دۆلفینەكان پاشاكەیان عاشقترینیانە، عاشقترینیان بریندارترینیانە، بریندارترینیان باشترین و میهرەبانترین ڕۆحلەبەری دەریایە، جوانیناسێكە لە قوڵاییەكاندا نەبێت مەلە ناكات.من دەموت: ((نە دەریا هەیە و نە سەرزەمینی دۆلفینەكان، نە سەما هەیە و نە پادشا))، ئەو دەیوت: ((جێگای دۆلفینەكان سەرزەمین نییە ئاوە، ئەوەی ئەوان ئەیكەن سەما نییە قسەكردنێكە بە جوڵەیەكی عاشقانە، پاشاكەی ئەوانیش پەرستارێكە ئەو برینانە ئەپێچێ لە قوڵایی ڕۆحدان)).
منیش وەك هەموو ئەوانەی ماریا بە سەیركردن خوێنی ئەوەستاندن، پێم وابوو ماریا خۆشبەختییەكە خودا بۆ ئەم میللەتەی ناردووە، بەڵام دواتر هەندێكمان گەیشتینە ئەو باوەڕەی ئەویش جۆرێكی تری بەدبەختی و غەزەبی خوا بوو، خوا بۆ ئەم مەملەكەتەی ناردبوو، ئاخر ئەو برینەكانی جەستەی تیماركردین و قوڵترین برینی لە ڕۆحماندا بەجێهێشت .
+ پەپوولەكانی ئێوە نەخۆشن شەهرەزاد، بارانتان هەیە و ناتوانن لەبەریا بوەستن، پەلكەزێڕینەتان هەیە و ناتوانن لە سروشتی جوانییەكەی لەززەت ببینن، دۆلفینەكان لە قوڵایی دەریا و لە تاریكیدا پەلكەزێڕینە دروست ئەكەن، ئێوە باخچە دروست ئەكەن، بەڵام گوڵی نایلۆن ئەگرێت.
من پێم وت ((بەڵام ماریا كاری تۆ چییە، ئەگەر وا نەكەیت باخچەكان گوڵی سروشتی بگرن؟))
ئەوە یەكەم ئێوارە بوو من و ماریا بە یەكتری ئاشنا ئەبووین، ئەو بە ناو ئەو ئۆقیانووسانەدا دەكەوتنە ئەمسەر و ئەوسەری دونیاوە بەسەر پشتی دۆلفینێكەوە دەریا و زەریاكان گەڕابوو، لە دكتۆرێك ئەچوو هەزار ساڵ برینی خۆیی بە فەرامۆشی سپاردبێ و بۆ برینی خەڵك بژی.من تا ئەو ساتەش هامشۆكارێكی بەردەوامی ئەو سۆزانییخانە بووم مرۆڤ لەوێدا ڕۆحی ئەخستە گۆڕ و بۆ ماتەمگێڕانیش نە ئەچووەوە سەردانی.ئاخر لە ماڵی سۆزانییەكانا مرۆڤ كاتێك شتێك وەردەگرێ، زۆر شتی گرنگتر بەجێدێڵێ، سۆزانییەكان كاتێك شتێكت پێ ئەبەخشن زۆر شتی گرنگترت لێ وەرئەگرن.من لە دڵی خۆمدا ئەموت ((ئەشێت هەریەكە لەو سۆزانیانەی لەگەڵیانا خەوتبووم، خاوەنی دووچاوی وەك ئەوەی ماریا بوو بن ڕۆحی تێدا دەبینراو من نەمدیبێ، زمانی چاو زمانی ڕۆحە، هەر بۆیە كەسێكیش سەیری چاوی سۆزانییەكان ناكات، نایەوێت ئەو ڕۆحە بریندارانە ببینێت لە ناخەوە تەریقی و شەرم و ناچاری ئەیانكوژێت )).
پێم وت ((ماریا تیمارمكە، ئەو چاوانەت خەریكە ئەمكوژێت، تۆ چ ڕۆحێكی جوانت هەیە شەیتان؟!))
+ ئاسانە گوڵ بپچڕیت شەهرەزاد، بەڵام ئەزانیت گوڵ چەنی ئەوێت تا ئەبێت بە گوڵ؟ بۆیە وێرانكاری لە بنیادنانەوەی جوانی ئاسانترە.شەهرەزاد برینە جوانەكان بۆ ئەوە نین تیمار بكرێن هەتا خوێنیان لەبەر بڕوات جوانترن.
وەك ئەوە وابوو لە هەوادا ناوی كەسێك بنووسێت خۆشی ئەوێت، یا مێشولەیەكی خەیاڵی دوور بخاتەوە هەمیشە داڵغەی تێك ئەدات، لە باڵندەیەكی بریندار ئەچوو ناگەهان گوللەیەك پێكابێتی.سەرەتا كە هاتە ئەم شارەوە پیس خوی دایە خواردنەوە.یەكەم ساتی یەكترناسینمان پێی وتم
+ شەهرەزاد من هەموو جوانی و ناشیرینییەكانی ئەم شارە لە تۆدا ئەبینم، كەس نازانێت تۆ كێیت، وشكە ئیماندارێك كە پێی وایە خواپەرستی بەشێكە لە خوێنڕشتن، یا سۆزانییەك كە پێی وایە كەیفكردنیش بەشێكە لە عیشق.وەرە چارەمكە با چارەتكەم، خودای من، برینێك لە دڵما بوو خوێنی لەبەر ئەڕۆیی، خوێنی پەشیمانی وئازاری ویژدان، خوێنی سەرگەردانی و ئالودەبوون.تەماشای برینەكانی كردو خوێنیان وەستا، دواتریش دەستی لێدان‌و ئاسەواریان نەما.ئیتر نەمن لەسەر پێخەفی سۆزانیەكان خەوتم‌و نەبۆسێكس كردنیش هاتنەوە خەیاڵم.ئەو ڕۆژانەشی بەشاگردی لەمەیخانەكەدا چنگم ئەكەوت نیوەیم ئەدانێ بەبێ ئەوەی سێسكسم لێیان بووێت.ماریا پێی وابوو مرۆڤ ڕوەكخۆرێكی سروشتیەو لەخۆڕا خۆی هاویشتووەتە بازنەی گۆشتخۆرەكانەوە .سەرەتا پێكەوە بەشەقامەكانی شارا ئەگەڕاین، ئەوەی بۆباسكردم ڕۆژێك لەڕۆژان فریشتەی دەریابووە نیوە ماسیەكەی گۆڕاوە بۆ لەشێكی ئاسایی، ئەمە ڕێك ئەوكاتەبووە هەستی تۆڵە كردنەوەو خوێن ڕشتن لەناخیدا چەكەرەی كردووە.سەرەتا باڵندە بریندارەكانی تیمار ئەكردو ئەیوت (مرۆڤ باڵندەو گوڵی خۆشنەوێت ناتوانێت بۆ تۆزێكیش بێت ئەم دنیایە جوان بكات).چەند ساڵ برینی باڵندەو گوڵ‌و مرۆڤی ساڕێژ ئەكرد، بەبێ ئەوەی بگەڕێتەوە سەربرینی ئەو دۆلفینەی لەدڵیدا خوێنی لێئەهات .من پێم وابوو ئەو زۆر لەززەتی لەئەشكەنجەو ڕەنجی عیشقێك ئەبینی .ئەو ئەیوت ((ئەچمەوە دەریاو لەوێ دۆلفینێكی تر ئەبێت خۆشم بوێ و خۆشی بووێم، لێرە كەس نیە سەمای دۆلفینەكان بزانێت، وشكانی شوێنێكی بۆ میهرەبانی‌و عیشق‌و قوڵایی تیانیە)).خەڵكی شارەكە هەندێكیان ئەیان وت:(سەرەتا ماسیگرێك ڕاوی كردووەو زانیویەتی نیوەی ماسیەو نیوەی بنیادەمە وتویەتی ئەمە گۆشتی ناخورێ‌‌و بۆ فرۆشتن ناشێت لەنەسلی مرۆڤە بۆیە ویستویەتی لاقەی بكات، لەترسی ئەوەی نەبادا خودا هەزار ساڵ لەئاگری جەهەننەما بیسوتێنێ دەستبەرداری بووەو وتویەتی ئاخر مەگەر دەكرێ ماسی لاقە بكرێ؟!))بەڵام ئەو نەماسی بوو نەبنیادەم، وەك خۆی ئەیوت (دۆلفینەكان هەریەكەیان عاشقی جۆرە گوڵێكن لەدەریادا، بەڵام ماریا بەدوای گوڵی وشكاوەكیدا گەڕابوو بۆ سەر گۆڕی یار، دۆلفینەكانی هاوڕێی پێیان وتبوو خاتوون تۆ نیوەت لەمرۆڤ ئەچێت بۆیە عاشقی گوڵی وشكاوەكیت)، بەڵام ئەو تێكەڵەیەك بوو لەهەردووكیان .
