ئه‌وه له په‌نجه‌ره‌که‌وه ده‌یبینم، دیسانه‌وه هاته‌وه، له ڕیزدا وه‌ستاوه و چه‌ند ژنێکی هاوڕێشی له‌گه‌ڵ خۆیدا هێناوه، ئه‌مه بۆ جاری بیسته‌مه دێت بۆ بنکه‌ی پۆلیس تا ده‌عوا دژی مێرده‌که‌ی قه‌ید بکا و من ره‌وانه‌ی دادگای بکه‌م. دێت و ده‌ڵێ ده‌ستدرێژی سێکسیم لێ کراوه. مێرده‌که‌م ده‌ستدرێژیم لێ ده‌کات، ده‌یه‌وێت به‌زووترین کات پۆلیس بنێرم و مێرده‌که‌ی بگرن. پێی ده‌ڵێم داده گیان! من ناتوانم بیگرم، ئه‌وه مێردته، یاسا رێگام پێ نادات، گه‌ر ناته‌وێ لێت نزیک بێته‌وه، گه‌ر ناته‌وێ ته‌نانه‌ت ماچێکیشت بکات، لێی جیابه‌ره‌وە. ده‌ڵێ نامه‌وێ نزیکم بێته‌وه، ده‌بێ ئێوه بمپارێزن،ئه‌مه له‌شی خۆمه‌و خۆم بڕیار ده‌ده‌م، پێی ده‌ڵێم ئه‌ی بۆ لێی جیانابیته‌وه؟ ده‌ڵێ له‌به‌ر باوک و دایکم جارێ ناتوانم، خزمه‌کانم حه‌یام ده‌به‌ن و هه‌زار قسه‌م بۆ هه‌ڵده‌به‌ستن.پێی ده‌ڵێم فریشته خان ! ئه‌مه وا نابێ، ئه‌و مێرده‌ت هه‌ر ماچێکت بکات، تۆ فڵق لێره‌یت، تۆ هه‌موو رۆژێ لێره‌یت، ئێمه لێره هه‌زار ئیشمان هه‌یه، ئه‌ویش ده‌ڵێ، هه‌موو ئه‌و ئیشانه‌ی ئێوه له‌چاو ئه‌مه‌ی مندا هیچ نییه، گه‌ر ئێوه نه‌توانن من له‌و مێرده‌م پیارێزن، کێ ده‌توانێ، پێی ده‌ڵێم، داده گیان! بڕوا بکه حه‌زم ده‌کرد، هه‌موو ئه‌و جارانه‌ی که ده‌عواشت قه‌ید کردووه درۆت له‌گه‌ڵ ناکه‌م و من یه‌کسه‌ر ره‌وانه‌ی دادگام کردووه، پێیان وتووین ئیتر تکایه جارێ مه‌ینێرن تا خۆمان ده‌ینێرین به‌شوێنیدا، ده تۆ هێمن به‌ره‌وه‌و ئه‌و قومه ئاوه بخۆره‌وه، ده‌ڵێ هیچم ناوێ، نا، ئێوه گوێم لێ ناگرن، ئێوه ئه‌و برینه قووڵانه‌م نابینن که وه‌ک فواره خوێنی لێ ده‌ڕوا.که ئه‌و مێرده‌م ماچێکی روومه‌تم ده‌کا، پێی ده‌ڵێم تۆ ماچی روومه‌تێک ده‌که‌ی سارد وسڕ خوێنی تیا نییه، بڕۆ ماچی ئه‌و دیواره‌ی به‌رامبه‌رت بکه. تێ ناگات، ئه‌و که‌له ره‌قه لێم تێ ناگات، گه‌ر که‌مێ تێبگه‌یشتایه قه‌ت نزیکم نه‌ده‌که‌وته‌وه، نا ئێوه‌ش ئێناگه‌ن، ئێوه‌ش سه‌ری مانگان مه‌عاشه‌که ده‌خه‌نه گیرفانتانه‌وه‌و بێ خه‌م ده‌نوون و وا ده‌زانن خزمه‌تی هاووڵاتیانی خۆتان کردووه، من نازانم چۆن خه‌وتان لێ ده‌که‌وێ؟
