لە كۆمەڵە شیعری (تەنیایی سەر لە بەیانی ناونیشانەكانی گۆڕی)
![](http://www.hemin.dk/files/images/tp.gif)
خەیاڵ منداڵێكە شۆخ
![](http://www.hemin.dk/files/images/tp.gif)
(1)
قەسیدە دەقێكە، كراوە
بەسەر تەنیاییدا
![](http://www.hemin.dk/files/images/tp.gif)
(2)
تەنیایی دەرگایەكە
واڵا بەسەر بۆشاییدا
![](http://www.hemin.dk/files/images/tp.gif)
(3)
بۆشایی لانەیەكە بێ زیان و
دواین وێستگە بۆ شاعیران
![](http://www.hemin.dk/files/images/tp.gif)
(4)
شاعیران منداڵی بچووكن
خۆیان لە گژوگیای زمان تێر دەكەن، ئینجا گەشت دەكەن
![](http://www.hemin.dk/files/images/tp.gif)
(5)
گەشتتیار پاڵەوانێكە كەشخە
ئافرەتە جوانەكان هیلاك دەكا
بەدوای بەختیارییدا
![](http://www.hemin.dk/files/images/tp.gif)
(6)
بەختیاریی منداڵێكە لە مۆم
بڕوا بە خۆر دەهێنێ، ئینجا دەتوێتەوە
لە سندوقەكانی پۆستەدا
![](http://www.hemin.dk/files/images/tp.gif)
(7)
پۆستە نامەیەكی هەڵواسراوە، لەنێوان دوو عاشق
دەستی بەسەرداگیراوە، بۆ ماچێكی تەڕ
![](http://www.hemin.dk/files/images/tp.gif)
(8)
تەڕیی سەرهاتی بەیانییەكە
پێشبینی قەسیدەی سالوكەكان دەكا
![](http://www.hemin.dk/files/images/tp.gif)
(9)
سالوكەكان هۆزێكن لە خانەدانان
بڕوایان وایە نان بۆ هەمووانە و
شیعریش بۆ دڵپاك و دانایان
![](http://www.hemin.dk/files/images/tp.gif)
(10)
دانایی فرمێسكێكە دنیا دەكا بە ڕووبار
خۆر ڕاودەنێ، بە كڵاوی منداڵی
![](http://www.hemin.dk/files/images/tp.gif)
(11)
منداڵیی جۆلانەیەكە ناجولێ
بەو پیرانە نەبێ، كە هەمیشە پاسەوانی
خەیام دەكەن، لەبەر قەسیدەكانی
![](http://www.hemin.dk/files/images/tp.gif)
(12)
قەسیدەكان بۆمبی گڕگرتوون
بە گرانی بەرەو شەڕكەرە بچووكەكان تلدەبنەوە
لە بورجی خەیاڵ
![](http://www.hemin.dk/files/images/tp.gif)
(13)
خەیاڵ منداڵێكە شۆخ
حەز لە هاوڕێیی ئافرەت دەكا
![](http://www.hemin.dk/files/images/tp.gif)
(14)
ئافرەت نەخشەی دڵكرانەوە و
ژووانی ڕێكوپێكە لەگەڵ قەسیدەدا
![](http://www.hemin.dk/files/images/tp.gif)
(15)
قەسیدە تەڵەی ئەوانەیە، كە گوزەر دەكەن
بە باخچەی بیرچوونەوە و شادیی
![](http://www.hemin.dk/files/images/tp.gif)
(16)
شادیی چەكی شاعیرانە
بۆ بەرەنگاربوونەوەی تەنیایی و سارا
![](http://www.hemin.dk/files/images/tp.gif)
(17)
سارایی بەهەشتێكە میوانداری دەنگی وشەكان دەكا
دڵخۆشە بە خوێندنەوەی منداڵانەی خەونبین
![](http://www.hemin.dk/files/images/tp.gif)
(18)
خەون سەرهاتێكە خوار دەبێتەوە
شەو ماڵی دەكا، بە وشەكان
![](http://www.hemin.dk/files/images/tp.gif)
(19)
وشەكان پەپوولەن، بەهاران ناونیشانەكانیان
ون دەكەن و دەچنە سەفەر
![](http://www.hemin.dk/files/images/tp.gif)
(20)
سەفەر شكۆی خانمێكی چل ساڵانە
