ئێستا ماڵەكەم
لای نزیك ماڵی (با)وەیە،
هەموو بەیانییەك لەحەوشەكەی خۆیەوە
پرچی شۆڕەبییەكان دادەهێنێ‌،
كە ئەزانێت لە بەرامبەری وەستاوم
شەرمنییەك دایدەگرێت‌و
پەنجەكانی لە شنینەوە دەكەون.

************

کۆتاییه‌کان ته‌واو نه‌کراون
سه‌ره‌تاکان ده‌ستیان پێ نه‌کردووه‌
باخه‌کان دیمانیان کاڵه‌
ئازاره‌کان نه‌ڕواون
پێش ئه‌وه‌ی شتێک ڕووبدات،
ده‌ستت بخه‌ره‌ ده‌ستمه‌وه‌
شتێکی ماوه‌ زه‌مه‌ن بووه‌ستێ،

************

ژیان به‌ حوزنه‌وه‌ لێم ده‌ڕوانێ
ده‌نگێک له‌ دووره‌وه‌ ده‌بیستم
مناڵێک به‌لامدا
فرته‌ ده‌کاته‌ ته‌مه‌نه‌وه‌
هه‌نگاوێکم ناوه‌ له‌وه‌ی
له‌م هه‌موو شتانه‌ تێبگه‌م
تۆ وه‌ره‌و له‌ بێ تاقه‌تیمدا
جگه‌ره‌یه‌ک داگیرسێنه‌،

************

بەجێ نایێ، دەبێ ڕوو کەینە سارا،
حەقی ئادابی مەجنوونیی لە شارا

کە چەرخ ئەسکەندەری دیی دەردەدارە،
وتیی: ئەم هەم بووە هەمدەردی دارا

هەتا حەق ناصیرە، هەر حەقمە مەنظوور
وەکوو (مەنصوور) ئەگەر بمکەن بە دارا

نەگەیمە ئەو جوانە و گەیمە پیریی
مەدەد یا پیری پیرانی بوخارا

هه‌وا پڕه‌ له‌ شه‌و
فواره‌ درێژ بۆته‌وه‌ تا سێبه‌ر
به‌ فڕینی باڵنده‌کاندا ده‌زانم
که‌سێک به‌ فیکه‌لێدانه‌وه‌ له‌ کۆڵانه‌وه‌ تێپه‌ڕیوه‌
به‌ره‌و سه‌فه‌ر
چه‌ند خه‌یاڵێک ئینجانه‌ و
جادده‌یه‌ک جێگه‌پێی دڵخۆشی
له‌دوای خۆیه‌وه‌ جێهێشتوون!

بەدەم گۆرانییەكی ناكۆتاوە خۆم ون دەكەم
شەپۆلێكی ئاو دەمهێنێتە بوون،
نهێنی ناوەوەی بەرد دەمشارێتەوە
باران لە باخچەیەكدا بانگم دەكات
دەشێ ،هەرگیز نەمدۆزیتەوە
-با- بەو هەموو شێتییەی شوێنم ئاشكرا نەكات
شیعر، چۆڕ چۆڕ بەدوامدا وێڵبێت
هاورێكانم بێهودە بگەڕێنەوە
كەس نەزانێت
لە كولانەی سەگێكدا خۆم بخۆمەوە
تەنیا دوكەڵی جگەرەكان هاورێم بن
كولانەی سەكێك بۆخۆم چێ ئەكەم
تەنیایی نەمناسێتەوە
ئێوارە شەرم رۆ بكات

به‌ یادی سه‌رده‌شت و سۆران
دوو کوڕه‌ غه‌ریبه‌که‌ی شاره‌کانمان ....!