پێی ده‌ڵێم خانمی ئازیز! ئه‌وه غه‌درێکی گه‌وره‌یه له ئێمه‌ی ده‌که‌یت، بڕوا بکه پڕ به‌دڵ حه‌زم ده‌کرد یارمه‌تیت بده‌م، به‌س ناتوانم و چاوه‌ڕێی بڕیاری دادگا ده‌که‌م، باشه پێم بڵێ به‌و کاغزانه‌ی که پرت کردۆته‌وه، دیاره تۆ ساڵێک نابێ شووت پێ کردووه، گه‌ر وایه بۆ شووت پێ کرد؟ ده‌ڵێ کوڕه سه‌ره‌تای یه‌کتر ناسین هه‌تا بڵێی کوڕێکی ناسک و باش بوو، هه‌ر چه‌ند دڵم به کوڕێکی تره‌وه بوو، به‌ڵام کفرم کرد و بۆ یه‌کتر ناسین چایه‌کمان پێکه‌وه خوارده‌وه و کتێبێکی بۆ هێنام ،بێ ئه‌وه‌ی پێ بزانی یه‌کسه‌ر له‌سه‌رت ده‌که‌وێ، ئیتر له دوای ئه‌و چایه‌وه، ئه‌و منی به‌هی خۆی ده‌زانی. هه‌موو ئه‌م کۆمه‌ڵگا داوه‌شیوه‌ی خۆمانیش وای ده‌زانی ئیتر من هی ئه‌وم،ته‌نها چونکه نیو سه‌عاتێک پێکه‌وه دانیشتین. هاوڕێکانی به حیساب خوێنه‌ری کتێبیش بوون و جار جار شتیشیان ده‌نووسی و بڵاوده‌کرده‌وه، به منیان ده‌وت براژن، ئای خوایه چه‌ند به‌وه تووڕه ده‌بووم، که‌چی ئه‌و قاقای لێ ده‌داو ده‌یووت گوێ مه‌ده‌رێ سوعبه‌تت له‌گه‌ڵ ده‌که‌ن، منیش ده‌موت: قوڕ به‌سه‌ر ئه‌و گه‌له‌ی رۆشنبیره‌کانی سوعبه‌تی وا قۆڕ ده‌که‌ن چونکه ده‌مزانی به ڕاستیانه. به هه‌موو جۆرێک ده‌مویست له‌و په‌یوه‌ندییه بێمه ده‌ره‌وه، له‌هه‌زار لاوه منیان ده‌خسته‌وه ناوی. ته‌نها له‌به‌ر ئه‌وه‌ی چایه‌کم له‌گه‌ڵدا خوارده‌وه ده‌بێ هه‌موو ژیانم ژه‌هر نۆش بکه‌م، به کۆڵاندا تێده‌په‌ڕیم و له‌و به‌ره‌وه پرسیاریان ده‌کرد ئه‌وه به‌خێرێ شوو ده‌که‌ی؟ منیش ده‌مووت شووی چی؟ ده‌یانووت با له‌گه‌ڵ کوڕێکدا بینیوویانی. خوشه‌ویسترین کچه هاوڕێم له‌ئیش له‌خۆشی من کێکی به‌خشییه‌وه به بێ ئه‌وه‌ی تامێکی بکه‌م، پرسیارێکیشی نه‌کرد بۆ تامی ناکه‌م و بۆ ڕه‌نگم وا هه‌ڵپڕووسکاوه. جارێ من نه‌موتبوو با ماڵی کوڕه بێن، هه‌موو ماڵه‌وه‌مان له‌جیاتی من ڕازی بووبوون و وتیان با ڕازییه، به بێ من دانیشتبوون. خزمانم جارێ نه‌گوازرابوومه‌وه ده‌یانووت چه‌ند منداڵتان ده‌بێ، هه‌ر خۆیان پێنج شه‌ش ناوی ناخۆشیان بۆ دۆزیبوومه‌وە.
