌عریفه‌دا ژیان به ره‌نگه جیاوازه‌كانى ده‌جولێته‌وه، له ته‌نیاییدا ده‌سه‌ڵات بێ كه‌س ده‌مێنێته‌وه...دنیاى كتێب و خه‌یاڵى خوێندنه‌وه، دنیاى رامان و هه‌ڵوێست و بیركردنه‌وه‌یه. هه‌میشه ژیان بابه‌تێكه مرۆڤ به‌ر له‌وه‌ى مامه‌ڵه‌ى له ته‌كدا بكات و هاوژیانى بكات، ده‌بێ بیخوێنێته‌وه، ده‌بێ تێیبگات.
(5)
من ده‌ڵێم ئه‌وه‌م كه هه‌م، له هیچ دنیایه‌كه‌وه ره‌وانه نه‌كراوم .. قسه‌ى پۆلیسى ئایدیۆلۆژیى هه‌رچى بێت، ئه‌وان سه‌ربه‌ستن چۆن بیر ده‌كه‌نه‌وه، من هه‌میشه رێزم بۆ بیرورِاى جیاوازى ئه‌ویدیكه هه‌یه، نه‌یارى كه‌س نیم، من ئه‌وه‌م كه هه‌م و چێژى لێده‌بینم، بێ ئه‌وه‌ى كه‌س پێمبڵێت چێژ وه‌ربگره؟! ئێمه مرۆڤین كاڵا نین، وه‌ك مامۆستاى یه‌كه‌م ئه‌رستۆ ده‌ڵێت بوونه‌وه‌رێكى كۆمه‌ڵایه‌تین، به ته‌نیا ناژین، په‌یوه‌ندى كۆمه‌ڵایه‌تى به یه‌كمان ده‌به‌ستێته‌وه نه‌ك بازارِ، به‌ڵام گرفتى ئه‌ویدیكه‌ى سیاسیى لێره‌وه ده‌ستپێده‌كات له به‌یه‌ك به‌ستنه‌وه‌ى بازارِى ئایدیۆلۆژیا... گرفتى ئه‌ویدیكه‌ى سیاسیى ئه‌وه‌یه ده‌یه‌وێت وه‌ك ئه‌وان بیر بكه‌ینه‌وه‌و وه‌ك ئه‌وان خه‌یاڵ بكه‌ین و وه‌ك ئه‌وان هه‌ڵبژێرین... ئایدیۆلۆژیسته‌كان ده‌یانه‌وێ كتومت ئه‌وان بیت، سارته‌ر له ئاماژه‌یه‌كى به‌ناوبانگى فه‌لسه‌فییدا به ئه‌ویدیكه ده‌ڵێت "ئه‌و منه‌ى كه من نییه" به‌ڵكو ئه‌ویدیكه‌یه، ئه‌ویدیكه‌یه‌ك كه هه‌موو خه‌سڵه‌ته جه‌وهه‌رییه‌كانى خودى هه‌یه، له بیركردنه‌وه‌و ئازادى و ویست....
