ئاخ بۆچی ده‌ستم نه‌گه‌یشته هه‌ور؟..
چاوی پڕ پرسم خوێنینه و نمناک
باخ سووتا.. ئه‌شکم نه‌یکوژانه‌وه.........،.
سوته‌مه‌رۆیه سه‌رانسه‌ر ڕووی خاک
***
ئه‌وی به ڕووتیی له شه‌خته و زوقما..
له گۆ نه‌که‌وێ.. نه‌وه‌رێ په‌نجه‌ی
له سه‌رما ناگا و.. گۆرانی ناڵێ..
بۆ بڵێسه و گڕ.. بۆ لاروله‌نجه‌ی
***
که‌سێک له گڕا.. گه‌ر هه‌ڵنه‌قرچێ..
له سه‌ریا.. به‌فری عه‌شق داناکا
نازانێ پشکۆ و هه‌ڵقرچان چییه..
شنه له سارای دڵیا هه‌ڵناکا
***
ئای له شه‌وانی ئێشک و کزه و سۆز
له‌سه‌ر ته‌رمی دڵ ئه‌شکی زۆرم ڕشت
مۆمم فڕێدا.. کاتێ که بینیم..
ده‌یان په‌پووله‌ی شۆخ و شه‌نگی کوشت
***
له جیاتی بۆنی لاله‌ی کۆساران..
قوڵایی سینه‌م.. که‌یله له بۆسۆ
به‌هه‌ر لایه‌کدا.. چاو ئه‌گێڕم من..
هاوارە.. ته‌رمە.. مردنه و گڵکۆ
***
بۆ سه‌دای ناڵه و کزه‌ی غه‌ریبییم..
خوێنی ڕه‌شه‌بای بیابانی نه‌ڕشت؟
بۆچی گریانم نه‌بوو به ده‌ست و
ده‌رگای له باران نه‌خسته سه‌ر پشت؟
***
چی له‌گوڵزاری کاران بکه‌م من؟
یان بۆچی بچمه سه‌ر زێی زینده‌رۆ؟
چاوم هه‌زار جار به‌کوڵتر ئه‌گری..
له تاڤگه‌ی زه‌ڵم و چه‌می تانجه‌رۆ
***
له سه‌رده‌مێکا هاتمه دنیاوه..
هه‌موو ساڵێکی خۆزگه به پار بوو
که‌شتی ناو ده‌ریای ئه‌سرینی خۆم بووم..
هه‌ر نا ئومێدییش بۆ من که‌نار بوو
***
گه‌ر شاخ بوومایه،، به شه‌و و ڕۆژێ..
له گه‌رده‌لوولا.. ئه‌مهێنا هه‌ره‌س
من له پایزی ته‌مه‌نیشا هه‌ر..
سۆزم ئه‌کرد و هه‌ر شکسته‌ده‌س
***
ئه‌موت گه‌ر له‌به‌ر باخێکی سه‌وزا..
بێت و سۆز بکه‌م.. منی دوور ئازیز
گوڵ هه‌ڵئه‌وه‌رێ.. زه‌رد ئه‌بێ وه‌ک ڕووم..
دار سه‌ر ئه‌نێته ناو کۆشی پایز
***
به‌ر له شیوه‌ن و سۆزی شیعری من..
باخ قرچه‌قرچی سووتانی ئه‌هات
نزاشم ئه‌شکی به ئاسمان نه‌ڕشت..
هه‌ر خوچه و گوڵ بوو به‌لادا ئه‌هات
***
مه‌زار و گڵکۆی خۆم کردبووه کۆڵ..
من هه‌ر دادم بوو له ده‌ستی باڕه‌ش
ده‌ستم نه‌گه‌یشته دامه‌نی هه‌ور..
خاکی سووتاوی بنێمه باوه‌ش
سلێمانی - شه‌وی 8/12/1983