(1)
شه‌هوه‌ته‌کانم بۆ جه‌سته‌ی شه‌هوه‌ت
ئازادیم بۆ بینینی ئازادی
ناخم بۆ بینینی ناخی
خۆزگه‌کانم بۆ بینینی خۆزگه‌کانیان
گڕیان گرتووه.
(2)
که‌شتیوان و راهیبه یه‌خسیره‌کان
گیرفانه‌کانمان پڕ له گه‌نم
دڵمان پڕ گیرفان ده‌که‌ن.
(3)
به لاپه‌ڕه‌کانی مێژوو
قاچه ته‌ڕه‌کانی مێروو وشک ده‌که‌مه‌وه.
(4)
دوای نیو سه‌ده
دوای نیوه ته‌ڕبوون بە بارانی وشکبوونەوە
گۆڕی نازه‌نینه‌که‌م هه‌ڵده‌ده‌مه‌وه
ته‌رمی خۆم ده‌بینم.
(5)
دایکم یاری بە قژی باوکم ده‌کا
باوکم به من و
چاره‌نووس به کۆنتڕۆڵی ته‌له‌ڤزیۆنه‌که.
(6)
له پێناوی به لاولاوبووندا
شێوه لاکێشه‌ییه‌که‌ی مه‌رگم هه‌ڵبژارد.
به حه‌زه سه‌رمه‌دییه‌کانی ئاسنێکی به‌ردین و
چه‌کوشی گه‌یشتن
فه‌زاکانی نه‌گه‌یشتنم ته‌سک کردنه‌وه.
(7)
چاوشارکانێم له‌گه‌ڵ ژیان کرد
چاوی نووقاند
مردن دۆزیمییه‌وه
چاوم نووقاند:
ـ یازده، دووازده، سێزده.....
له‌وساوه بە دوای ژیاندا ده‌گه‌ڕێم
نه‌مدۆزیوه‌ته‌وه
ئه‌و دره‌خته‌ی له‌ژێر سێبه‌ری بزنێک دانیشتووه:
ـ ژیان ده‌ستی له چه‌قی بازنه‌ی یاری داناوه
شاری کردووه *
(8)
که‌ڵکه‌ڵه‌ی گه‌ڕانه‌وه
له‌دوای نووستنی مرۆڤه‌که‌ی ئەودیو سرووشته‌وه
ته‌نگی پێ هەڵچنیوم
به‌سه‌ر په‌یژه کۆنه‌که‌ی ته‌مه‌نی منداڵیم ده‌که‌وم
دروود بۆ ئه‌و ئه‌فسانه‌یه‌ی
ئاوازی حه‌قیقه‌ت داده‌نێ
پۆپیته‌ی که‌ڵه‌شێر ده‌یکاته گۆرانییه‌کی پوولفرۆش و
که‌ڵه‌شێر ده‌بێته زه‌نبیله‌یه‌کی خاڵی له قووقاندن
سه‌حه‌ر خۆی ده‌قووقێنێ و بێدارمان ده‌کاته‌وه:
ـ هه ستن نیوه‌ڕۆیه.
(9)
به‌و قرچه‌قرچی گه‌رمایه
یاداشتی بزربوونی خۆم له‌و بیابانه به‌رین و چۆڵه ده‌نووسمه‌وه
که مردم
ئه‌سپسواره شاره‌زاکان ده‌مگێڕنه‌وه:
ـ کوڕه به‌نازه‌که‌ی ئاوه‌دانی.. .. ..
(10)
دونیا بیابانی حوشترانه
بیابان قه‌ره‌جێکه ته‌نیایی زۆری بۆ هێناوه
ته‌نیایی واته منێکی ته‌نیا
له‌سه‌ر ته‌می په‌نجه‌ره‌که نووسراوه
(ته‌م)
له ناوچه‌وانی منیش
( تکایه وێنه گرتن لێره قه‌ده‌غه‌یه )
له‌گه‌ڵ حه‌لواچییان ته‌خته ده‌که‌ینه حه‌لوا
حه‌لوای شیعر
هه‌موومان شیرین ده‌کا
خۆی به (تاڵ)ی ده‌مێنێته‌وه .
* یارییه‌کی کۆنی منداڵانه هه‌یه، بەم شێوەیە دەکرێت: بازنه‌یه‌ک له‌سه‌ر دیوار ده‌کێشرێ و لە ناوەڕاستی ده‌نووسرێ: (شار). ئه‌وه‌ی ده‌ستی لە چەقی بازنه‌که دانێ، ده‌یباته‌وه، واته شار دەکا.