-1-
هەردوو دەستم بەسەرمەوە گرتووە 
دەبێ‌ وای بقوپێنم 
هیچ تەنەكەچییەك بۆی ڕاست نەكرێتەوە
 
-2-
هەناسەم تووند بووە 
پێدەچێ‌ گرێ‌ درابێ‌ 
 
-3-
خەیاڵم 
بەبزمارێكەوە هەڵواسراوە 
دەستم پێی ڕاناگا 
تا بیكەمەوە ناوسەرم 
 
-4-
وێنەی خۆم بە دیواری ژوورەكەمەوە دەكێشم 
جارێك بێ‌ چاو 
جارێك بێ‌ پێیەكانم و 
جارێك بێ‌ دەستەكانم 
جارێك بێ‌ خەونەكانم و 
جارێكیش بەبێ‌ خەیاڵەكانم 
جارێك دەم بەپێكەنین و 
جارێكی دیكە بە دەم و چاوی چرچاوی و 
نیگەرانییەوە 
دواجار تەماشایان دەكەمەوە 
هیچیان من نیم 
 
 
-5-
لەناو خۆمدا بۆ شوێن دەگەرێم 
من پڕم 
پڕ 
پڕ
شوێن دەست ناكەوێ‌ تا دڵێكی لێ دابنێم
 
-6-
گەورەترین گرفتم ئەوەیە ناتوانم 
لەگەڵ كەسانێك ژیان بكەم 
وەك من بیردەكەنەوە 
وەك من خەون دەبینن 
وەك من خەیاڵ دەكەن 
وەك من كات تێدەپەڕێنن  
 
-7-
تەپەی پێی پیاوێك لەناو سەرمدا 
ئارامی لێهەڵگرتووم و 
بە مایكێكەوە پڕ بە كووچەخامۆشەكانی سەرم 
هاواردەكا
"بەختەوەری ئەوەیە مرۆڤ لەدایك نەبێ‌ 
ئەگەر لەدایكیش بوو 
دەست بەجێ‌ بمرێ‌ *" 
 
-8-
منداڵیمم بدەنەوە 
لە ئینجانەیەكی دەخەم و 
نزیك گەورەبوونم دایدەنێم 
 
 
-9-
كتێب دەكڕم و نایخوێنمەوە 
 لاپەڕەكانی دەكەمە كەشتی و 
لە نێو سەرنشینەكانی بەشوێن كچێك دەگەڕێم 
 
-10-
هیچم لێ‌ وون نەبووە و
بەشوێن شتێكدا دەگەڕێم و نایدۆزمەوە 
 
-11-
هەناوم گەرمە 
پشكۆیەك لەگەدەم دایە 
 
-12-
بەكاركردن لەناوخۆمدا سەرقاڵم 
سەرەڕای ئەوەش نامپەرژێ‌
پرچم شانە بكەم 
پێڵاوەكانم خاوێن بكەمەوە 
 
-13-
سەبەتەی ڕەنگەكانم لێ وون بووە  
تا هێندێك 
لە خەونەكانمی پێ‌ بنەخشێنم 
پێدەچێ‌ هی ئەوەبێ‌ ڕەشبین بم 
 
-14-
دەنووسم 
تا وەڵامی ئەو پرسیارە بدەمەوە 
بۆ دەنووسی؟
 
 
 
كۆتایی زستانی 2012
 
* وتەیەكی "ئەمیل سیۆران"ە