![](http://www.hemin.dk/files/images/tp.gif)
سەرم سوڕما
لە حەیرەتی ئەم بەربەیانە ناوەختە و
چاوەکانم نەدەترووکان
لەبەر ڕووناکیی دەربیجەی خۆرەتاوی تیشکهاوێژ
بەنێوچاوانی کازیوەی ئەم ڕۆژەوە
کە ژانی زانی گرتووە و
ئەمن هەرتک دەستی خۆمم
لە زنجیری خەو
ڕزگارکرد.
هاوارم کرد
"ئەوەتانێ ئەوە چرای موعجیزەیە، وەرن خەڵکە!
بە چاوانی کوێرەوەبووی دڵ و دەروون
ئەگەر هێشتا تین و سۆمای ئەوەی ماوە
کە نیوەشەو لە کازیوە جیا کاتەوە
هەتا لە کیستان نەچووە
وەرن تەماشای کەن تێرتێر
کە خۆرەتاو
بە ئاسمانی شەوەزەنگدا
باڵی گرتووە، هەڵفڕیوە!
![](http://www.hemin.dk/files/images/tp.gif)
بەهەرتک گوێی کپئاخنراو
گوێ بدەنە ئەم نەغمەیە
کە خۆرەتاو
لە نیو-پەردەی شەوەزەنگدا
دەنگی بەستەی هەڵبڕیوە"
![](http://www.hemin.dk/files/images/tp.gif)
![](http://www.hemin.dk/files/images/tp.gif)
"- دیمان!
(نیوەی خەڵک وتیان)
ئەرێ! دیمان کە خۆرەتاو باڵی گرتووە هەڵفڕیوە!"
![](http://www.hemin.dk/files/images/tp.gif)
نیوەی دیکەشیان بە شادی
لەدڵەوە هاواریان کرد:
"- بە گوێی گیانمان دەنگی بەستەی بلاوێنی خۆرەتاومان
هەڵمژتووە".
![](http://www.hemin.dk/files/images/tp.gif)
ئەمجار ئەمن
سەری کاسی سەرسوڕمانم بۆ لەقاندن:
"نارەوایە،
نەبیستراوە
قەت نەکراوە
هۆ خەڵکینە!
ئێوە مەست و وڕوکاسن
یان بە ئەنقەست
خۆتانی لێ نەبان دەکەن؟
شەو هێشتاکە دوو دانگی تر لە دوویەتی.
ئەگەر ئێوە موسوڵمانی تۆبەکار و نەزەرپاکن،
کەی دیوتانە
کە چاوەشان
نوێژی بەیان بدەن؟
![](http://www.hemin.dk/files/images/tp.gif)
گەندەزەلکەی قووڵکەی دەمی هەر مانگایەک
لە من دەبوو بە بورکانی تووڕەیی و ڕق:
![](http://www.hemin.dk/files/images/tp.gif)
"- وەرن لەو گەوجە بڕوانن، بۆ ڕووناکیی خۆرەتاویش
هاتووە ئێمە سوێندی بۆ بخۆین."
![](http://www.hemin.dk/files/images/tp.gif)
تۆفانی پێکەنین هەستا ...
![](http://www.hemin.dk/files/images/tp.gif)
"- خۆرەتاوی گەش نابینێ
بەتەمایە
کوترەکوتر، بە دەستەکی سەعاتەکەی سەر دیواری،
بە کۆمەڵی خەڵکی هەژار بسەلمێنێ
کە شەو هێشتا
لە نیوەشی تێپەڕ نەبووە."
![](http://www.hemin.dk/files/images/tp.gif)
تۆفانی پێکەنین هەستا...
![](http://www.hemin.dk/files/images/tp.gif)
من
برک و ژان لە دەمارم
حەسرەت لە مۆخی ئێسقانم
شتێکی چەشنی ئاگریش لە سەرتاپێی گیانم
گەڕا.
![](http://www.hemin.dk/files/images/tp.gif)
شتێک دەتگوت سەرتاخواری ئازای لەشمی
لە نێو چنگی خۆیدا گوشی
تا دڵۆپێک وەک قرچەی خۆر
لە هەرتک چاوم هەڵقوڵی
لە تاڵاوی گشت دەریاکان
پیاڵەیەکم هەڵچۆڕاندە نێو فرمێسکی داماویی خۆم.
![](http://www.hemin.dk/files/images/tp.gif)
ئەوان عەوداڵ و دڵبەستەی خۆرەتاو بوون
چون خۆرەتاو
تەنیاترین حەقیقەت بوو لەلایان و
چەژەی تامی واقعییەت
لە ژینیاندا.
![](http://www.hemin.dk/files/images/tp.gif)
بە ڕووناکی و بە گەرماکەی
مانای بێگەرد و بێڕیای دۆستایەتی و
بە پرشنگی گەشی خۆشی
مانای بێخەوش و ساکاری ڕاستگۆیی بوو.
![](http://www.hemin.dk/files/images/tp.gif)
(هەزار خۆزگە توانیبایان
لە خۆرەتاوەوە فێر بن
کە وەکوو ئەو بێدرێغ بن
لە ژان و شادییەکانیاندا
تەنانەت
بە نانی وشکی سفرەی ماڵیان-.
قەتیش چەقۆ لە کالانێ دەرنەهێنن
ڕۆژی دابەشکردن نەبێ.)
![](http://www.hemin.dk/files/images/tp.gif)
حەیف و جەخار
کە خۆرەتاو
هەر خۆی مانای دادگەریی بوو،
ئەمانیش عەوداڵ و دڵبەستەی داد بوون و
ئێستاکە وا
بەم شێوەیە
بە دێوجامەی خۆرەتاوێک
دڵیان بردبوون.
![](http://www.hemin.dk/files/images/tp.gif)
ئەی خۆزگە من بمتوانیبا
خوێنی دەمارەکانی خۆم
دڵۆپ
دڵۆپ
دڵۆپ
بگریم
هەتا باوەڕم پێ بکەن.
![](http://www.hemin.dk/files/images/tp.gif)
ئەی خۆزگە من بمتوانیبا
-بۆ یەک لەحزە بمتوانیبایە ئەی خۆزگە-
ئاپوورەی ئەم جەماوەرە بێئەژمارە
بنێمە سەر هەرتک شانم
بە چوار دەوری گۆی زەویدا بیانگێڕم
تا بە هەرتک چاوی خۆیان ببینن کە
خۆرەتاویان لە کام لایە و
بڕوام پێ بکەن.
![](http://www.hemin.dk/files/images/tp.gif)
ئەی خۆزگە
بمتوانیبا!
-----------------------------------------------
لە پەیجی 'ناسری حیسامی'ەوە.
شیعرەکە لە پەیجی 'شاملوو'ەوە.