کە لە دارستانەکە دێمە دەر
نیگام بە ترۆپکی بەرزی سنەوبەردا ‌هەڵدەواسم،
پەنجەکانم لە دەووری تەڕترین گەڵا و گوڵی بن بەردێکدا جێدەهێڵم
گوێچکەکانم دەدەمە دەست
گەرووی پڕئاوازی بەرزی
باڵندەی سەر بەردە گەورەی نزیک داربەڕووە تەنیاکە.
کە لە دارستانەکە دێمە دەر
من هەمیشە، بۆ ساتێکیش بیرم ناچێت
نیگا و پەنجە و گوێچکەکانم لەو شوێنانە بەجێبێڵم.
ئاخر وەختێک، میلی سەعات ڕاوم دەنێ و
پاسەکەی شار تین دەداتە بەر هەنگاوم
تا خێراتر بگەمە ناو ئاپۆرەی ناو گەراجەکە
کاتێک کەللەی سەر پردەبێ لە ژمارە و
لیستی درێژی پێویستە و دەبێ بکرێ
ئەو ساتانە
نیگای سەوزی لای سنەوبەر، پەنچەی تەڕی دەوری گوڵ و
گوێچکەی تەژی لە جریوە
بۆ چاو و پەنجە و گوێچکەی خۆم
دووبارە وەردەگرمەوە و بۆ چەند ساتێک قەرزییان دەکەم
تا هیچ نەبێ
ماوەی نێوان ماڵ و دواویستگەی پاسەکە، تەنها نەبم
تا بە نیگایەکی قەرسیلی و نەرمی گەڵا لە پەنجەدا و
گویێەکی پڕ لە نەغمەوە، ڕێگا تەی کەم.
 
20191231