له پڕ هه‌ستم کرد بێ ئه‌وه‌ی ئه‌و ده‌ستی به‌رم که‌وتبێ بوومه به ژنی، باسی ماکیاژ و ته‌نووره‌ی ده‌کرد که به‌دڵی نییه، ئه‌میان تۆزێ تۆخه‌و ئه‌ویشیان که‌مێک کورت. زۆر هه‌وڵی دا تا هه‌موو کۆدی مۆبایل و ئی مایلی لێ سه‌ندم و وه‌ک پۆلیسی سه‌ر سنوور که‌وته گیانی هاوڕێکانی فه‌یس بووکم، له هه‌زاره‌وه به دوو رۆژ کردنی به دوو سه‌د هاوڕێ. هه‌ر کوڕێک که‌مێ له‌و قۆزتر بووایه ده‌یووت ئه‌م هه‌تیووه کێیه؟ ده‌لایبه تا هه‌زار جنێو‌م پێ نه‌داوه. ئه‌ی ئه‌م کچه‌تیووه کێیه؟ زۆر به‌ره‌ڵا دیاره و فێری شتی خراپت ده‌کا. فه‌یس بووکه‌که‌ی خۆشی پڕ بوو له کچی جوان، ده‌مووت ئه‌ی بۆچی بۆ تۆ ره‌وایه؟ ده‌یوت من پیاوم، بۆ من عه‌یب نییه و له‌سه‌رم ناکه‌وێ. له شوێنی خۆی رامده‌گرت و به قومه ئاوێک هێمنم ده‌کرده‌وه‌و ئاوێکم ده‌کرد به‌و ئاگره‌ی له نا‌وچه‌وانییه‌وه کڵپه‌ی ده‌سه‌ندو ده‌موت، ئێ فریشته خان! خه‌تای خۆته‌و ده‌بوایه شووی پێ نه‌که‌ی. شووت به‌وه بکردایه که له‌دڵه‌وه خۆشت ده‌ویست. ئاخر ئه‌وی تر ئه‌وه‌نده سارد و ئه‌وه‌نده خاو وخلیچک بوو ده‌بوایه هه‌موو ته‌مه‌ن چاوه‌ڕێی بکه‌م، پێده‌که‌نی و ده‌یوت: تا دواجار ده‌بوایه خۆم بچم بۆ داخوازی. منیش ده‌مووت ده تازه دره‌نگه، ده‌یوت نه‌خێر دره‌نگ نییه، هیچ شتێ دره‌نگ نییه، ده‌بێ حه‌قی هه‌مووی لێ بکه‌مه‌وه، ده‌مه‌وێ ئه‌و وازم لێ بێنێ، تا هیچ بیانوویه‌کم پێ نه‌گرن بۆ جیابوونه‌وه،تا نه‌ڵێن خه‌تای من بووه، تا دڵی دایکم نه‌شکێ و باوکم زه‌خته‌که‌ی به‌رز نه‌بێته‌وه. به‌ڵام تا ئێستا بۆ نه‌گبه‌تی خۆی گرتووه، بۆیه هه‌ر ده‌ستی به‌ر ده‌ستم بکه‌وێ دێم و داوای له‌سه‌ر قه‌ید ده‌که‌م و پێشم وتووه، ئه‌و باکی نییه. هه‌فته‌ی پێشوو گوێم لێ بوو له ریزدا به ژنێکی هاوڕێی ده‌وت: ته‌نانه‌ت به‌و مێرده که‌له‌ره‌قه‌م وتووه بۆ وازم لێ ناهێنی، من تۆم خۆش ناوێ، گوێ ناگرێ، پێم وتووه، ئای چه‌ند ناخۆشه، چه‌ند به‌ئازاره،چ جه‌هه‌نه‌مێکه له‌شت له‌به‌ر ده‌م پیاوێکدا بێت و دڵت لای که‌سێکی تر، که وا ده‌ڵێم گاڵته‌ی لێ دێت و به دڵم پێده‌که‌نێت،ئه‌و پیاوانه زۆر بێ مێشکن که وا ده‌زانن گه‌ر له‌گه‌ڵ ژنێکدا چوونه ناو جێگا، ئیتر هه‌موو شتێ ده‌بڕێته‌وه‌و ده‌بێته موڵکیان، وا ده‌زانن گه‌ر ده‌ستیان به‌ر له‌شمان که‌وت ئیتر هه‌موو شوێنێکی ترمان به دڵیشمانه‌وه هی ئه‌وانه و داگیریان کردووه، به هه‌موو عه‌قڵی خۆیان وا ده‌زانن هه‌ر ده‌ستیان گه‌یشته جووته پرته‌قاڵ وه‌ک گۆرانییه فۆلکلۆرییه‌کان پڕن له رسته‌ی وا قۆڕ، ئیتر زه‌میله‌ی لێ پڕکه‌و سفره‌ی خه‌یاڵ بڕازێنه‌وه، نازانن ته‌نها شوێنێکی گرنگ لای ئێمه دڵمانه نه‌ک ئه‌و شوێنه‌ی هه‌میشه بیری لێ ده‌که‌نه‌وه‌و له کاتی نانخواردنیشدا له خه‌یاڵیاندایه، گه‌ر دڵی کچێکت بۆ خۆت برد، هه‌موو شوێنێکی تریشی ده‌به‌ی، ئه‌وان به پێچه‌وانه‌وه هه‌موو شوێنێ ده‌به‌ن و دڵمان فه‌رامۆش ده‌که‌ن، نازانن داگیرکردنی هه‌موو شوێنێک به‌بێ دڵ، هه‌موو شوێنێ ده‌کات به که‌لاوه. هه‌موو گرفتی گه‌وره‌ی خێزانه‌کانی کۆمه‌ڵگای ئێمه‌ش لێره‌وه ده‌ست پێ ده‌کا و که‌س قسه‌یه‌ک ناکا.
