بۆ تۆ نەرموشلتری لە ئاو
کەی دەگەڕێیتەوە
دڵم شێتبووە
دەستکێشەکانت دەخەمە سەردڵم،
پێڵاوەکانت دەخەمە ژێر سەرم
لە خەونمدا دەگەڕێیتەوە،
![](http://www.hemin.dk/files/images/tp.gif)
پێڵاوەکانت تۆزی خەمیان لێ نیشتووە
ئەوانیش وەک من بیرت دەکەن.
![](http://www.hemin.dk/files/images/tp.gif)
باران بوو پێڵاوەکانی لێ بەجێما
تینوێتی تاسەی بینینەوەی
خەریک بوو بمخنکێنێ
باراناوی ناو پێڵاوەکانیم خواردەوە
ئای لە باراناوی ناو پێڵاوی دایک و شەهید و یار
![](http://www.hemin.dk/files/images/tp.gif)
پێڵاوەکانی هەر لای سەرینەکەمە
بڕوا ناکەم
کە تەنیام
پێڵاوەکانی لە لامن
چۆن تەنیا دەبم،
![](http://www.hemin.dk/files/images/tp.gif)
کەس سەردانم نەکا
میوانم هەیە
پێڵاوەکانی لێرەیە.
![](http://www.hemin.dk/files/images/tp.gif)
وەک ئینجانە گوڵ لە پێڵاوەکانیا دەڕۆێنم،
![](http://www.hemin.dk/files/images/tp.gif)
پێڵاوەکانی پڕ دەکەم لە ئاو
بۆ ئەوەی گوێم لە شڵپ و هوڕی تەنیایی نەبێ.
![](http://www.hemin.dk/files/images/tp.gif)
لە تاریکی تەنیایدا پیڵاوەکانی دەدرەوشێنەوە
![](http://www.hemin.dk/files/images/tp.gif)
هیچ ناڵێن هیچ
پێڵاوەکانی خەوتوون
ئەبێ چ خەونێک ببینن؟
![](http://www.hemin.dk/files/images/tp.gif)
ئەگەر تۆفان هەڵکات
دەچمە پێڵاوەکانییەوە
پێڵاوەکانی دەمگەیەننە وشکایی
ئەی هەر ئەم پێڵاوانە ئەویان نەدەهێنا بۆلای من.
![](http://www.hemin.dk/files/images/tp.gif)
ئێوارەیەک پێڵاوەکانی دەبەم بۆ پیاسە و
پێکەوە جگەرە دەکێشین و قاوە دەخۆینەوە،
پێڵاوەکانی ...........
پێڵاوەکانی وەک دوو کۆتر
لە چیمەنی باخچەکەدا
دەم دەنێنە ناو دەمی یەک.
![](http://www.hemin.dk/files/images/tp.gif)
پێڵاوەکانی دەکەمە بەلەم
لە دەریای یادەوەرییەکانیا سەوڵ لێدەدەم
تا شەپۆلی یاوەرییەکی لەگەڵ خۆیدا دەمبا.
2012
ئەم شیعرەم لە ڕەخنەی چاودێر بڵاوکراوەتەوە