ڕوبارێ لە شارێک هەڵدێ !
١
بۆ ئەوەی چامەیەکی شیعریی کاریگەر بنوسیت
دەبێ لە 'ئۆرۆک' ەوە بێیت .
نائومێدییت بست بە بست بپێویت ئەودەمەی لە ئەسانسێرێک دێیتە دەرێ .
لەگەڵ شاخ و ڕووباران و درەختەکانیاندا ئاشت بیتەوە .
ژێیەکانی کەمانەکەت ، هارپەکەت ، لە مووی ئەسپێ ، چێ کەیت .
دەبێ ببیتە فرۆشیاری خەون لە گوندەکان
سبەینان – سەبر – ی خۆت بزر کەیت و ئێواران بیدۆزیەوە .
لەدایکبوونی بافڵێ ، زریانێ ببینی .
ئاڵتوون وەک ڕۆشنایی ببینی و ، هیچی تر .
دەبێ ڕێزی شێتبوونی هەور و گڕکانەکان بگریت .
وەک نابینایان ، خۆت ڕابهێنیت ، چۆن لە ئاسمان دەڕوانیت .
شەو ؛ دانیشتوویەکی موسافیر!
- ١ –
بەرەو ناکۆتا ، شەو گالیسکەی کەون ڕادەکێشێت ،
وای چەندێ بە سەبریت ئەی شەو !
ئەی ئەو شەوەی
تیایدا هەندێ لە جەستەم
شەڕ لەگەڵ هەندێکی تری خۆی دەکات .
- ٢ -
ڕۆشنایی ، بەلەمەکانی خۆی لەکەناری شەودا کۆکردەوە ،
ئەمێستا ئەو چاوەڕێی ئەو چرکەساتە دەکات
تیایدا چارۆکەکان بکاتەوە .
- ٣ –
" خودی خەونەکانت ، هیی خۆت نین "
کەنارەکان
-١-
فۆرمێکی نوێی ئیمپریالیزم دادەمەزرێت :
ڕۆژئاوای سیاسەتوانی ئەمریکیی – ئەوروپیی ، سوپایەکی تر بۆ سوپاکەی خۆی دەخوڵقێنێ : ئەم سوپا خوڵقێنراوە ؛ دەمێ "سوپایەکە لە پەراوێزدا" و ، دەمێکیش "سوپایەکی پێشڕەوە" . ڕۆژئاوا ، تاکەکانی ئەم سوپایە لەناو گەلانی "دۆست" ەوە هەڵدەبژێرێت . ئەم سوپایە ، سوپایەکی کیشوەربڕە . نەفەرەکانی ، نیشتەجێی هەمان ئەو شوێنانەن کە لە گوند و شارەکانی خۆیاندا ، تیایاندا دەژین . ئەمانە ، هەرکەسە و لە شوێنی خۆی حازروئامادەیە ، گوێ قوڵاغی سەعاتی سفرە ! ئەم سوپایە ، سوپایەکی گوێڕایەڵ ، ڕاهێنراو ، بەوەفایە .