ماریاو سەگەكەی من دۆستایەتیەكی سەیریان هەبوو، من پێم وابوو ئەمە ئەو تاڵە دەزوەیە خودا چارەنوسی منو ئەوی پێ بەستووەتەوە، ئاخر خودا زۆرجار چارەنوسی مرۆڤ بەدەزوی لەوە بچوكترو باریكتریش پێكەوە دەدورێ. بەجۆرێك لەسەیری سەگەكەمدا نوقم ئەبوو ئەتوت بۆنهێنیەكی شاراوە لەودا ئەگەڕێت . لەو ساتانەدا زیاتر لەپەری دەریای ناوتابلۆكان ئەچوو كە بۆ هەوا گۆڕین دێنە سەربەردەكانی كەنار دەریا. حەزم لێبوو ئەوستیانە سورە ئاوریشمیە لەمەمكەكانی بكەمەوە ختوكەی ئەداو پێی بڵێم (كەئەزانیت مەحكومیت بەوەی ڕۆژێك بگەڕێیتەوە دەریا، بهێڵە مناڵێك لەنەسلی تۆ بۆ مرۆڤایەتی بخەمەوە)، بەڵام عیشقی ڕاستەقینە هەمیشە ترسی لەوەیە لەتێكەڵاو بوونی جەستەكانا ڕۆحەكان بمرن. بەبێ ئاگاییەوە لێم پرسی
-ماریا تۆ لەم سەرزەمینەدا كەست خۆش نەویستووە؟
+ خۆشم ویستووە شەهرەزاد، هەموو مرۆڤێكم خۆش ویستووە بەڵام عاشقی كەس نەبووم، ئەزانم پەژارەی من تۆشی نیگەران كردووە، بەڵام ئاوێنەكانی ئەم شارە پیربوون‌و مردنی خۆمم نیشان ئەدەن.
-ماریا غەریبی لەڕۆحی تۆدایە بۆیە لەسەر ئەم ئەستێرە هەست بەغەریبی ئەكەیت، وانیە؟
+ لەهەر جێیەكدا جوانی خرایە گۆڕ هەموومان غەریبین، لەهەر ژینگەیەكدا جوانی باری كرد حەقیقەت وەك نەشتەرێك وایە هەرچۆن كاری پێبكەیت بریندار كەرە، تەنانەت بۆ نەشتەر گەریش، بۆیە من، تۆ، تەنانەت سەگەكەی هاوڕێشمان غەریبەین.
ئەو غەریبە تیماركردنی برینەكانی وەك جۆرێك لەهەڵاتن لەپەژارەیەكی غەریب سەیر ئەكرد، وەك جۆرێك لەتۆڵە كردنەوەیەكی لەززەتبەخش ئەیبینی. وەك چۆن دڵەشكاوەكان هەوڵئەدەن لەئازارە دەرونخۆرەكانی حەقیقەت هەڵبێن لەمەستیدا، ئاوا لەئازارەكانی خۆی هەڵدەهات. بەڵام اخ ماریا چی ئەبوو سەگەكەت لەبەر خاتری من خۆشویستبا، نەك من لەبەر خاتری سەگەكە؟
پایزێكیان من و ئەو بۆ سەیری ڕوتبوونەوەی درەختەكان چووبووینە دارستانێكی دورە دەست‌و تەنیا، باڵندەكان بەجۆرێك بەسەر درەختەكانەوە نیشتبوونەوە سێبەرەكەیان هەرگیز لەسێبەری درەختێكی بێ گەڵا نەئەچوون، ڕوی خاكە ڕوتەكەش بەپەڕی كۆنی ئەو باڵندانە داپۆشرابوون‌و بووبوون بەفەرش، لەخەمی زستانێكی سەختدا كەسەریان ئەخوارد. لەهەندێك جێگای چاڵ‌و چۆڵیشدا ئەو گەڵایانەی (با) نەیبردبوون ڕوی خاكەكەیان گەڵاپۆشكردبوو. ئەو لەخەمی سەفەرێكدا نوقم بووبوو نەیكردایە ئەیكوشت، من دەمزانی ڕۆژێك دەبێت ئەو سەفەرەبكات. ڕۆژانەش جگەرەی لەچاوەڕوانیدا ئەكێشاو لەسەر دیواری ژورەكەشی وێنەی دۆلفینێكی سپی هەڵواسیبوو، دۆلفینێك دوای ئەوەی ساڵەهای ساڵ خۆشی ویستبوو، بردبوویە قوڵایی زەریاكان‌و سەمای لەگەڵ كردبوو، نەریتی دۆلفینەكانی فێركردبوو. ماسیگرێكی چاوچنۆك دۆلفینەكەی بەزیندوویی ڕاوكردبوو، پاشان بەدیار چاوی ماریاوە لەكەناری دەریا فرۆشتبووی بەقەسابێك. ماریا سەرەتا خولیای تۆڵەكردنەوە هێنابوویە وشكانی‌و دواتریش تێگەیشتبوو باشترین تۆڵەكردنەوە ئەوەیە بیری خوێن ڕشتن لەمرۆڤدا بكوژی، نەك ئەوەی كارێك بكەیت هیچ جیاوازیەكت نەبێت لەگەڵ كەسێكدا دەستی بەخوێنی دۆلفینەكان سورە. هەندێك جار ئەهات بەخەیاڵما كەس نازانێت چ ڕێگایەك ئەویان بردووەتە سەر دەریا، لەم وڵاتەدا ڕوبارەكانی ئێمە لەبیابانا ون ئەبن‌و بیابانەكانی ئێمەش لەسەرابا ئەخنكێن. قسەكانی ماریا ڕاست بوون ئاخر هەستی تۆڵەكردنەوە مرۆڤ ئەباتە ئەو سەرزەمینانەی بەخەیاڵیش قاچی مرۆڤ نایان گاتێ. ئەو ساتەش ماریا سەیری گەڵای درەختەكانی ئەكرد بەدەم باوە ئەفڕین وتم
-ماریا ئەم وڵاتە ڕوبارێكی تیانیە ماسیەكی پەنجا كیلۆیشی تیابژی، خەیاڵ پڵاوانە بەدوای دەریایەكدا وێڵی دۆلفینێكی تیابێ، خۆت ئەزانیت دەریای بێ دۆلفینیش دەریایەكە مرۆڤ ئەبێت تیایدا بۆ نهێنیەكانی مردن بگەڕێ نەوەك ژیان.
وەك دۆلفینێك لەسەر خاكێكی بێ دەریاو ڕوباردا كەوتبێتە دەرەوەی ئەم هەسارەوە، یا لەقوڵایی سەرابی بیابانێكدا مەلەبكاو خودا لەچارەی نوسیوە تاهەتایە لەو خاكە بێ دەریاو دۆلفینەدا بژی، تێكەوتبوو. ئاخر یادەوەری ئەو پڕبوو لەو دۆلفینە میهرەبانەی بەكەنارەكانی جوانیدا گێڕابووی‌و سەمای پەنگوین و باڵندە و مرۆڤەكانی نیشان دابوو، لەهەر كەنارێكدا پێی وتبوو، وشكانییەكان جێگایەكن لە دوورەوە جوانن، هەركات هەستتكرد لە ناویاندا ئیدی ئەوكاتەیە تەلیسمی جوانییەكەیان بەتاڵ بووەتەوە.
