بە چاوان غەمزە و ئیما مەفەرموو   بە قەتڵی عاشقی شەیدا مەفەرموو

کە من کوشتەی جەمالی تۆم عەزیزم،   لە باغی جەنەتلمەئوا مەفەرموو

ئەتۆ موو سونبوڵ و ڕوو ئافتابی   لە حوسنی تەڵعەتی لەیلا مەفەرموو

دەڵێن: فەرمووتە بمکوژێ بە ناحەق   کە تۆ سوڵتانی حوسنی وا مەفەرموو

دوو چاوم، دوور لە تۆ، تۆفانی خوێنە   لە مەوج و جۆششی دەریا مەفەرموو

دەمت وا بێنە، قیبلەم، تۆی تەبیبم   بە تەشریفی دەمی عیسا مەفەرموو

من و یەک لەحزە شەو ئارام و تاقەت؟!   لە دووریی ماهی شەوئارا؟ مەفەرموو

بە خۆت بمکوژە نەک بەو چاوە بازە   بە جەللادانی بێ پەروا مەفەرموو

'وەفایی' عــاشــقی ئەندامـی تۆیــــە   شەهیدی قامەتی تووبا مەفەرموو