"سوپاس بۆ ئەوەی وتی ؛ هەموو کەوتنێک کۆتایی نییە ، ئەوەتا کەوتنی باران جوانترین سەرەتایە ! "

بیڕوخێنن
ئەم تەوتەم و پەیکەرەی خۆتان دروستتان کرد بڕوخێنن .
بیسووتێنن
ئەم داهۆڵەی لە کێڵگەکەی خۆتاندا
بۆ ترساندنی داڵەکان چەقاندتان ، بسووتێنن !
باخ بەدەری کەن ،
ئەم شەریکەی بۆ خوداکانی خۆتان دروستکرد ، باخ بەدەرکەن !
ئیدی مەهێڵن لە بەربەیاندا، موناجاتی بارانێک دەنگ بداتەوە .
ئیدی مەهێڵن لە ساراکانی 'مەحوی' دا
پێکی دڵێکی شکاو بەر پێکی برینداری دڵێکی تر بکەوێت .

...

...
ئەی نامۆکان!
ئێمە لە تەختەی سەر ئاوی 'ئاموون' ئەچین
نوقم نابین و نایشخنکێین!
بەڵام مشاری شەپۆل و ئەم بڕبەندی کەنارانە
هێدی.. هێدی وردمان ئەکەن
ئەماندەنە دەس تاریکیی 'ئۆقیانووس' و 
تیا ون ئەبین
...
...
ئەی ڕۆحی وێڵ!
تەنگە بە بەری عەشقی تۆ ئەم نەخشانە
نزمە بۆ فڕینی سەرت ئەم ئاسمانە.
...
...
ماڵێکم هەیە تەنیاییم بەشی ناکات
...
...
کرمی ئاوریشمە خەیاڵم، بۆ سەرووی ئەو قامەتت
من کە قۆزاخەی خەمێکم، دەوری داوم چاوەکەت

ژیانی من هیچ نەبوو لە دووبارەبوونەوە زیاتر
خەونی من هیچ نەبوو لە دووبارەوە بوونەوە زیاتر
غەمگینی من هیچ نەبوو لە دووبارە بوونەوە زیاتر
ئازاری من هیچ نەبوو لە دووبارەبوونەوە زیاتر

***

من هەزار جار دووبارە بوومەوە
بە ئاگرێک هەزار جار ڕۆحم سووتاوە
لە ئاوێکدا هەزار جار خنکاوم
هەزارا جار کەوتوومەتە خەرەندێکەوە

***

لەم کۆتایی سەفەرەدا،
ئەوەی بۆمان مابێتەوە،
ڕژانی دڵۆپ دڵۆپی ڕۆحی تۆیە
بۆ ناو دەفتەرەکانی من،
تێکەڵبوونی حەرفی منە
بە زمانی بێدەنگی تۆ،
کرانەوەی ڕۆحی من و ڕۆحی تۆیە
بۆ تاریکی و بۆ ڕووناکی.

کە تۆ نەبوویت
لە نێوان من و دنیادا هیچ شتێک بەشنەکرابوو.
من فاریزە و خاڵ و هێڵم نەدەناسی.
هیچ نەخشەیەک نەیدەزانی من گەڕیدەی
کام وڵات و کام کیشوەر و کام گومڕاییم.
کە تۆ هاتی کۆترەکانیش دەیانزانی لە کوێ

نەمردم من ئەگەر ئەمجارە بێ تۆ
نەچم، شەرط بێ، هەتا ئەم خوارە بێ تۆ

دەروونم خاڵییە، وەك نەی دەناڵێ
هەوارێکی چ پڕ هاوارە بێ تۆ!

بیناییم کوێرە، هەڵنایێ بە ڕووی کەس
موژەم یەك یەك دەڵێی بزمارە بێ تۆ

هەموو ئەعضایی ناڵینم دەناڵێ
سەراپام میثلی مۆسیقارە بێ تۆ

هووتافی توڕەی ئەم بەیانیانە لە نزیک ماڵە شێدارەکانی ریشەوە
سەردەکا بە باخچەنیگەرانەکانی هەرزەییمدا
ڕستە پڕ و وشە بەجێماوەکانی تووڕەیی لە سەر لێوی کازیوە دەگەوزن
بینینم تەنگ دەبێتەوە
چاویلکەی بیستن دەخەمە سەر مێزیی کتێبێکی ڕەش داگەڕاو
بە نازنازو لاولاو دەمەشێرەکان دەڵێم
بەسە ئیرەی بردن بە تیشکە پڕلەمەراقەکانی خۆر
خۆ شەونمی سەر ڕوحی ئێوە نەبێ
کازیوە کوا دەگاتە ئەو دیوو پەردەی پەنجەرەکان
حیکمەتی هەنگێکی دڵتەڕ نەبێ
کوا هەناسە پڕ لەچێژەکانی هەڵاڵە جوتدەبن
لەو گفتە پڕ لە شەرابانەی ئێرە

گوڵی خراپە

وەرە ساقی! بە شین و نەدب و واوەی
ئەوا فەرشی حەیاتی خۆم دەکەم طەی

دەزانی خۆ دەچینە جێی غەریبان
بە مەرگی خۆت ئەگەر چاوان سیا کەی!

گلە ناکەم ئەوەندەی دەنکە جۆیێ
ئەگەر کەللەی سەریشم پڕ لە کا کەی

هەموو وەقتم دوعایە، داخۆ کەی بێ
بە تیرێکم شەهیدی کەربەلا کەی؟!

لەسەر ڕووت کازیبەی زوڵفت وەلا بە            کە سادیق بێ تولوعی ئافتابە
دڵ و دین  هەرچی بوو قوربانی تۆ بوون      هەتا کەی ئیدی ئەم ناز و عیتابە؟
بڵا بەو ڕۆژە نەیلۆفەر نەسووتێ                 بە مەرگی من سەری زوڵفت وەلا بە
لە عەکسی عاریزت فرمێسکی چاوم             گوڵاوی ڕووتە هەم خوونابی نابە
وەرە بنوێنە خۆت، بمکوژە قوربان              بە دینێک کوشتنی عاشق سەوابە
وەرە بنواڕە بەزمی عالەمی دڵ                 چ خۆش دەورێکە هۆشیاریی خەرابە
ئەگەرچی ناڵەیە هەر زەوق و شەوقە           ئەگەرچی گریەیە عەینی سەوابە