من پێم دەوت(ماریا تۆ كوشتەی عیشقێكی لە ئاودا، بەڵام بیرت نەچێت ئێستا لە وشكانیدای) ئەو ئەیوت (ئەبێت بگەڕێمەوە قوڵایی ئاوەكان. من هاتم بە دوای گوڵدا بگەڕێم و لەو شوێنەدا دایان بنێم دۆلفینەكەیان تیادا ڕاوكرد، تاكو لە جێگای مردنی ئەودا بەدەم شەپۆلەكانەوە گوڵی سەرئاوكەوتوو مەلە بكەن. خانووەكانم ئەبینی ئەموت وای سەیركە ئەم هەموو وێرانە چدەكەن لێرە؟!ئەم هەموو زیندانە كێ دروستی كردوون؟! درەنگ تێگەیشتم لێرە هەموو كەسێك زیندان بۆخۆی دروست ئەكات. لێرە ناتوانیت بەناو شەپۆلەكاندا بخزێیت‌و سەما بكەیت، خۆت فڕێ بدەیتە ئاسمان و بچیتەوە ئامێزی ئاو، لەسەر زەمینێكدا پڕە لەتەنە ڕەقەكان بەڕاستی سەیرە بەكوێری بڕۆیت و نەكەویت!!)
ئەموت (بەڵام ماریا ئێوەش بەتاریكیدا ئەڕۆن، ئەوەتانێ ئاسمانێكتان نییە خۆرێكی تێدا هەڵبێ و شەوێكتان نییە مانگەشەو و ئەستێرەكانی تیا ببینن، چەندە ئەچنە قوڵایی دەریا ئەوەندە لە ئاسمان و تریفەی مانگ بەدوورن. )
+ تۆ نازانیت شەهرەزاد من چ ژیانێكم گوزەراند، من و ئەوان كۆمەڵێك بووین بەدەم گۆرانییەكی مەستانەوە هەتا قوڵایی دەریا بێسنوورەكان بەناو ئاوەكاندا دەخزین و باخچەیەكی چكۆلەمان دروست ئەكرد لەناو باخچەیەكی گەورەتردا، هەریەكەمان عاشقی جۆرە گوڵ و جوانییەك بووین، كاری هەریەكەشمان جوانكردنی بەشێكی دەریا بوو، من هەرگیز ڕۆژێك بەدونیای دۆلفینەكان نامۆ نەبووم، وەك ئەوەی بەدنیاكەی ئێوە نامۆم. دۆلفینەكان ڕێ و ڕۆشتنیان بەناو ئاودا جۆرە سەمایەكی مەستانەیە. لە دەریادا نە كات هەیە و نە شوێن، ژین سترانێكی عاشقانەیە و خودا فڕێی داوەتە دەریاوە و ئەمەی بۆ مرۆڤ ڕەوا نەبینیوە)
ئەو پێی وابوو مرۆڤەكان هەمیشە لەدەریادا ئەخنكێن‌و عیشقەكانیش لەوشكانیدا، خودا دەریای بۆ عیشق دروستكردووەو وشكانیش بۆ چاو چنۆكی‌و سیاسەت‌و یەكتری قڕكردن. ئەو ئەیوت
+ ئەوە ئیشی مرۆڤەكانە بەدەستی خۆیان فریشتەكانی ناو ناخیان ئەكوژن، بەڵام دۆلفینەكان كاری وەها ناكەن، لەدەریادا هەمووان قەرەجن، ئەوەی قەرەج نەبێت بەختەوەری نادۆزێتەوە، وەك چۆن لەوشكانیدا قەرەجەكان ناتوانن خۆشبەخت بن لەدەریادا بۆ نیشتە جێكانیش هەمان شتە .
ئەمەی لەكاتێكدا وت من خەیاڵم چووبووە سەر مەمكەكانی بەئەندازەیەك خڕبوون لەژێر ستیانە سورەكەیدا لەدووپرتەقاڵی سور ئەچوون.
شەوێك لەشەوە تاریكەكانی زستان بوو ماریا بانگی كردم لەپشت دەرگای حەوشەكەوە، ئەوشەوە كەمانچەژەنە هەژارەكەی شاریان دوای چوار ڕۆژ بەمردوویی دۆزیبووەوە. چەندڕۆژ پێش ئەوە ماریا چەند سەعات گوێ ی بۆگرتبوو، بەڵام هەواڵی دڵتەزێنی كەمانچەژەنەكە پەژارەیەكی ئەوەندە سەخت بوو، ماریا بەردەوام ئەیوت( حەیف شەهرەزاد، حەیف شەهرەزاد، سەیركە جوانیەكان چەند بەبێنازی ئەمرن)لەپەپولەیەكی هەتیو ئەچوو لەناو ئەو هەموو خوێنەدا لەبرینەكانی شارەوە ئەهاتنە دەر
وتم ماریا بەڵام تازە لەگەڵ ئەو مردووەدا چی ئەكرێ؟
+ سەیركە شەهرەزاد، پێغەمبەرەكانیش بۆ ئەوە نەهاتوون مردوو زیندووبكەنەوە، بۆ ئەوە هاتوون زیندووەكان نەمرن، بۆ ئەوە نەهاتوون خوێن بكەنەوە ناو برینەكان، كاری منیش چارەسەری زیندووانە نەك مردووان.
من دەمزانی ئەوەی ماریای بۆ ئەمشارە هێناوە دڕندەیی مرۆڤ بوونەك خۆشەویستی، بەڵام خۆی ئەیوت (خودا ویستوویەتی لەم شارەداخوێن بووەستێت)دوای ساڵ های ساڵ لەسێدارەدانی تێگەیشتم ئەو سەر لەبەری ژیانی منی وێران كردو لەسەرەتاوە دروستیكردەوە . دوای ئەوەش ئازارو ڕەنجێكی زۆری كێشا ئافاتێكی سەیرو ترسناكی بۆ ئەم وڵاتە هێنا، ئەویش ماجەرای ڕوخاندنی دەسەڵاتەكان‌و پەشێوی بوو، وەك ئەوەی خودا تاهەتایە غەزەبی لەسیاسەت‌و كورسی دەسەڵات لەم وڵاتەدا گرتبێت، لەدوای یەك دووساڵ بەیەك شێوە ئەڕوخان. ئەو كچێك بوو كاتێك ئەگریا ئیتر گریان فایدەی نەبوو، یاخود تەنیا شتێك بوو بۆ كەمكردنەوەی ئازاری خۆی نەك ئەوەی بەفرمێسكەكانی بەربەكارەساتێك بگرێت. ئێوارەیەك لەو ئێوارانەی لەبازاڕەوە گەڕایەوە سەر تەرمی كچە هاوڕێكەی ئەوەندە گریا ترسم لێنیشت دەریایەك فرمێسك بڕێژێ‌‌و تیایدا ببێت بەدۆلفین . ئەوهاوڕێیەی ساڵەهای ساڵ لەناو عیشقێكدا زیندانی بوو، لەناو دڵیدا پەنهانی كردبوو. خەڵكی پێیان ئەوت خودا لەو ئێوارەدا موعجیزەی پێبەخشیوە، بەڵام خۆی ڕای وابوو لەم سەرزەمینەدا موعجیزەش ببارێ بەرمن ناكەوێ‌‌و چاری برینەكان ناكات، مادام ژیان بەردەوامە برینیش بەردەوامە.
پەیوەندیەكی سەیری بەمن‌و ئەو كچەوە هەبوو، پێی وابوو منو ئەو كچە هەرگیز ئەو تاڵە خوداییە نادۆزینەوە منو ئەو پێكەوە ئەدورێ هەتا بەزمانی قەرەجەكان گۆرانی نەڵێین.