له‌ سبه‌ینێوه‌ ئه‌ده‌مه‌ غه‌ریبیی
ئه‌ده‌مه‌ شارانی گوڵ
له‌ سبه‌ینێوه‌ مناڵ ئه‌بمه‌وه‌ تا سه‌ره‌تای کۆڵان
تا بۆنی خۆشی کتێب
له‌ سبه‌ینێوه‌ چاکه‌ت و پانتۆڵه ئوتوودراوه‌‌که‌م له‌به‌ر ‌ئه‌که‌م
نیشتمان له‌ پاشکۆی ئه‌سپێکی غه‌مگین ئه‌نێم و
ئه‌ڵێم: هاوڕێیان
ئه‌ی هاوسه‌فه‌رانی بێ وه‌فا
خۆتان بگرن ئه‌‌‌وا دێم!

*

له‌ ئاوێنه‌یه‌کدا له‌ من ده‌ڕوانم
نیوه‌ی ڕیشم سپی بووه‌ و
کۆمه‌لێک لۆچ که‌وتوونه‌ته‌ ناوچه‌وانم
سێبه‌ری ته‌ڵخی پیرێتی هاتووه‌ته‌ سه‌ر روخسارم
که‌چی ئێستایش له‌ ناوه‌وه‌ گوێم له‌ ده‌نگی منداڵییمه‌ و
دڵێکی ساده‌ و ساکارم

خوا خۆم بگرێ ئاوا به‌ره‌و پیریی بردم
له‌سه‌ر کێلی گۆڕه‌که‌م بنووسن
خۆم نه‌بووایه‌ هه‌زاران ساڵ ده‌ژیام و به‌ئاسانی نه‌ده‌مردم
خۆم گوێچکه‌ی پڕکردم له‌ قیژه‌

به‌پێچه‌وانه‌وه‌ ده‌بینران
هه‌رجاره‌ی به‌ شێوازێک له‌ شێوازه‌کان،
له‌حزه‌یه‌ک هه‌بوو
هه‌موویانی کۆده‌کرده‌وه‌،
ئه‌وان ونبووی
نا‌و هاژوهووژی ته‌بیعه‌ت بوون،
له‌ناو ژووره‌کانی ته‌نیایدا
کڵۆم درابوون،
هه‌بوو.. نه‌بوو
لاسکی هیچ ته‌ڕه‌ شیعرێ
له‌ شیعره‌کانی من ناسکتر نه‌بوون،

*

من هاواری ملیۆن داری..
به‌ر ڕه‌شه‌بای له‌په‌ل که‌وتوو.. و هه‌ڵوه‌ریوم
من زایه‌ڵه‌ی ملیۆن مه‌لی..
لانه‌ڕوخاو.. و ته‌ریوم
له‌ په‌نجه‌ره‌ی پایزێکی ئه‌به‌دیی‌‌يەوە‌
ئه‌ڕوانمه‌ دنیای ته‌م و
خوێنی ڕژاوی گه‌ڵاکان
ئه‌ڕوانمه‌ چرای کوژاوه‌ی ماڵه‌کان

*

له‌ په‌نجه‌ره‌ی ڕۆژانێکی به‌فرینه‌وه‌..
پۆله‌مراوی کێویله‌ی نیگای هه‌ڵئه‌فڕین و
ئه‌نیشتنه‌وه‌ به‌ سینه‌ی پانی ده‌ریای شینه‌وه‌
ئه‌و مرۆڤه‌ی ده‌ستی له‌ جه‌رگی شه‌پۆلا و
تۆڕی ڕه‌نجی له‌ کۆڵا بوو..
که‌وته‌ بنی نائومێدیی و
گێژاوێکی دێرینه‌وه‌

*

شه‌پۆله‌کان تابووتی بوون..
ناڵه‌و هاواریان هه‌ڵمژی
که‌نار ڕه‌شیی بۆ نه‌پۆشی..
ئاخ ته‌رمه‌که‌ی بۆ نه‌که‌وته‌ سایه‌ی دره‌ختێکی سه‌وز و
مه‌زاری ئاو..
سه‌ری هیوا و ئومێدی خسته‌ ناو کۆشی!

*