(6)
(پێشمه‌رگه 1961)ى (ره‌حیمى قازى) یه‌كه‌مین رۆمانى كوردییه، یان (مه‌سه‌له‌ى ویژدان 1970)ى ئه‌حمه‌د موختار جاف، یان (له خه‌وما 1975)ى جه‌میل سائیب؟!... رۆمان وه‌ك كرده‌یه‌كى هونه‌رى په‌خشانئامێز له‌سه‌ر بنه‌ماى گێرِانه‌وه‌و رووداوو كاراكته‌ر، له نێوان خه‌یاڵ و حه‌قیقه‌تدا خۆى ده‌بینێته‌وه و به شێوه‌یه‌كى تا ئه‌ندازه‌یه‌ك ئاڵۆز ده‌چنرێت... ره‌نگه ئه‌و به ناو پێناسه‌یه (ئاڵۆزى رۆمان) و (ئازادیى رۆمان) له‌وێدا هه‌ڵگرێته‌وه، كه تاكو ئێستا نه‌توانراوه سنوره‌كانى رۆمان وه‌ك پێویست دیارى بكرێت!! كه‌واته پێشمه‌رگه‌ى (ره‌حیمى قازى) ئاڵۆزترین رۆمانى چنراوى كوردییه، یان (له خه‌وما)ى جه‌میل سائیب چه‌مكى ئازادى له رۆمانى كوردى ده‌خاته روو؟! له‌سه‌ره‌تادا هه‌موو ئه‌وانه‌ش زۆر گرنگ نیین، گرنگ ئه‌وه‌یه له كوێ وه‌ستاوین، من ده‌ڵێم هه‌تا ئه‌وه‌ى ده‌گوترا كورد رۆمانى نییه، با رۆمان بنوسین... له نوكته‌یه‌ك وه‌ستابووین، ده‌ڵێت: كه‌سێك له كافه‌یه‌كدا داواى قاوه‌یه‌كى بێ سه‌رتوو ده‌كات، دواى نیو سه‌عات له چاوه‌رِوانى، گارسۆنه‌كه دێته‌وه ده‌ڵێت: سه‌رتوومان نییه، به‌س شیریشمان نییه، بۆ قاوه‌یه‌كى بێ شیرت بۆ دروست نه‌كه‌م.
(7)
بزاڤى روانگه به‌شێكى زۆرى ئه‌ده‌بى حه‌فتاكانى كوردى (باشورى كوردستان)ى داگیر كردبوو و بانگه‌شه‌ى بۆ كۆمه‌ڵێ دروشم ده‌كرد له‌وانه‌ش: وته‌ى نوێ، بیرى نوێ، كردارى نوێ، له رووى بیركردنه‌وه هه‌نگاوێكى نوێ بوو به‌ره‌و یاخیبوون له دابونه‌ریت، له زمانى سروشئامێزى گۆران و هاورِێكانى... روانگه هه‌رگیز شۆرِش نه‌بوو، روانگه یاخیبوون له رووى ره‌مزگه‌رایى و زمانى ئه‌ده‌بى و هونه‌رییه‌وه، بانگه‌شه‌ى تیۆرى هونه‌ر بۆ هونه‌رییان ده‌كرد، هه‌موو ئه‌وانه‌ش رووییه‌كى نوێى به ئه‌ده‌بى كوردى به‌خشى...
به برِواى من هه‌شتاكانى ئه‌ده‌بى كوردى ئه‌وه‌نده تاریك نه‌بوو، ئه‌ده‌بى هه‌شتاكان جگه له په‌ره‌پێدانى چێژى هونه‌رى و زمان و جوانكارى، مه‌عریفه‌ى ئه‌ده‌بى قوڵتر كرده‌وه‌و دنیابینییه‌كى بوونگه‌رانه‌ى به‌رهه‌م هێنا! ده‌شێ جوانكارى و زمانى مه‌عریفى و خودگه‌رایى وه‌ك سیمایه‌كى جیاوازى شیعرییه‌تى هه‌شتاكان هه‌ڵگرینه‌وه، ده‌مه‌وێ بڵێم به شێوه‌یه‌كى گشتى ئاكامى شیعرییه‌تى هه‌شتاكان، ده‌كه‌وێته نێوان چێژو خودگه‌راییه‌وه.