ئەوە دووەمین ئێوارەی جەنگ بوو پێم وت( سەیركە ماریا ئێمە چكارەین لەم وڵاتە بەدفەڕەدا، كێ ئەڵێت تۆش بەو هەموو برینە ئەوێریت، باخودا موعجیزەشی خستبێتە چاوەكانی تۆو پەنجەكانتەوە، بەڵام لەم خاكەدا تەنانەت موعجیزەش مایەی بەدبەختیە. سەیركە ماریا فریشتەكان كاتێك دێن باخچەكانی جوانی بوون بەوێرانە، موعجیزەكان كاتێك دێن ئێمە ئیتر بەگۆڕەكانیش ڕازین. ئیتر ئەو كاتەش خوێن بەربوون‌و ساڕێژكردنیش چ كەڵكێك ئەگرێ، كەتۆ كەڵكی ژیانت پێوە نەمێنێ، عیشقێك نەمێنێت گۆرانی بۆ بڵێیت، گوڵێكت نەبێت ئاوی بدەیت؟)
پێی وتم ((من ئەتوانم برینی دڵی جەنگاوەرەكان ساڕێژبكەم، بەڵام ئەو برینانەی پشاكان خوێیان تێئەكەن تەنیا خۆیان ئەتوانن ساڕێژی كەن، تۆ نامەكەی خۆت بنوسەو لەبوتڵی شەرابێكدا بیدە بەدەم ئاوا، خۆ دۆلفینك هەر ئەبێت لەقەسابخانەكە ڕزگاری بێت))
بۆ شەوی دواتر لەناو خوێن‌و برینەكاندا خەریكی وەستاندنی خوێن‌و نەهێشتنی برینەكان بوو، سەرەتا جەنگاوەرە كەم دەرامەتو هەژارەكانی تیمار ئەكرد، ئەوەیاسای ئەو بوو، هەمیشە ئەیوت (لەم خاكەدا تەنیا هەژاران ئەكوژرێن، بەڵام عومری هەمووان بەهەدەر ئەڕوات، مرۆڤ لێرە بەدەستی خۆی لەپێناوی هیچدا سەرقاڵی وێرانكردنە)لەگژوگیا دەرمانی نەخۆشیەكانی دروست ئەكردو ئەیدا بەو نەخۆشانەی برینیان نەبوو، پێیان ئەوت ((لەخوێنی باڵندەكان مەرهەم دروستكە))، ئەو پێی ئەوتن (ئێوە لەحەقیقەتێك هەڵدێن لەڕۆحتاندایە، فریشتەیەك ئەكوژن ئەوەتانی لەناو دڵتاندا، كێشەی ئێوە ئەوەیە هەموودرۆكانتان بەناوی حەقیقەتەوە ئەكەن، هەرگیز لەخوێنی گیانەوەران دەرمان دروست ناكەم و گوێ لەئەفسانەی شەڕە پڕوپوچەكانیشتان ناگرم، ئێوە جەنگاوەرن‌و دوژمنەكانیشتان جەنگاوەر، ئێوە ڕۆحتان هەیەو ئەوانیش هەیانە، ئێوە دڵتان هەیەو ئەوانیش خاوەن دڵن)من پێم ئەوت (ماریا بەڵام چڵەگیاكانیش خوێنیان هەیە)
+ خوێنی چڵەگیا شتێكی ترە عەزیزم، وەك چۆن كێشەی ڕوەكخۆرەكان شتێكەوكێشەی گۆشتخۆرەكانیش شتێكی تر، بۆ خوێنی گیاو مرۆڤیش بەهەمان شێوەیە، سەرەتا دەبێت برینی مرۆڤ ببەستین دواتر بیر لەهی گوڵ‌و گیابكەینەوە.
لەو شەوەدا كەلەبەر باراندا باخچەكانی شار مۆسیقایەكی غەریبیان لێئەدا، لێم پرسی (ماریا تۆهەرگیز بیرت لەوەنەكردووەتەوە عاشقی ئادەمیەك بیت؟)ئەگەرچی خۆشویستنی ئادەمیەك‌و ماسیەك بەبۆچوونی من بۆ ئەو وەكو یەك وابوو، ئاخر كەسێك نیوەی ماسی بێت و نیوەی بنیادەم چ جیاوازیەكی هەیە بۆئەوەی مرۆڤێكی خۆشبووێ یا ماسیەك؟بەڵام ئەو بەبێباكیەوە وتی (عیشق لەم سەرزەویە وشك‌و برینگەدا جێی نابێتەوە، وەك چۆن ماسی لەسەرابا مەلەی پێناكرێت، دۆلفین ناتوانێت بەبیابانا سەفەر بكات، منیش ناتوانم لەم خاكە خوێناویەدا عاشق بم)
من بەڕاستی عاشقی بووبووم‌و كەوتبوومە ناو تەلیسمی بونەوەرێكی غەریب، ئامادەبووم هەتا مەلەكوت بەپێی خاوسی یەدوایدا بچم و بیرو بۆچوونەكەی ئەویش پێچەوانە بكەمەوە . كەسانێك هەن ناوازەو دەگمەن دەستی قەدەر لەپڕو لەناكاو فڕێی ئەداتە ژیانتەوە، هەرلەوساتە كت‌و پڕەدا ئەفسونێكت لێ َئەكەن، چارەنوست بەو جێ پێ جێماوەوە گرێ ئەدەن لەسەر خاكی خەیاڵو بەفری یادەوەریەكانت بەجێی دێڵن، ئەشێت خاكەكە ببێت بەخۆڵەمێش، بەفرەكەش بەئاو، بەڵام شوێن پێكانی ئەو نە ئەسوتێن و نەئەشتوێنەوە. ئەگەرچی بۆنی تەنیایی ئەو تامەلەكوت ئەڕۆیشت‌و هەمیشە جلەخوێناویەكانی بەتەنافەكانی بەرخۆرەتاوا هەڵدەخست، ڕێگای سپێدەكانی ئەبردەوەسەر ئەو ئێوارە مردووانەی پیرەكان بەسەر یادگاریەكانی جوانیا ئەگریان، لەگەڵ ئەوەشدا باكی بەبرینی خۆی و چارەكردنی تەنیایی خۆی نەبوو.