ئه‌وه‌تا له په‌نجه‌ره‌که‌وه ده‌یبینم و له ڕیزدا وه‌ستاوه، رۆحم چووه‌و نازانم چ وه‌ڵامێکی بده‌مه‌وه، به‌ده‌یه‌ها تێلم کردووه بۆ دادگا و ده‌نگیان نییه. به خۆشێوه نه‌وه‌ستاوه و چه‌ند ژنه هاوڕێیه‌کی تریشی له‌گه‌ڵ خۆیدا هێناوه‌و ئه‌وانیشی هان داوه داوا له‌سه‌ر مێرده‌کانیان قه‌ید بکه‌ن، چونکه جاری پێشوو پێی وتم گه‌ر هه‌فته‌که‌ی تر له دادگاوه وه‌ڵامم پێ نه‌گاته‌وه، هاوڕێکانیشم دێنم و هه‌موو دنیا تێده‌گه‌ێنم. گه‌ر ئه‌مه وا بروا زۆر گه‌وره ده‌بێ و ده‌ته‌قێته‌وه، هه‌ر هه‌فته‌ی پێشوو بوو له ڕیزدا، فرمێسکی بێده‌نگی هه‌ڵده‌ڕشت و گوێم لێ بوو به هاوڕێکه‌ی ده‌وت، نا هیچ له مێرده‌که‌ت قبووڵ مه‌که، ئه‌وانه وا ده‌زانن ئێمه پاسکیلین سوارمان ده‌بن، خزمه‌کارین هه‌میشه خواردن بخه‌ینه به‌ر ده‌ستیان. نا نه‌که‌ی و بیر له خۆسووتانیش نه‌که‌یته‌وه، با له خه‌سته‌خانه‌کان وه‌ک ئه‌و فریشته سووتاوانه چه‌شنی خه‌ڵووزێکی ڕه‌ش و بێ گیان و فه‌رامۆشکراو له‌سه‌ر قه‌ره‌وێڵه‌کان نه‌که‌وی. که‌س ئه‌و دووکه‌ڵه نابینێ که لێیان به‌رز ده‌بێته‌وە. ده‌بێ به‌هێز بی هاوڕێم، گوێت لێیه، ده‌بێ به‌هێز بی. هه‌نیسکی ده‌دا و ده‌یوت، هه‌موویان له سه‌ره‌تادا ناسکن، ئه‌وه‌ی منیش زۆر ڕۆمانسی بوو، هه‌میشه پێی ده‌وتم ئه‌و هه‌موو جوانییه چییه کچێ؟ هێنده جوانی ده‌بوایه جوانی وا قه‌ده‌غه بکرێت و گرتنی له‌سه‌ر بێ، تۆ ده‌بوایه له‌سه‌ر جوانیت هه‌موو ڕۆژێ به که‌فاله‌ت به‌ربوویتایه. منیش پێده‌که‌نیم ده‌مووت به‌ڵێ ڕاست ده‌که‌ی، له ڕۆژنامه ئه‌هلییه‌کان زیاتر ده‌عوام له‌سه‌ره، هه‌ر ئه‌و شه‌وه، شه‌وی بووکێنی تێپه‌ڕی و ڕۆژ بووه و به‌یانییه‌که‌ی پێش ئه‌وه‌ی بڵێ به‌یانیت باش، وتی ئه‌وه ده‌م و چاوت بێ مکیاژ ئاوایه، هه‌سته خێرا ئاوێکی پیابکه میوانمان ڕه‌نگه بێ. منیش زۆر تووڕه بووم و وتم ئه‌ی بۆ ده‌م و چاوی خۆتت بینیووه، ئیتر هه‌ر ئه‌و به‌یانییه دڵم لێی شکا و تا ئێستاش چاک نه‌بۆته‌وه و قه‌تیش چاک نابێته‌وە.
ئه‌وه له ڕێزدا وه‌ستاوه و نزیک و نزیکتر ده‌بێته‌وه، ئه‌مرۆش شه‌ڕێکی خوێناوی ترم له‌سه‌ر مێرده‌که‌ی پێ ده‌فرۆشێت، دێت و به‌شێکی تری ژیانیم بۆ ده‌گێڕێته‌وه و منیش وه‌ک هه‌میشه ده‌ڵێم نا جارێ هیچ وه‌ڵامیان نییه، ڕۆژێکی تریش دێته‌وه و به‌شێکی برینی دڵی خۆی هه‌ڵده‌ڕێژێ و جارێکی تریش به‌شێکی تر و به‌شێکی تر بێ کۆتایی، منیش هه‌ر تێل بۆ دادگاش ده‌که‌م و وه‌ڵام ناده‌نه‌وه، بۆیه منیش نازانم ئێستا چی بکه‌م چ وه‌ڵامێکی بده‌مه‌وه.
ستۆکهۆڵم