(8)
خوێندنه‌وه فه‌زایه، بۆیه ده‌خوێنینه‌وه تاكو فه‌زایه‌كى دیكه‌ى جیاواز به خۆمان دروست بكه‌ین... له تیۆرى (وه‌رگرتن) له یه‌ك نه‌چوونى ده‌ق و خوێنه‌ر وه‌ك یه‌كێك له مه‌رجه بنه‌رِه‌تیه‌كانى (ئاوێته‌بوون) قسه‌ى لێده‌كرێت! بۆ ئه‌و مه‌سه‌له‌یه‌ش ره‌خنه‌گرى ئه‌ده‌بى (وولفگانگ ئایزه‌ر) سوودى له توێژینه‌وه كۆمه‌ڵایه‌تى و ده‌روونییه‌كانه‌وه وه‌رگرتووه بۆ نموونه: له بوارى كۆمه‌ڵایه‌تیدا تێكه‌ڵبوونى دوو كه‌س ئه‌و كاته به‌شێوه‌یه‌كى به‌هێز رووده‌دات، كه هه‌ر یه‌ك له‌وانه بتوانن ناسنامه‌ى كۆنى یه‌كتر له‌بیر بكه‌ن، له نوێوه یه‌كتر بناسن، چونكه له كاتى له‌بیركردنى ناسنامه كۆنه‌كانیان هه‌ر یه‌ك له‌سه‌ر ئه‌ویدیكه له رِێگاى خوێندنه‌وه‌ى حه‌قیقى خۆى یان "ناشت" وێنه‌یه‌ك دروست ده‌كات، یان ته‌ئویلى تایبه‌ت به‌خۆى ده‌بێت و هه‌ر له‌سه‌ر بنه‌ماى ئه‌و وێنه‌یه‌ى كه له یه‌كه‌م ناسیینه‌وه دروست ده‌بێت، په‌یوه‌ندى نوێ داده‌مه‌زرێنێ، دامه‌زراندنى په‌یوه‌ندى نوێ له‌نێوان ئه‌و دوو كه‌سه، له‌سه‌ر بۆش و پرِكردنه‌وه‌ى ئه‌و بۆشاییه، جگه له پشتبه‌ستن به خوێندنه‌وه‌ى حه‌قیقى و ته‌ئویل شتێكى دیكه نییه، هه‌موو خوێندنه‌وه‌و ته‌ئویلێكى نوێى ده‌قیش ره‌هه‌ندێكى جولاو و نوێ به تێرِوانین و بیركردنه‌وه‌ى خوێنه‌ر ده‌به‌خشێت! وه‌ك ده‌زانین هه‌میشه تێرِوانین و بیركردنه‌وه له‌سه‌ر ته‌ئویلى كۆن و پێشینه، حاڵه‌ته جێگیرو په‌رِگیره‌كه یان كۆنه‌كه زێتر ده‌چه‌سپێنێت، به‌و مانایه‌ش هیچ خوێندنه‌وه‌و ته‌ئویلكردنێكى نوێ له‌سه‌ر ناسنامه‌ى كۆن له دایك نابێت، چونكه خوێندنه‌وه‌و ته‌ئویلكردن له ده‌ره‌وه‌ى ئیبداع نییه، به مانایه‌كى دیكه خوێندنه‌وه و ته‌ئویلكردن له‌سه‌ر ناسنامه‌ى كۆن، زۆرجار بۆ وه‌هم ده‌گۆرِێت، به‌ڵام له‌گه‌ڵ هه‌موو ئه‌وه‌شدا خوێندنه‌وه‌و ته‌ئویلكردنیش وه‌ك كرده‌یه‌كى به‌رده‌وام له تێگه‌یشتن، هه‌رگیز خاوه‌ندارێتى ناكرێت، به‌ڵكو فۆرمێكه له فۆرمه‌كانى بوون له جیهاندا، به‌و مانایه‌ش ده‌شێ "وه‌هم"و " ته‌ئویلكردن" دوو فۆرِمى هاوپه‌یوه‌ست بن...