پێم وت ((دەخیلتبم ماریا لەم مەملەكەتە غەریبەدا جێم مەهێڵە، دڵی یاسەمینێك مەشكێنە كەئەو دڵی شكاوە )). كەچی ئەو چەند كەیفو خۆشبەختی دروست ئەكرد بۆخەڵك خۆی وەك مردویەكی بێ مەیل لەدنیا ئەژیا. وتم ((ماریا من عاشقی تۆم، ئەمەش واتە یاخی بوون لەخودا، ئاخر من كەسەیری ژیانی خۆم ئەكەم لە ئیسفەنجێكی هەڵواسراو ئەچێت نیوەی تەمەنی خوێنی هەڵمژیبێ و ئەو نیوەكەی تری خوێنی لێبتكێ، لەنیوەیدا ئافات باریبێ‌‌و لەنیوەكەی تریدا تەرم كۆكەیتەوە)). بەڵام ئەو، وەك ئەو باڵندەی هەمیشە بەئاسمانا ئەفڕێ‌‌و هەرگیز ناكەوێتە داو، دەستەكانی گرتم لەسەر دڵی دایناو وتی (وەرە شەهرەزاد شەیتانەكەی ناومان بكوژین، منو تۆش هەریەكەمان شەیتانێك لەو شەیتانانەمان تیادا ئەژی خوێن لەسەر شەقامەكانی جوانی بەجێدێڵن، ئێمەش هەرهەموومان سەربازێكی خودە لەسەرین لەم جەنگی جوانیەدا، كەسمان نیە ئارەزوی ئەوەنەكەین تەسلیمی مردن نەبین نەوەك جوانی، خوێن بەخۆڕایی ئەدەین، بەڵام جوانی بەپارە ئەفرۆشین، سەیركە شەهرەزاد دنیا لەم خاكەدا خەریكە وێران ئەبێت ))
وتم ((ماریا، ئەمە بازاڕی خوێنە مەیانی جەنگ نیە، ئێرە مەحشەری داوێن پیسیە سۆزانیخانە نیە، سەیری چاوەكانم بكە، منیش ئەم غەریبیە بینایی لێڵ كردووم، سەیرمكە ماریا سەیرمكە، ئەم خاكە بۆگەنە، ئەم لیتاوی خوێنە پێغەمبەرەكانیشی بەدڵشكاوی‌و دەردە داری ناردەوە لای خوا، پێغەمبەرەكانیش شانیان دایە ژێرباڵی ئەم ئەستێرە نەخۆشە ڕاست نەبوویەوە، تۆ بەتەمایت بەمن چاكبكرێ؟من نازانم ماریا پیاوانی ئەم مەملەكەتە بۆچی تەنیا لەماڵی سۆزانیەكان‌و جەنگەكانا پێئەكەنن، پێم بڵێ ماریا ئایا دەكرێت گۆشتی خۆتت دەرخوارد بدەن‌و ببیتەوە بەمرۆڤ؟سەیركە ماریا عیشق كوژەكان ئەم سەرزەمینەیان بەئایدۆلۆژیا وێرانكرد، ئەگەر ئەوان دڵی جەنگیزخانیان نەبردایە بەلەشكرێك ڕەشەباوەنەئەهات، بەدیارچاوی سوڵكەرەكانەوە عیشقیان نەكوشتایە شتێك نەبوو دڵی ئەوان بكوژێت، شوشەی بادەكانیان لەم شەقامەدا نەشكاندایە شتێك نەئەبوو ڕۆحی ئێمە ببڕێت، تكات تیائەكەم ماریا من بەم دڵەكوژراوو ڕۆحەهەلاهەلامەوە ناتوانم درێژە بەژیانی بێتۆیی بدەم)).
پێی وتم(( من ناتوانم وەفای دۆلفینێك بدەم بەتۆ بەدیار چاومەوە بەقەسابخانەیەكیان فرۆشت، لەناو عیشقی تۆدا بژیم‌و تۆڵەی خوێنی ئەو لەبیركەم، ژیان لێرە ژەهرێكی شیرینە شەهرەزاد، ئەو پێڵوانەی خوێنیان لەبەر ئەڕوات جوانتر ئەو ژەهرە ئەبینن، ژیان باڵندەیەكی خەیاڵیەو تۆش مەهێڵە لەجێگایەكدا لانەبكات وەفای تیادا قاتی بووبێ، منیش نامەوێت لەم خاكەدا هەر پەڕێكم بەدەستی ئیزرائیلێكەوە بێت، ئەمەوێت بَگەڕێمەوە قوڵایی دەریاو بیریشت نەچێت جوانیش بەشێكە لەئازار، ئەوەی ئازار نەچێژێت لەحیكمەتی جوانیش تێناگات)).
اخ ماریا، بۆ بەتەنیایی بەجێت هێشتم، لەبری ئەوەی وێرانەیەك تێك بدەیت‌و جوانی لەجێگەكەیدا دروست بكەیت، وێرانەیەكت وێرانكردو لەجێگەیدا وێرانەیەكی خاپور ترت دروستكرد، ئاگات لێی نەبوو گریان وەك بوركانێك لەناوەوە ئەیكردم بەخۆڵەمێش‌و من هەرگوڵم تیادا سەوز ئەبوو، خوێن و گوڵ‌و ماچم لەچاومدا نیشان ئەدای و باكت نەبوو، ئەو چەقۆیانەم نیشان ئەدایت لەدڵت دابووم‌و باكت نەبوو، ئێستاش ئەبێت هەرلەو جێیەدا لەبەر بارانا بووەستم تۆم تیادا لەدەست دا. تۆپێت وتم دۆلفینەكەیان لەژێر ئاسماندا، لەدەریادا كوشت‌و خوداش لەو تاریكیەی ئەڕوانی، تۆش ئەم دۆلفینەت لەئاسمانا كوشت‌و دیسان خوداش بەبێدەنگی سەیری ئەكرد، اخ ماریا لەناو ئەم تابووتە نەفرەتیەی عیشقدا بووپێت وتم ((ئەڕۆم بۆ ئەوەی چیتر ڕۆحی مردووی شارەكان ڕانەچەڵكێ‌‌و بەدەم خەوەوە جوێنم پێنەدەن، تاجارێكی تر ئەم سەما ڕۆحیە نەگەڕێتەوە مەیخانەی پیربوون‌و مردن‌و، بەسەر تەرمی گوڵە تەنیاكەوتەو كەناریە كەسیرەبووەكاندا نەگری، شوێن چەقۆكانی پڕنەكەن لەژەهر. پێم وتی ماریا پێم وتی، زەوی ئەم دێوە دڵی نیە، دڵی هەبووایە خاوەن دڵەكان خۆیان نەئەكوشت، ئەم وەحشیە ڕۆحی نیە، ڕۆحی هەبووایە خاوەن ڕۆحەكان گۆڕیان بۆ ڕۆحی خۆیان هەڵنەئەكەند، پێم بڵێ ماریا پێم بڵێ، كێ دوای مردنیش ئەو برینە ئەبینێ لەسەر دڵت خوێنی لەبەر ئەڕوات؟؟
+ ئەڕۆم شەهرەزاد، ئەم خاكە ژەنگگرنتووە جێدێڵم، وەك ئەو فیشەكانەی لولەی تفەنگە ژەنگگرتووە جێدێڵن، خاكێك لەبۆنی باروت‌و، سە وزبوونی مردن‌و، هەناسەكانی خوێن‌و، كوشتنی كۆترە سپیەكان .
((بەڵام ماریا دوری یار دەردێكە سەرەتا حەكیمەكان ئەكوژێت، بۆخوێن ڕشتنیش هەزار ڕێگا هەیە، بەڵام بۆعیشق تەنها دەرگایەك هەیە، دەرگایەك‌و هیچی تر، دەرگایەك كەكردتەوە دەرگای هەموو نابووتیەكانت لەسەر دائەخرێت. پێم بڵێ ماریا لەنیگاكانتا وەختە ببم بەئاو، ببم بەدڵۆپێك خوێن لەم خاكە تینووەدا. وەك پیاوێك سەیرم مەكە ساڵەهای ساڵ لەباوەشی سۆزانیە ڕۆحشكاوەكانا خەوتووم، مەمكە خڕو گەورەكانیانم كردووە بەسەرین، وەكو كەسێك بم بینە نیوەی عومری داوە بەدەم (با)ی ساڵەكانی تەنهاییەوە، ڕاستت بووێت ماریا منو برین دوو دوژمنی سەر سەختی یەكترین، ئاخرگشت كەسێك بەرگەی جوانی ناگرێت وەكچۆن گشت كەسێك بەرگەی نابووتی ناگرێت، ماریا ئەم جوانیەی تۆ كوشندەیە)).
