هه‌ر گفتوگۆمه‌، که‌چی هه‌ر ده‌ڵێم و تێ ناگه‌م
هه‌ر جوستوجۆمه‌، که‌چی هه‌ر ده‌ڕۆم و پێ ناگه‌م

چاوم ڕوا و گۆشه‌یی ئه‌و ئه‌بروه‌م نه‌دی
دڵ بوو به‌ به‌حری عولوم و له‌ ئه‌لف و بێ ناگه‌م

چییه‌ ئه‌م هه‌مو طه‌نطه‌نه‌و من – منت
ئه‌مه‌نده‌ چییه‌ فه‌خر و به‌خ کردنت

به‌ ڕۆچوونی ئاوێ ده‌که‌ی زینده‌گی
به‌ ده‌رچوونی بایه‌ک ده‌بێ مردنت

به‌ ده‌م مه‌وجی خوێنی ئه‌شکه‌وه‌م، بڕوانه‌ چۆنم بۆت!
ده‌روونم که‌یلی زووخی ده‌رد و غه‌م، بڕوانه‌ چۆنم بۆت!

ڕه‌قیبی سه‌گ حه‌زی بوو، کوشتمت، سه‌یریکه‌ چۆنی بۆم
دوعا بۆ ده‌ست و تێغت من ده‌که‌م، بڕوانه‌ چۆنم بۆت!

به‌ غه‌دداریی نه‌وه‌ک ناوت به‌رن، بمئه‌نجنی، قه‌ت من
شکاتی جه‌وری تۆ به‌ر که‌س ده‌به‌م؟ بڕوانه‌ چۆنم بۆت!

دڵی من
شکاوه‌
ده‌ستی لێ مه‌ده‌
چیتر گۆرانی ناڵێ
دڵی من.

***

ڕۆژ به‌ ڕۆژ
ته‌ڵخ ده‌بێ ڕوانینم
پاییز ڕژاوه‌ته‌ چاومه‌وه‌

***

هیچ تاقه‌تی ژیانم نه‌ماوه‌ هیچ
خۆ من منداڵ نیم
له‌ یاریکردن بێزار بووم

***

نه‌فه‌س بگره‌ له‌ هاتوچۆیی خۆڕایی هه‌تا ماوی
که‌ ئه‌م بایه‌ هه‌تا ئێستاکه‌ هه‌ر عومری به‌ با داوی

حه‌یاتت نه‌قدی ته‌حصیلی به‌قاو و ڕیبحی ڕیظوانه‌
ئه‌تۆ ده‌یکه‌ی به‌ مایه‌ی ده‌خڵ و خه‌رج و که‌سبی به‌دناوی

عه‌جه‌ب ماوم له‌ جه‌رگت، ئه‌ی دڵه‌ی غافڵ، که‌ موددێکه‌
له‌سه‌ر ئه‌م ئاگره‌م داناوی، هێشتا هه‌ر نه‌برژاوی

بیبیێ، یان نەیبیێ، من داد و بێدادێ دەکەم
گوێ بداتێ، یا نەداتێ، ئاه و فەریادێ دەکەم

حەققی ئیخلاصە بەجێهێنانی ئادابی خولووص
پێ بزانێ. یا نەزانێ، من بە دڵ یادێ دەکەم

بێستوونی عیشقی شیرینێک ئەوا هاتۆتە پێش
گەر لە حەق بێم و نەیەم، تەقلیدی فەرهادێ دەکەم

بە بێ بەزمی حوضووری تۆ حەرامم کردوە بادە
نەوەک بشکێ بە نەشئەی مەی خوماری دەردی بێ تۆیی
لە میحنەتخانەکەی مندا، بە بێ تۆ هەر براڕۆیە
کە جارێ ئێوە ناپرسن لە من بۆچی برا ڕۆیی!

ئەى خودا گەڵاى ئەم دڵە باران  شۆردەم،
بنێرەوە سەر چۆماوى عیشقێ
ئەم دڵەم بنێرەوە سەر خوێندنەوەى سورەتە
کچێ، وەلێ سورەتێ ئایەى لێ چۆڕێ و
سورەتێ کەرەم و ڕەحم و دڵنەوایى و ئاخیرەتى
عەشقى لێ بچۆڕێ
سورەتێ جریوەى هێلانەى دڵنەرمیی و تنۆکاوى
ئاگرى مێى لێ بچۆڕێ
دەى خودا تەرووى ئەم زمانە وشکەڵەم بە
هەناراوى چەمەزمانى کچێ تەڕ کەرەوە
سەحراى ئەم وەستان و نەنووسین و خوێنجومانى
پایزە ساڵەم
بە مەخمەڵى تێرهەڵاڵەى زەردەخەنەى کچێ سوور
کەرەوە
گوێ برینى ئەم تەنیاییەم بە خوێى ختووکەى
مزرە کچێ پڕ کەرەوە

کات
ناگیرێ و هه‌موومانی گرتووه‌
هه‌ندێک جار کات وه‌ک هاوڕێیه‌کی به‌ ئه‌مه‌ک
له‌گه‌ڵما ده‌گری، گۆرانی ده‌ڵێ، پێده‌که‌نێ
هه‌ندێک جار  ملهوڕانه‌ ده‌مهاڕێت
به‌سه‌رما ده‌روات و هیچ ئاوڕم لێ ناداته‌وه‌

هه‌ندێک جار له‌ ده‌ره‌وه‌ی کاتم
کات له‌ ده‌ره‌وه‌ی منه‌
نازانم ئه‌و کاتانه‌ من له‌ کوێم و کات له‌ کوێیه

دنیا دەبارێ‌
من كز كز وەك با هەڵدەكەم
لەپاڵ قەڵا سێبەری مێژووی دەنووسمەوە
بەڵام دەمێكە خەون نابینم
خەو ئەوەندە چڕبۆتەوە
خۆر بە باخچەی دڵم ناگا
لە ئاوەوە دادەگیرسێم لە بارانەوە
ڕۆژ لە باخچەی دڵم كوژاوەتەوە
كوژانەوە واتە بەستنی ژێیەكانی ژیان لەسەر ریتمی بێدەنگی
هێلانەی دەنگ لەسەر منارەی مزگەوت
لەو مەملەكەتە مێشەكانیش سەری خۆیان ناخورێنن
مرۆڤ ڕۆژ ڕۆژ تەمەنی كورت دەبێتەوە
ژیان ڕۆژ ڕۆژ دەمامك زیاد دەكات
پشیلەكان وەك مێوان لە دەرگا دەدەن
خێزانەكەم دەڵێ‌ بەیانیان پەنیری كوردی خۆشترە نەك دەنگی فەیروز