بە ئاگاییەوە كەزی ڕێك دەخا
بە لێوردبوونەوە لۆركا دەخوێنێتەوە، بەر لە نووستن
![](http://www.hemin.dk/files/images/tp.gif)
(21)
نووستن گالیسكەیەكە كەشخە
قەسیدەكان بەدوای خۆیدا ڕادەكێشێ، بە شەو
![](http://www.hemin.dk/files/images/tp.gif)
(22)
شەو ئەفسانەی پیری سێبەرە
حیكایەتەكانی باپیرە دایدەهێنێ
لە كێڵگەكانی زمانێكی دوور
![](http://www.hemin.dk/files/images/tp.gif)
(23)
دووریی پۆستەچییەكی شەرمنە
تۆزێ لە ژووانی ئەو ئافرەتە دوادەكەوێ
![](http://www.hemin.dk/files/images/tp.gif)
(24)
ئافرەتەكە لەبێ بازاڕی ڕەشدەچتەوە
چێژ لە وەسوەسەی شاعیران دەبینێ
پەرۆشی بەزینی ئەو منداڵەیە، كە لەناوی دەلاوێتەوە
![](http://www.hemin.dk/files/images/tp.gif)
(25)
شوێنی لاوانەوە نیشتمانێكی بچووكە لە وشەكان
هاوسەرگیری لەگەڵ با و باران دەكا
![](http://www.hemin.dk/files/images/tp.gif)
(26)
باران نەوڕەسێكە مەیلی سەفەر دەكا
لەسەر كوڵمی ئافرەتەكە دەنوێ.
![](http://www.hemin.dk/files/images/tp.gif)
قەسیدەكانی شەیدایی و گەردەلول
![](http://www.hemin.dk/files/images/tp.gif)
1- ئافرەت:
ئافرەتێك بەبێ ڕێپێدان بە قەسیدەیەكدا هەڵدەگەڕێ
زمان دەكەوێ
شاعیر جوانی خۆی بە تەپوتۆزی تەنیایی دەچنێ
منداڵی لەخەو ڕادەبێ
زمان و منداڵی دوو هاوڕێن
لە ژێر بنمیچی پەڵەیەك هەوری ماندوو دەخولێنەوە.
![](http://www.hemin.dk/files/images/tp.gif)
2- گەردەلول:
هەموو ئافرەتێك لە دڵیدا
گەردەلولێكی لە گوڵان حەشار داوە
بۆمبایەك و گوڵەگەنمێ
بە تەنیا منداڵە بچووكە شەیداكە
ژووانی ئافرەتە سەربەگێچەڵەكان
لە دەفتەری ئیملا دەسڕێتەوە
بە تەنیا شاعیرانی ئاشقیا.
![](http://www.hemin.dk/files/images/tp.gif)
3- شەیدایی:
لە دڵێكی كراوە بۆ شەیدایی
دوو دەست نیگاری مردنێك دەكێشن، بەرلەوەی دواخرێ
منداڵێك پاسەوانی مانگ دەكات بۆ ئەوەی بەتەنیا نەخەوێ
بەشەو شاعیرێك قەسیدەكانی بە قاچاغ دەبا
نەوڕەسێك رەهەندەكانی شینی كۆ دەكاتەوە و
مانگ رەها دەكا
شاعیر و دەریا دوو هاوڕێن
دەریا سیخوری بەسەر سپێتی سارادا دەكا.
+++
سەرچاوە:
ئەحمەد دمناتی، تەنیایی سەر لەبەیانی ناونیشانەكانی گۆڕی، شیعر، لە بڵاوكراوەكانی یەكێتی نووسەرانی مەغریب، ربات، 2011، ل11-17.
- شاعیر و رەخنەگر، لەدایكبووی 1966/تەنجە، لە ناوەڕاستی هەشتاكانەوە لە گۆڤار و رۆژنامە مەغریبییەكان بەرهەمەكانی خۆی بڵاو كردۆتەوە و هەتا ئێستا بەردەوامە، خەڵاتی ناجی نوعمانی ئەدەبی لە بواری شیعر لە لوبنان بەدەستهێناوە. لە شاری "تەنجە" خوێندنی سەرەتایی و ناوەندی و دواناوەندی تەواو كردووە، بڕوانامەی لە ئەدەبی عەرەبی ساڵی 1992 لە كۆلیژی ئەدەب و زانستە مرۆییەكانی زانكۆی (عەبدالمەلیك سەعدی) لە (تەتوان) بەدەستهێناوە، یەكەم كۆمەڵە شیعری بەناونیشانی (بە شەیدایی دەریا، خۆشمدەوێیت، قاهیرە، 1996 بەچاپ گەیاندووە.