بەئەسپایی وتی (لەبەر برینەكانی منە باران ئەبارێت، وانیە شەهرەزاد؟)وەك كۆترێكی باڵشكاو لەو ئاسمانە بڕوانێت هەرگیز جارێكی تر ناتوانێت تیایدا بفڕێت، سەیرێكی ناوچاوی كردم‌و وتی (حەقم بدەرێ كۆترە دڵبریندارەكەم، سەیركە دڵی منیش بەچ ئاوازێكی حەزین لێ ئەدات، سەیركە چاوەكانی خۆت كاتێ سەرنجی ئەو باڵندە گۆشتخۆرانە ئەدەن بەئاسمانی جەنگەكانەوە چاو بۆ لاشە جێماوەكان ئەگێڕن، ئەو كچانەی ئەبنە دیلی ئەڵقەیەك‌و لاشەیەكی بەجێماوی كوشتارگاكان، ئەو پیاوانەی بەڕۆحێكی سپیەوە دێنە جەنگ‌و بەچ وێرانیەكەوە ئەگەڕێنەوە، ئەو سەركردانەی لەناو خوێنی ڕژاوی دووبەرەی دژبەیەكدا پێكە شەرابەكانیان لەیەكتری ئەدەن. من دەبێت بڕۆم شەهرەزاد، كچە دڵشكاوەكەی دەریا ئەبێت بڕوا پادشا ببیینێ، ئەبێت ئەم تەنیا دەرفەتە لەدەست نەدەم‌و لەڕێگای كچێكی نەخۆش‌و پەككەوتەو هیوا بڕاوەوە ڕۆحی باوكێكی نەخۆشیش لەناو خوێنا ڕزگار بكەم، ئاخر بەشێك لەكارەساتی ڕۆحی ئێوەش ئەوەتانێ لەناو ڕۆحی ئەودا)).
بۆئەوەی كەمێك بیترسێنم وتم((بەڵام ماریا ئەوان واشەیان هەیە بۆ ئەوەی بێچووە كەروێشكەكانیان بخەنە بەردەست، ماریان هەیە بۆ ئەوانەی ئەیانەوێت بەبیرو باوەڕیانەوەبدەن، پڵنگیان هەیە بۆ ئەوانەی كەڵبەیان هەیە، تیمساحیان هەیە بۆئەوانەی ئەیانەوێت بەناوئاودا بڕۆن، هەتا بۆ ئەوانەش بەپەروانەی سپیەوە ئەچن پەپولەی ژاراویان هەیە. تكات تیائەكەم ماریا مەچۆ، لەوێ ئەگەر هیچت لێنەكەن دڵەپاكەكەت ئەكوژن‌و دەریاو دۆلفینت بیر ئەبەنەوە)).
(لەدەریادا ماسی گەورە ماسی بچوك ئەخواو لەوشكانیدا مرۆڤی گەورە شار قوت ئەدات)ماریا وای دەوت، بەڵام اخ خودایە هیچ هێزێك ناتوانێت وێنەی كارەساتێك وەرگێڕێتەسەرزمانی نوسین. ئەو ئەگەرچی مەرگی دۆلفینە عاشقەكەی‌و ئەو دۆلفینانەشی بینیبوو بەهۆی تێك شكانی كەشتیە نەوتەكان‌و تاقیكردنەوە ئەتۆمیەكان‌و ڕاو كردنەوە تیاچووبوون، بەڵام بێباك بوو لەمردن، هەرگیز ترسی بەرلەمردن لەچاوەكانیا نەبوو. سەرمایەی ئەو یادەوەریەكانی بوو، ئەو یادەوەریانەی خەیاڵی دەریاو سەفەریان لەمێشكیا ئەهێناو ئەبرد. ئەو بەشێك لەو سەمای نیانیەی لەدۆلفینەكانەوە فێربوو بوو، بۆ هەركوێ بڕۆشتایە لەگەڵخۆیدا ئەیگێڕا. وەك مەیزەدەكان ئەیان وت(( ئەو كچە سەمای دەریا فێر نەبووبوو، دەریا لەسەمای ئەو كچەدا بوو بەستیانێكی سوری ئاوریشمەوە شەوی مەیخانەكانی پڕ ئەكرد لەتریفەی مانگ)).
پێم وتی ((ماریا تكات تیا ئەكەم مەڕۆ، جوانی لێرە دیوێكی تری بەدبەختیە، ئەم مەملەكەتە مەردەرە دەست مردن، گەر تۆبڕۆیت بەئەندازەی ئەو برینانەی تیماریان ئەكەیت خوێن لەدڵی منیش ئەڕوا، گوێت پێنەدام ماریا گوێت پێنەدام، خۆت بەكێشانی جگەرەكەتەوە سەرقاڵكردو، وەك فڕینێكی شێتانە لەئاسمانێكی بێئەستێرەدا بەدەم سەمایەكی نەرمەوە پێت وتم
+ (ئەها خەریكە ئەبمەوە بەماسی ؟)لێت نەڕوانیم ماریا لێت نەڕوانیم، وەك پاساریەكی تەڕی بەرباران پەنجەرەكەت لێداخستم، پێم وتی عیشق ئەو ڕێگایە لەگۆڕستانەكە دورمان ئەخاتەوەو لێت نەڕوانیم، پێت نەزانی چەنێك نامەم ڕەشكردەوەو لەڕوم نەهات بتدەمێ، چەندشەو بەدزیەوە بۆت ئەگریام، جگەرەم ئەكێشاو ئەگریام، شەرابم ئەنۆشی‌و ئەگریام، سەیری مانگ‌و ئەستێرەكانم ئەكردو ئەگریام. لەسەمای تۆ وردئەبوومەوەو ئەگریام، ئاخر سەختە ماریا نامەیەك لەشوشەی شەرابا بەدەریادا ڕەوانەبكەیت و هەرگیزیش نەگاتە شوێنی خۆی، دۆلفینێكی میهرەبان نەیخوێنێتەوە، تۆ پێت وتم لەسەر تاشەبەردێكی كەنار دەریادا، واتە لەوشوێنەدا یەكەمجار دۆلفینە سپیەكەت تیادا ناسی‌و لەوێشدا ڕاویانكرد هاتیتە دنیا، بەڵم منیش لەچاوەكانی تۆدا، لەوشوێنەدا ڕۆحی تۆم تیادا ناسی خۆری تەمەنم ئاوابوو، خەریكە دەمرم ماریا.