(9)
سوكرات له دوورى شارى زاڵمان پیاسه ده‌كات و له نێو قساندا خه‌ون به شارێكى دیكه‌وه ده‌بینێ! سوكرات له ده‌ره‌وه‌ى شارى زۆرداران، له‌گه‌ڵ قسان هه‌نگاو ده‌نێ و خه‌ون به شارێكى دیكه‌وه ده‌بینێ! شارى زاڵمان و شارى زۆرداران له‌و دوو نه‌خشه‌یه‌دا یه‌ك واتایان هه‌یه، به‌ڵام ده‌شێ زاڵم شار به‌رِێوه ببات و زۆردار ئه‌وه بێ كه واز له ده‌سه‌ڵات ناهێنێت؟! له‌گه‌ڵ هه‌موو ئه‌وانه‌دا ده‌زانم له شه‌رِى نێوان كه‌سه‌كان و هۆزو گروپ و دیده جیاوازه‌كان... خه‌ونبینین یۆتۆپیایه، خه‌ونبینین ئه‌و كاته واقیعییه كه دادپه‌روه‌رى بوونى هه‌یه، راسته دادپه‌روه‌رى چه‌مكێكى ئیشكالییه! من چیرِۆكنوس نیم، به‌ڵام هه‌وڵمدا زاڵم له نادادپه‌روه‌رى وێنا بكه‌م و زۆردار له شه‌رِدا بنه‌خشێنم، چونكه له مێژووى ده‌سه‌ڵاتى كوردیدا خه‌ونبینین هه‌میشه كورتى دێنێ، نهێنى ده‌سه‌ڵاتى كوردى له ژمار نایه‌ت، به داخه‌وه مێژووى ده‌سه‌ڵاتى كوردى، مێژووى شه‌رِو نادادپه‌روه‌رییه، نهێنى ده‌سه‌ڵاتى كوردى ئه‌و نهێنیانه‌شن كه شه‌هیدان بردیانه ژێر گڵ.
(10)
چۆن (لم نیازمه)ى عه‌باس عه‌بدوڵڵا یوسف و (دوكه‌ڵ)ى هاشم سه‌راج و (گه‌رم نه‌بوونه‌وه)ى جه‌لال به‌رزنجى و قه‌سیده‌ى (سوتانى ره‌نگه‌كان)ى دلشاد عه‌بدوڵڵا و (له غوربه‌تا)ى حه‌مه عومه‌ر عوسمان و (ته‌مه سپیه‌كانى رۆح)ى كه‌ریم ده‌شتى و (زه‌ردك)ى ئه‌حمه‌دى مه‌لا... وه‌ك شیعر بۆ من جیاوازى خۆیان هه‌بوو، ناسینى (ئازاد سوبحى)یش وه‌ك مرۆڤ و وه‌ك شاعیر، نه‌ك هه‌ر ته‌نها جیاوازى، به‌ڵكو دڵكرانه‌وه بوو.
(11)
ئێمه كۆمه‌ڵێك هاورِێى نوسه‌ر، له دواى ئه‌وه‌ى له رووى بڵاوكردنه‌وه‌ى به‌رهه‌مه‌كانمان دووچارى جۆرێك له نائومێدى بووین، دواى ئه‌وه‌ى پانتایى میدیاى كوردى جگه له هیچ نه‌گوتن و بێنرخكردن، فریاى گوتن و جیاوازى نه‌ده‌كه‌وت، جگه له رووكارخوازى و دروشمبازارِى ئازادى و ئه‌ویدیكه شكاندن و پیاهه‌ڵدانى بێ بنه‌ما، كارى به بیركردنه‌وه‌ى جیدى و راڤه‌كردن و ره‌خنه‌وه نه‌بوو... ئیتر من و دانا سه‌عید سۆفى و ئازاد سوبحى بیرمان له ده‌ركردنى گۆڤارێكى ئه‌ده‌بى كرده‌وه، له چه‌ند به‌یه‌كگه‌یشتنێكى سێ قۆڵیدا بیرۆكه‌ى گۆڤارى (سه‌راب)مان هێنایه ئاراوه، دواتریش به پێشنیاركردنى نه‌وزاد ئه‌حمه‌د ئه‌سوه‌د له لایه‌ن ئازاده‌وه، سه‌راب بووه جێگاى بیركردنه‌وه‌و پرۆژه‌ى ئه‌ده‌بیمان.