بۆ شێرکۆ بێکەس
![](http://www.hemin.dk/files/images/tp.gif)
دەتبینم
بەسەر خەمێکی خزەوە
لەگەڵ ئازادیی دەستی یەکتان گرتووە
جارێک تۆ ئەو هەڵدەکێشی
جارێک ئەو تۆ ڕادەکێشێ.
![](http://www.hemin.dk/files/images/tp.gif)
دەتبینم
لەگەڵ مێژوو زۆران دەگریت
جارێک ئەو برینە تەڕەکانی خۆیت تێ دەسوێ
جارێک تۆ توێکڵە لینجەکانی بێزاریی لێ دادەماڵی.
![](http://www.hemin.dk/files/images/tp.gif)
دەتبینم
بوویتە شاپەڕی باڵی فڕینێ
بە ڕەنگی خوێن، لە پێستی خۆت
ڕێگا سەختەکانی ڕوانین دەکێشیت.
![](http://www.hemin.dk/files/images/tp.gif)
دەتبینم
بە پشتی قەڵەمەکەت
لە دامێنی گڕێکی شین دەنووسیت:
وشەکانی من هیچ نەبوون
بێجگە لە ناڵینی بەرد و
هەناسەکانی سەربەستیی.
![](http://www.hemin.dk/files/images/tp.gif)
دەتبینم جاروبارێ
زێدەی عەشقی خامەکە
دەتکێتە گیرفانی کراسەکەتەوە!
![](http://www.hemin.dk/files/images/tp.gif)
ئەی ئەفسوون
چۆن توانیت بە قرچەیەکی دڵی نالی
ئەو هەموو بۆشاییە بێهێڵە پڕ بکەیتەوە.
حیکایەتی چ پێغەمبەرێکی بێگوناهیت، ئەی ئەفسوون
سەدەیەک بەر لەدایکبوون
بە شیعر سزا درا بوویت
لە بنی غەمێکی سەوزا؟
![](http://www.hemin.dk/files/images/tp.gif)
تۆ ئەی دواترین داستانی ئەم وڵاتی ئەفسانەیە
لە پرسیارێک هەزاران هۆ
لە نەوەی هەزاران پرسیار
وەڵامێک نەیدۆزیتەوە؟
![](http://www.hemin.dk/files/images/tp.gif)
ئەو لەشکرانەی لەسەر تۆ بەشەڕ هاتن
بێجگە لە هەرا..
دوای خۆیان شتێکی تریان جێنەهێشت
وە جادووگەریی دژەکان نەیتوانی
بە مشتی لێکنەچوون لە پشتی تۆ دەن ...
![](http://www.hemin.dk/files/images/tp.gif)
تۆ بە قەدی ئەم قەدەرە نیلیەدا هەر هەڵدەکشێی
ئەی زامی قووڵ.
بەسەر گالیسکەیەکی ئاگرینەوە
بە خوێنی ئەم وڵاتەدا دێیت و دەچیت
تا لە گیانی شوێندا بپژێی،
لە چاوی زەمەندا بڕوێی،
ئەی چاوساغی هەناسەقووڵ.
![](http://www.hemin.dk/files/images/tp.gif)
دەتبینم
ئەی وزەی وەرزەکانی دۆڕان
هەنووکە دەتبینم..
لەم پێچی پشووەدا،
چەرخی بێنەخشەی ئەم خێڵە گەڕۆکە
بۆ هەزاران فرسەخی تر
تینوویەتی ڕێی
بە شیعری تۆ دەشکێنێ
ئەی کتێبی کانی.
![](http://www.hemin.dk/files/images/tp.gif)
نەرویج، ناوەڕاستی ٢٠٠٠
-----------------------------------