پێم وت ((ئەی باعیسی دەردەداریم، ئەوان ئاهەنگەكانیان لەشەڕگاكان‌و گۆڕستانەكاندا ساز ئەكەن، دیلەكانیان ئەخەنە ناو هەزاران مار، مرۆڤ بەزیندووی ئەخەنە بەردەمی پڵنگەكانیان، پێم وت ماریای دەردەدار تۆ ئەتوانی خوێنی برینەكانی كچی پاشا بووەستێنی‌و بۆ هەتا هەتایە برینەكانی بكوژیت، بەڵام قومارت لەگەڵ پادشادا پێناكرێ ماریا، ئەو جانەوەرە دڕندە بەتۆ ساغ نابێتەوە، ئاخركەسێك نەخۆشیكی بێئامانی گرتبێ‌‌و نیوەی گیانی ئەو نیوەكەی تری بخوات، جانەوەرێك نیوەی دڵی ئەو نیوەكەی تری دڵی بخواو، نیوەی ڕۆحی نیوەكەی تری بخوا، ئەمە دەردێكە بەتۆ چار ناكرێت . ئەو دەردێكی سەیری هەیە نیوەی، شارەكە ئەڵێن هەموو پێغەمبەرەكان بێنەوەو موعجیزەكانیان بنوێنن دەردی ئەویان بۆ ناكرێتەوە بەمرۆڤێكی خاوەن ویژدان، ئەو كەس نازانێت چ تاعونێكیەتی. گوێت پێنەدام ماریا گوێت پێنەدام، ڕۆشتی گرەوت لەگەڵ پاشادا كردو ئەم دەردەدارەت جێهێڵاو لەنامەیكدا بۆت نوسیبووم(پادشا ئەڵێت باڵندەكان ئەبێت لەئاسمانا مەلەنەكەن‌و ماسیەكانیش لەدەریادا، اخ خودای من كاتێك پادشا ئەوەی پێتوت من خۆم لەوێ بووم، ئەیویست لاقەی ماریا بكات، كاتێكیش ماریا پەشیمان بوو ئیدی كار لەكار ترازابوو. كاتێك ئەیویست ماریا ڕوتكاتەوە ئەبوو بەماسی، كاتێكیش سەیری ناوچاوی ماریای ئەكرد ئەبوو بەمرۆڤ . بەڵام پادشا كوا ئەو توانای هەبوو لەبەردەمی سیحری چاوەكانی ئەودا بووەستێ. اخ پادشا ئەگەر كچەكەت بەدیار چاوتەوە ئەمرد لەبرینی ماریا تێئەگەیشتی، بەڵام لەو جێیەدا مانایەك نیە بۆ وتن قامچیەكان ئەدوێن . لەباخچەی ئاژەڵانی شار ئەو ئێوارە بەپارە خەڵكی شار سەیری ماریایان ئەكرد. ناسیمەوە خۆی بوو، بەكەساسیەكەوە پێی وتم (بۆئەوەی لەباڵندەكان تێبگەین پێویستە لەقەفەزەكانی ئەواندا بخوێنین). پادشا لەوێ بەدەم تەماشا چیانەوە پێدەكەنی، پێكەنینێك وەك هەمیشە ترست تیا سەوز ئەكات. ناسیمەوە خۆی بوو ئەوە ماریای چكۆلەبوو گەورەبووبوو، ئەوە ماریا بوو كەس نەیئەزانی چ ڕەشەبایەك و چ تۆفانێك بۆ سەر ئەم خاكە نەفرەتیەی هێناوە، ستیانە سورەكەی لەهێلانەی دووپاساری تەرا ئەچوون، ئەوە ماریای چكۆلە بوو پیر بوو بوو، ئەو دەریا بڕەی عاشقی دۆلفین و دەریا بوو، بەڵام لەنەگبەتی ئەو كەوتبووە خاكێكەوە نەك هەردەریاو دۆلفینی تێدا نەبوو بگرە ڕحمیان بەماسی ڕوبارەكانیش نەئەكرد، ماسیەكانی ئەوەندە قولاپیان دیبوو لەڕاوچیەكان زیاتر شارەزای فێڵەكانی ماسیگرتن بوون. ، شەوان لەناو بیێدەنگیدا بیری لەسەمای ئەو دۆلفینانە ئەكردەوە لەنجەولاریان پڕبوو لەسەماو مەكری جوانی، وەك ئەوەی چارەنوسی مردنی لەباوەشی دۆلفینێكدا مردبێ دنیای ڕزگار كردبوو، ئەگریا، دۆلفینێك بۆ قوڵاییە ناكۆتاكانیش بڕۆشتایە ماریای لەگەڵ خۆیا ئەبرد و لەگەڵ ئەوانی دیدا لەتیمێكی سەماكردن ئەچوون. لەناو باخچەی ئاژەڵاندا پادشاوەك ئەوەی یاری بەلەشی مەیمونێك بكات دارێكی تێوە ئەژەندو قاقا پێئەكەنی، ددانە ئاڵتونیەكانی تەواوی دەوروبەری سەرسامكردبوو، بەگاڵتە جاڕیەكی بێماناوە ئەیوت (ژیان بەیاسای جەنگەكۆنەكان بەڕێوەناچێت، عیشق پێویستی بەیاسای ویژدانی‌و خوێندنەوەی ویژدانی هەیە نەك ئایدۆلۆژی، وانیە قەحبەی نیوە مرۆڤ؟بۆ ئەوەی جوانی بەدەست بێنی ئەبێت خوێن بدەیت، بەڵام دواجار فەلسەفەی خوێن لەپێناوی خوێندا، خوێن لەپێناوی جوانیدا لەهەموو دەسەڵاتەكاندا بووە بەفەلسەفەی خوێن بەقەرزدان و خو ێن لەپێناوی خوێندا، وانیە حەیشەری؟
ئەو فریشتەیەك بوو لەدنیایەكی ترەوە هاتبوو، كچی ئەم ئەستێرە پەتیارەو خوێن فرۆشە نەبوو، پادشاش لەزەتی لەسەفەری ئەو باڵندانە ئەبینی بەرەو خۆراوا ئەفڕین‌و بەدەنگێكی گریاناوی ئەیان خوێند. وتم ((پادشا خوا ڕابەرداری نیە بەو هەموو برین‌و خوێنەوە بمرێ، ئەو گرەوی لەسەر ئەوە كردووە برینەكانی لەشت تیماربكات، ڕاستە نیوەی دڵت وەكو شارەمێرولەیەكی گۆشتخۆر ئەو نیوەكەی تری دڵت ئەخوات، بەڵام بیرت نەچێت برینەكانی تۆ لەقوڵایی ڕۆحدان)).
تۆ نەتبینیم چەندە لێدانم خوارد، بەڵام ماریا دڵم خۆشبوو كچی پادشام بینی ئەگریا، منیش ئەگریام، ئاخر مەگەردەكرا چاوەكانم بنوقێنم تاهیچ نەبێت بەدرۆوە شبێت لەو وەحشیگەرایە ڕابكەم، مەگەر دەكرا چاوەكانم دابخەم كاتێك تۆ بەو نیگا دڵبڕانەت لێت ئەروانیم، دەبووپێت بڵێم وەك چڵە پوشێك (با)بیبا لەبیابان، یا زیكزیكەرەیەك لەژورێكدا بمرێ، تۆ بەحاڵی ئەم دڵە غەریبەی منت نەزانی، یا ڕەنگە زانیبێتت‌و نەتویستبێت وای دەربخەی كەئەیزانی، بەڵام ماریا وابزانە ناتەوێ خۆشم بوێ‌ی، وابزانە دڵت بەردە، بەڵام دڵی ڕەمیدەی بەردیش لەحزوری عیشقا ئەبێت بەئاو. پێم وتی ماریا(( تۆ ناتوانیت لەبرینی مرۆڤ تێبگەیت هەتا عاشقی مرۆڤ نەبیت، ئەم تێكەڵاو بوونەسەیرەی تۆ لەگەڵ برین بەخوێن تەوا ئەبێت))، بەڵام تۆ پێت وتم(( پێویستە كەسێك هەبێت لەخەیاڵی برینەكانی دوژمنیشا بێت)).
اخ ماریا پێم وتی كۆچی تۆ دڵێكی وەك دڵی پاشاكانی ئەوێ بەرگەی بگرێت، دڵی منیش لەبەردەم ماڵاوایدا هەمیشە دڵێكی لاوازبووە، دڵێك بووە لەو دڵانەی كاتێك ڕۆحێكی جوان لەچاودا ئەبینن، لەوەها دەرفەتێكدا هەرساتێك ئەگەری ئەوە هەیە عاشقی بن‌و بۆی بمرن، بەڵام عادەتی ژیان وایە لەناكاو شتێك ڕوئەدات‌و هەموو شتێك تێك ئەدات. بمبورە ماریا من ئەزانم ڕۆحی تۆ گوێی لێیە، بمبورە نەمئەتوانی خەیانەت لەعیشقی دۆلفینەكە نەكەم‌و خۆشم نەوێی، ئاخر تۆ ئەزانی دڵی من لەو دڵانەیە هەرگیز ناتوانن گۆڕی عیشقێك، بەگۆڕبسپێرن و، خواحافیزی عیشقێكیش، بەخوا حافیزی یەكجارەكی. من ئەزانم ماریا تۆ برینپێچێك بوویت دڵت لەمرۆڤ شكابوو، ئەوەشی تۆی بۆئەمشارە هێنابوو ئارەزوی تۆڵەكردنەوە بوو نەك ساڕێژكردن، دڕندەیی مرۆڤ بوو نەك خۆشەویستی. بمبورە ماریای مەزن ئەگەربڵێم تاكەشتێك باوەڕم پێی نەبوو ئەوەبوو هەمیشە تۆ ئەتوت(( خوا ویستوویەتی خوێن لەم خاكەدا بووەستێ بۆیە منی ناردووە))، بەڵام ئەوەتانێ پەتای ڕوخاندنی دەسەڵاتەكان ڕوی كردووەتە ئەم خاكە، مرۆڤەكانی ئێرە بەدوای خوێندا وێڵن، ماریا وەك چۆن مرۆڤ عاشقی خۆشبەختی ئەبێت بەدبەختیش ئاوا عاشقی مرۆڤ ئەبێت، ئێستا ئەمشارە بەدبەختی عاشقی بووە.
پێم وت ماریا پێم وت، بەڵام بەرزللەیان دام، لەناو بەحری تفی ئەواندا بووم بەدۆلفین، پێم وت(( پاشا گوناهە ئەو فریشتە لەسێدارەبدەیت ساڵانێكی زۆر لەشكرێكی بێئامانی تیمار ئەكرد، دەریایەك خوێنی ئەوەستان، پاشا نابێت ئەو فریشتە بمرێت، خودا چاوی لێبێت لافاوی خوێن هەڵئەسێت، وەك لافاوەكەی نوح لەناو خوێن‌و گوناها ئەخنكێین، وەك شەڕی فیل پەڕەسێلكەكان بەردمان بەسەرا ئەبارێنن، سەیركە پاشا یونس پێغەمبەر لەسكی دۆلفینێكا خۆی حەشارداو چەند ڕۆژ لەڕەحمی ئەودا ژیا، ئەو ماسیەت بیر نەچێت خۆی كردە قەزاوەگێڕی خودا، پاشا تۆ ئەو ماسیەت بیر نەچێت خۆی خستە بەر ئەو تیرەی نمرود بەخوایەوەناو بەر ماسیەكە كەوت وهاواری كرد خوام كوشت خوام كوشت، بەڵام ئەو جگە لەخوێنی ماسیەكی فیداكار شتێكی تری نەبینی، كەوابوو خوێنی ماسی و خوێنی خودا یەكشتن پاشا، نابێت خوێنی خودا لەم خاكەدا بڕژێت، لەهەر خاكێكا خوێنی خودا ڕژا ئافات ئەبارێت، تاعون دائەكات).
اخ ماریا تۆنەت بینی سەگە بەدبەختەكەم چۆن ئەگریا، وەك ئەوە وابوو خودا لەبەرچاوی لەخاچ بدەن. بەڵام ماریا پاشا تەنیا لەو نیوە نەخۆشەی دڵی ئەڕوانی ئەو نیوەكەی تری دڵی ئەخوارد، ئاگای لەنیوە خوراوەكەی دڵو ڕۆحی نەبوو بۆیە ئەیوت)گەمژە ئێمە بەدزی خوداوە خوێن ئەڕێژین)، بەڵام ماریا مەگەر دەكرێ بەدزی خوداوە كاری وەها بكرێ؟!ئەیقیڕاند( ئاخر كەسێك برینی لەشكرێك بووەستێنێ چۆن پادشایەكی دەردەدارو بیماری پێ تیمار ناكرێ؟!))
لەو ساتەدا باران دەباری، خۆت ئاگات لێبوو ماریا باران بەسەر خوێنی تۆدا ئەباری، كاتێك پەتی سێدارەكەیان ئەكردە ملت من لەژێر قامچیدا سەیری چاوەكانی تۆم ئەكرد، بەڵام هەمووان چاویان بۆ ئاسمان و خوا ئەگێڕا، من ئەمزانی باران فرمێسكی خوابوو، بەڵام هەندێك ئەیان وت هەتا خوێن نەبارێت خودا ناگری. بەو چاوە غەمگین‌و بریندارانەوە سەیرت ئەكردم وەك ئەوەی پێم بڵێیت ((گوێ مەدەرێ منیش ئەچمەوە دەریاو لەوێ دەستی دۆلفینە كوژراوەكەی خۆم ئەگرم وسەما ئەكەین، بەڵام ئەی منی بێچارەچی ماریا؟؟وەك ئەوەی پێم بڵێیت ((لەوێ تاهەتایە عیشق لەگەڵ منا سەما ئەكاو تۆش لەخەیاڵی مندا)).
بەڵام ماریا بەو چاوە دەریاییانەت لەشكرێك برین تیایا مەلەیان ئەكرد، پێم وت، وتم ((پاشا تۆشەقت لەكورسی ژێر قاچەكانی ئەو هەڵنەدا، ئەوە كورسی دەسەڵاتی خۆت بوو، ئەوە كورسی بەختی خۆت بوو پەتی سێدارەت كردە مل))بەرشەقیان دام ماریا، بەڵام پێم وتن ئەوە كورسیەكەی ژێر قاچی ئەونەبوو كەوت ئەوە كورسیەكەی ژێر قاچی ئێوەبوو.
سەیركە ماریا دوای ئەو هەموو ساڵەی بەسەر مردنی تۆدا ڕۆیشتن ئێستا خەریكە نیوەم ئەبێت بەماسی و نازانم ڕوبكەمە كام دەریا، دوێنێ شەویش كچە پاشا بەیەكجاری بوو بەماسی و گیانی دەرچوو، پاشاكانیش هەروەكو جاران خەریكن بەخوێنی جەنگاوەرەكان یەكتری ئەڕوخێنن، ئەزانم ناتەوێت سۆرخی پادشا بپرسی ئەو شەقی لەكورسیەكەی خۆی هەڵدا نەوەك تۆ، ئێستا ئەو ئێسكو پروسكیشی بووە بەخۆڵ. ماریا دەسەڵات غەزەبێكە خودا بەپاشاكانی ئەبەخشێت. ماریا ئەمەوێت ئەوەت بۆ باس بكەم ئەزانیت لەیاداشتەكانی كچەپاشادا چی نوسرابوو، ئەمەی بۆت ئەنوسم نوسراوی ناو ئەو بەلەمە كاغەزیەیە بەناو دەریاو دۆلفینەكانا بۆمنی ناردبوو، ئێستا هەرجارێك ئەیخوێنمەوە بەشێكی جەستەم ئەبێت بەماسی
((لەبیركردنی دەریا بۆماریا وەك لەبیركردنی یادەوەریەكانی ماسیەك بوو لەبیابانا بژی‌و دەست بەرداری دەریا بێت، ماریا گوێی ئەنا بەسینگی بریندارەكانەوە تا لەناڕێكی دڵیان تێبگات، بەڵام پادشا ناڕێكیكەی لەڕۆحیدا بوو، جگەلەوەش ئەو بڕوای بەوێرانبوونی ڕۆح نەبوو، بەچاوی ماریا سوێندت بۆ ئەخۆم شەهرەزاد، ئەو خۆی نەیویست چارەبكرێ، بۆیە ماریا بەناو ئاودا خزاو ڕۆیی، ئێستا یادەوەری ئەو شەوە ئەمكوژێت بەكراسە پولەكەكەیەوە ئەو فریشتە سپیە سەمای ئەكرد، ئەوە دواشەوی مردنی ماریا بوو، تائەو گەرمتر ئەبوو هەموومان زیاتر ئەگریاین، بۆِڕابردومان ئەگریاین، بۆ داهاتوومان، بۆ ئێستامان، تەنانەت پاشاش ئەگریا، بەڵام نەیئەویست كەس فرمێسكەكانی ببێنێ، نەیئەویست كەس جگەرەكەی ببینێ‌‌و شكۆی شایانەی بشكێ بۆیە بەدەستی خۆی سێدارەكەی كردەمل، شەرابی ئەنۆشی‌و ئەگریا، گۆرانی ئەوت‌و ئەگریا، پێكەكانی پڕئەكردو ئەگریا، سەیری ماریای ئەكردو ئەگریا. شەهرەزاد دواهەمین قسەی ماریا لەیادەوەری مندا تاهەتایە ئەمێنێ كەپێی وتین من بەیانی ئەگەَڕێمەوە بۆ دەریا، بەڵام سەمای دۆلفینەكان بۆشەو لەیادمەكەن. منیش وەكو ئەو ئەمشەو ئەگەڕێمەوە بۆدەریا تۆش بۆسبەی سەمای دۆلفینەكان لەیاد مەكە شەهرەزاد، گۆرانی دۆلفینەكان لەیاد مەكە كوڕی شار))